ສະຫະພັນເຕະບານເອີຣົບ ກຽມປັບກົດການຜ່ານເຂົ້າໄປຫຼິ້ນໃນຮອບແບ່ງກຸ່ມແບບອັດຕະໂນມັດໃໝ່ໃນເຕະບານ ຢູຟ່າ ແຊັມປຽນ ລີກ ໂດຍເພັ່ງເລັງໃຫ້ສະໂມສອນຈາກ 4 ລີກສູງສຸດຊັ້ນແນວໜ້າຂອງເອີຣົບ ຮັບປະກັນຜ່ານເຂົ້າຮອບແບ່ງກຸ່ມໄດ້ທັນທີ ເຊິ່ງຈະເລີ່ມໃນປີ 2018.
“Gazzetta dello Sport” ສື່ອິຕາລີລາຍງານຂ່າວວ່າ ສະຫະພັນເຕະບານເອີຣົບ ກຽມໃຊ້ກົດໃໝ່ສຳລັບລຸຍເສິກ ຢູຟ່າແຊັມປຽນ ລີກ ຂອງ 4 ລີກໃຫຍ່ໃນເອີຣົບ ເຊິ່ງຈະເລີ່ມໃຊ້ໃນລະດູການ 2018-19 ໂດຍ 4 ທີມທຳອິດຂອງ 4 ລີກໃຫຍ່ ຈະໄດ້ຜ່ານເຂົ້າໄປຫຼິ້ນໃນຮອບແບ່ງກຸ່ມແບບອັດຕະໂນມັດ ແບບບໍ່ຕ້ອງແຂ່ງຮອບໄປ-ກັບ (ເພຼອອຟ).
ເຊິ່ງພາຍໃຕ້ລະບຽບໃໝ່ນີ້ ຈະມີ ພຣີເມຍ ລີກ, ລາ ລີກາ, ບຸນເດສລີກາ ແລະ ກັນໂຊ່ ເຊເຣຍ ອາ ທີ່ໄດ້ສິດ 4 ທີມທຳອິດເຂົ້າໄປຫຼິ້ນໃນຮອບແບ່ງ ກຸ່ມແບບອັດຕະໂນມັດ ຂະນະທີ່ ລີກ ອອງ ລີກ ປອກຕຸຍການ ແລະ ລີກ ຣັດເຊຍ ຈະໄດ້ໂຄວຕາລີກລະ 2 ທີມ ສ່ວນ ອູແກຣນ, ແບນຊິກ, ຕວັກກີ, ໂຮນລັງ ແລະ ສວິດ ຈະໄດ້ໂຄວຕາ ລີກລະ 1 ທີມ.
ໂດຍແຕ່ເດີມ ກົດເດີມຄືການໃຫ້ຄະແນນສຳປະສິດສູງສຸດ 3 ອັນດັບທຳອິດ ແຕ່ໄລຍະຫຼັງມານີ້ ສະໂມສອນຍິ່ງໃຫຍ່ຫຼາຍທີມຫາຍໜ້າຫາຍຕາໄປຈາກລາຍການ ເພາະຜົນງານໃນລີກບໍ່ດີ ເຮັດໃຫ້ຢູຟ່າ ເລັ່ງລັດປັບກົດໃໝ່ ເພາະຕ້ອງການເກັບທີມໃຫຍ່ໆໄວ້ໃຫ້ໄດ້ຫຼາຍທີ່ສຸດ ແລະ ສະຫະພັນເຕະບານເອີຣົບ ຈະຫາລືກັນເລື່ອງນີ້ ໃນວັນທີ 14 ກັນຍານີ້ທີ່ປະເທດເກຣັກ.
ທີ່ມາຈາກ: http://www.vientianemai.net/khao/16498.html