ທ້າຍອາທິດຜ່ານມານີ້, ທີ່ສໍານັກງານຜູ້ຕາງໜ້າ ສະຫະພາບເອີຣົບປະຈໍາລາວ, ໄດ້ມີງານລ້ຽງສົ່ງນັກສຶກສາ 12 ຄົນ ທີ່ໄດ້ຮັບທຶນການສຶກສາແລກປ່ຽນ (Erasmus Plus International Credit Mobility) ຈາກບັນດາປະເທດສະມາຊິກເອີຣົບ ເຊັ່ນ: ປະເທດໄຊປຣັດ, ສາທານະລັດເຊັກ, ຝຣັ່ງ, ໂປໂລຍ ແລະ ປອກຕຸຍການ ໃນລະດັບຕ່າງໆ, ນັບແຕ່ການຝຶກອົບຮົມໄລຍະສັ້ນ ໄປຈົນຮອດລະດັບປະລີນຍາເອກ ໃນສົກປີ 2016. ໂດຍມີທ່ານອຸປະທູດສະຫະພາບເອີຣົບປະຈໍາລາວ ມີແຊນ ໂກແຟງ, ຜູ້ຕາງໜ້າຈາກກະຊວງສຶກສາທິການ ແລະ ກິລາ, ກະຊວງການຕ່າງປະເທດ, ມະຫາວິທະຍາໄລແຫ່ງຊາດ, ທູຕານູທູດ ແລະ ອະດິດນັກສຶກສາ ທີ່ເຄີຍໄດ້ຮັບທຶນດັ່ງກ່າວ ເຂົ້າຮ່ວມເປັນຈໍານວນຫລາຍ.
ທຶນການສຶກສານີ້, ແມ່ນການຊ່ວຍເຫລືອດ້ານການເງິນ ແກ່ສະຖາບັນການສຶກສາຕ່າງໆ ແລະ ສໍາລັບບຸກຄົນ, ເພື່ອຍົກສູງຄຸນນະພາບການສຶກສາຊັ້ນສູງ ໂດຍຜ່ານການສະໜັບສະໜູນທຶນການສຶກສາ, ການຮ່ວມມືດ້ານວິຊາການ ແລະ ການແລກປ່ຽນລະຫວ່າງເອີຣົບ ແລະ ບັນດາປະເທດຕ່າງໆໃນທົ່ວໂລກ ເພື່ອປັບປຸງຄຸນນະພາບການສຶກສາ ແລະ ພັດທະນາຊັບພະຍາກອນມະນຸດຂອງປະເທດຕ່າງໆ.
ທ່ານອຸປະທູດສະຫະພາບເອີຣົບ ກ່າວວ່າ: ການສຶກສາມີບົດບາດສໍາຄັນຫລາຍ ໃນການພັດທະນາຂອງປະເທດ, ໂດຍຜ່ານການສົ່ງເສີມ ການແລກປ່ຽນດ້ານການສຶກສາ ກັບບັນດາປະເທດໃນທົ່ວໂລກ ລວມເຖິງ ສປປ ລາວ ເຮົາ ໄດ້ປະກອບສ່ວນເຂົ້າໃນການ ນໍາເອົາບຸກຄະລາກອນທີ່ມີຄຸນນະພາບມາສູ່ປະເທດ ເພື່ອປະກອບສ່ວນ ເຂົ້າໃນການພັດທະນາປະເທດໃຫ້ດີຂຶ້ນ. ທັງເປັນການວາງພື້ນຖານທີ່ເປັນຮູບປະທໍາ ເພື່ອກ້າວສູ່ລະບົບການສຶກສາ ທີ່ມີມາດຕະຖານ ເພື່ອຮັບປະກັນວ່າ ສປປ ລາວ ຈະສາມາດຮອງຮັບນັກຮຽນ, ພະນັກງານ ແລະ ຄູອາຈານ ແລກປ່ຽນຈາກບັນດາມະຫາວິທະຍາໄລຕ່າງໆ ທີ່ເປັນຄູ່ຮ່ວມມືຈາກເອີຣົບ ແລະ ພາກພື້ນທີ່ຕ້ອງການ ມາແລກປ່ຽນດ້ານການຮຽນ-ການສອນຢູ່ລາວ, ໃນທ່າມກາງບັນຍາກາດ ການເຊື່ອມໂຍງເຂົ້າກັບພາກພື້ນ ແລະ ສາກົນ. ດັ່ງນັ້ນຕາງໜ້າສະຫະພາບເອີຣົບ ຂໍຊຸກຍູ້ໃຫ້ນັກຮຽນ, ນັກສຶກສາ ລວມເຖິງພະນັກງານທຸກພາກສ່ວນ ຂອງລາວ ທີ່ມີຄວາມສົນໃຈສະໝັກເອົາທຶນດັ່ງກ່າວ ຈົ່ງກະກຽມຕົນເອງໃຫ້ດີ ກ່ອນທີ່ຈະດໍາເນີນຂັ້ນຕອນສະໝັກ, ໂດຍສະເພາະແມ່ນທັກສະດ້ານພາສາຕ່າງປະເທດ ເພື່ອຮັບປະກັນຜົນສໍາເລັດທີ່ສູງຂື້ນ, ຊຶ່ງມີອີກປະມານ 30 ກວ່າທຶນການສຶກສາຂອງ ສະຫະພາບເອີຣົບ ໃນຂອບຮ່ວມມືສົກປີ 2015 ກໍຈະໄດ້ມອບໃຫ້ແກ່ນັກສຶກສາລາວ ໃນຊຸມປີທີ່ຈະເຖິງນີ້ ໂດຍຜ່ານການຄັດເລືອກ ຕາມເງື່ອນໄຂຂອງສະຫະພາບເອີຣົບ.
ແຕ່ປີ 2004 ເປັນຕົ້ນມາ, ສະຫະພາບເອີຣົບ ໄດ້ສະໜອງທຶນການສຶກສາຫລາຍກວ່າ 250 ທຶນໃຫ້ແກ່ ສປປ ລາວ ເພື່ອສືບຕໍ່ສຶກສາໃນລະດັບຕ່າງໆ ເຊັ່ນ: ການຝຶກອົບຮົມທາງດ້ານວິຊາສະເພາະ, ປະລີນຍາຕີ, ໂທ ແລະ ເອກ ຢູ່ບັນດາປະເທດສະມາຊິກຂອງສະຫະພາບເອີຣົບ.
ສໍາລັບຂໍ້ມູນກ່ຽວກັບທຶນການສຶກສາດັ່ງກ່າວ ສາມາດເບິ່ງໄດ້ທີ່ເວບໄຊ: http://ec.europa.eu/programmes/erasmus-plus/Erasmus+-European CommissionEU programmer for education. Training. Youth and sport ec.europa.eu
ແຫລ່ງຂ່າວ:
ຕິດຕາມເລື່ອງດີດີ ວິທະຍາສຶກສາ ກົດໄລຄ໌ເລີຍ!