ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດໄດ້ຖະແຫຼງຂ່າວກ່ຽວກັບຜົນສຳເລັດຂອງກອງປະຊຸມລັດຖະມົນຕີຕ່າງປະເທດອາຊຽນຄັ້ງທີ 49 ທີ່ປິດລົງຢ່າງເປັນທາງການໃນວັນທີ 26 ກໍລະກົດ ທີ່ນະຄອນຫຼວງວຽງຈັນວ່າ: ການເປັນເຈົ້າພາບ ແລະປະທານກອງປະຊຸມຄັ້ງນີ້ ໄດ້ມີການຮ່ວມປະຊຸມກັນທັງໝົດ 22 ກອງປະຊຸມລະດັບລັດຖະມົນຕີເຊັ່ນ: ມີ 3 ກອງປະຊຸມລັດຖະມົນຕີຕ່າງປະເທດອາຊຽນ ຊຶ່ງແຕ່ລະກອງປະຊຸມມີໜ້າທີ່ແຕກຕ່າງກັນ; 14 ກອງປະຊຸມກັບຄູ່ຮ່ວມເຈລະຈາອາຊຽນພາຍໃຕ້ກົນໄກອາຊຽນເປັນຜູ້ລິເລີ່ມຄື ອາຊຽນ+1, ອາຊຽນ+3, ກອງປະຊຸມສຸດຍອດອາຊີຕາເວັນອອກ ແລະກອງປະຊຸມເວທີພາກພື້ນອາຊຽນ; ພ້ອມນັ້ນຍັງມີ 5 ກອງປະຊຸມອະນຸພາກພື້ນລະດັບລັດຖະມົນຕີ ນອກຈາກກອງປະຊຸມເຫຼົ່ານີ້ຍັງມີຫຼາຍກອງປະຊຸມແບບຫຼາຍຝ່າຍ ຊຶ່ງທຸກກອງປະຊຸມໄດ້ມີການປຶກສາຫາລືກັນຢ່າງຄົບຖ້ວນຮອບດ້ານ, ກົງໄປກົງມາ ແລະ ມີໝາກຜົນ.
ກອງປະຊຸມລັດຖະມົນຕີຕ່າງປະເທດຄັ້ງທີ 49 ໄດ້ມີການປຶກສາຫາລືກ່ຽວກັບບັນຫາສຳຄັນທາງດ້ານການເມືອງ, ຄວາມໝັ້ນຄົງ ແລະການຮ່ວມມືເພື່ອການພັດທະນາພາຍໃນອາຊຽນ ແລະ ລະຫວ່າງອາຊຽນນັບທັງຄູ່ຮ່ວມເຈລະ ຈາ ແລະຄູ່ຮ່ວມພາຍນອກຢ່າງມີໝາກຜົນທີ່ປະຊຸມໄດ້ຢ້ຳຄືນຄວາມໝາຍໝັ້ນ ເພື່ອສົ່ງເສີມຄວາມພະຍາຍາມສ້າງ ປະຊາຄົມອາຊຽນ ໂດຍການຈັດຕັ້ງປະຕິບັດວິໄສທັດປະຊາຄົມອາຊຽນ 2025 ແລະ ແຜນແມ່ບົດທັງ 3 ເສົາຄ້ຳ ຢ່າງມີປະສິດທິຜົນ ໂດຍມີເປົ້າໝາຍເພື່ອສົ່ງເສີມປະຊາຄົມອາຊຽນໃຫ້ເຂັ້ມແຂງ ເປັນການປະກອບສ່ວນຕໍ່ການຮັກສາ ແລະສົ່ງເສີມສັນຕິພາບ, ສະຖຽນລະພາບ ແລະຄວາມສົມບູນພູນສຸກໃນພາກພື້ນ.
ປີນີ້ແມ່ນຄົບຮອບ 40 ປີຂອງສົນທິສັນຍາວ່າດ້ວຍໄມຕີຈິດ ແລະ ການຮ່ວມມືໃນອາຊີຕາເວັນອອກສ່ຽງໃຕ້, ສະນັ້ນກອງປະຊຸມໄດ້ຮັບຮອງຖະແຫຼງການຂອງລັດຖະມົນຕີຕ່າງປະເທດອາຊຽນ ເພື່ອຢ້ຳຄືນຄວາມໝາຍຄວາມສຳຄັນຂອງສົນທິສັນຍາສະບັບນີ້ ຊຶ່ງເປັນກົດແຫ່ງການປະພຶດທີ່ສຳຄັນສຳລັບການດຳເນີນການພົວພັນລະຫວ່າງລັດ ແລະ ພາກພື້ນ ແລະການສົ່ງເສີມການຮ່ວມມືລະຫວ່າງອາຊຽນກັບພາຍນອກ ເພື່ອສົ່ງເສີມສັນຕິພາບ ແລະການພັດທະນາ ໃນພາກພື້ນກອງປະຊຸມຍັງໄດ້ມີຄວາມຍິນດີທີ່ຫຼາຍປະເທດໄດ້ຮັບຮູ້ສົນທິສັນຍາດັ່ງກ່າວ ແລະເຫັນດີຮັບຮອງເອົາ 4 ປະເທດຄື: ຈີເລ, ເອຢິບ, ອີຣານ ແລະ ມາຣົກ ເຂົ້າເປັນພາຄີຂອງສົນທິສັນຍານີ້ ກອງປະຊຸມໄດ້ອອກຖະແຫຼງການຮ່ວມຂອງລັດຖະມົນຕີຕ່າງປະເທດອາຊຽນວ່າດ້ວຍການຮັກສາສັນຕິພາບ ແລະສະຖຽນລະພາບໃນພາກພື້ນລັດຖະມົນຕີຕ່າງປະເທດອາຊຽນຈະສືບຕໍ່ຮັດແໜ້ນການຮ່ວມມືກັບຄູ່ເຈລະຈາກໍຄືການຮັດແໜ້ນກັບຄູ່ຮ່ວມມືພາຍນອກອື່ນໆຜ່ານບັນດາກົນໄກທີ່ອາຊຽນເປັນຜູ້ລິເລີ່ມເຊັ່ນ: ອາຊຽນ +1,+3; ກອງປະຊຸມລັດຖະມົນຕີປ້ອງກັນປະເທດອາ ຊຽນ-ບວກ, ເວທີພາກພື້ນອາຊຽນ ແລະ ກອງປະຊຸມສຸດຍອດອາຊີຕາເວັນອອກ ເພື່ອຜົນປະໂຫຍດຮ່ວມກັນ ພ້ອມທັງຮັດ ແໜ້ນຄວາມເປັນແກນກາງຂອງອາຊຽນໃນບັນດາກົນໄກເຫຼົ່ານັ້ນ ແລະໃນໂຄງສ້າງພາກພື້ນທີ່ພວມຜັນແປ; ໃນນີ້ ເຫັນດີຮັບຮອງເອົາເຢຍລະມັນເປັນຄູ່ຮ່ວມພັດທະນາ ແລະສະວິສ ເປັນຄູ່ຮ່ວມຂະແໜງການລັດຖະມົນຕີອາຊຽນໄດ້ຮັບຮອງຖະແຫຼງການຮ່ວມຂອງກອງປະຊຸມລັດຖະມົນຕີຕ່າງປະເທດອາຊຽນຄັ້ງທີ 49.
ບັນດາລັດຖະມົນຕີຕ່າງປະເທດອາ ຊຽນໄດ້ພົບປະກັບຄູ່ຮ່ວມຕຳແໜ່ງຈາກ 10 ປະເທດຄູ່ເຈລະຈາໃນແຕ່ລະກອງປະຊຸມລັດຖະມົນຕີຕ່າງປະເທດກັບຄູ່ຮ່ວມເຈລະຈາບວກເຊັ່ນ: ອົດສະຕຣາລີ, ການາດາ, ຈີນ, ສະຫະພາບເອີຣົບ, ອິນເດຍ, ຍີ່ປຸ່ນ, ນິວຊີແລນ, ສ ເກົາຫຼີ, ສະຫະພັນລັດເຊຍ ແລະສະຫະລັດອາເມລິກາ ຊຶ່ງໄດ້ມີການທົບທວນຄືນຄວາມຄືບໜ້າຂອງການຮ່ວມມືລະຫວ່າງອາຊຽນ ແລະຄູ່ເຈລະຈາໃນໄລຍະຜ່ານມາພ້ອມ ທັງໄດ້ກຳນົດທິດທາງໃນອະນາຄົດ ເພື່ອການຮັດແໜ້ນການຮ່ວມມືໃນທຸກຂະແໜງການໃຫ້ໃກ້ຊິດກວ່າເກົ່າເຊັ່ນ: ການຄ້າ, ການລົງທຶນ, ການເຊື່ອມຈອດ, ການທ່ອງທ່ຽວ ແລະການໄປມາຫາສູ່ລະຫວ່າງປະຊາຊົນ.
ບັນດາລັດຖະມົນຕີຕ່າງປະເທດອາຊຽນໄດ້ພົບປະກັບຄູ່ຮ່ວມຕຳແໜ່ງພາຍໃຕ້ຂອບການຮ່ວມມືອາຊຽນ +3 ຊຶ່ງໄດ້ຢ້ຳຄືນຄວາມໝາຍໝັ້ນ ເພື່ອສົ່ງເສີມກົນໄກອາຊຽນ+3 ຊຶ່ງເປັນກົນໄກສຳຄັນເພື່ອໄປສູ່ການສ້າງປະຊາຄົມເສດ ຖະກິດອາຊີຕາເວັນອອກໃນໄລຍະຍາວ. ພ້ອມທັງປຶກສາຫາລືບັນດາກິດຈະກຳ ເພື່ອສະເຫຼີມສະຫຼອງການຮ່ວມມືອາຊຽນ+3 ຄົບຮອບ 20 ປີໃນປີ 2017. ໃນຖານະເປັນປະທານອາຊຽນ ແລະ ປະທານອາຊຽນ+3; ສປປ ລາວ ໄດ້ສະເໜີຮ່າງຖະແຫຼງການວ່າດ້ວຍການສົ່ງເສີມການຮ່ວມມື ເພື່ອການພັດທະນາແບບຍືນຍົງທີ່ຈະຖືກຮັບຮອງໃນກອງ ປະຊຸມສຸດຍອດອາຊຽນ+3 ຄັ້ງທີ 19 ໃນເດືອນກັນຍາ 2016 ທີ່ນະຄອນຫຼວງວຽງຈັນ ຊຶ່ງຂໍ້ສະເໜີນີ້ກໍໄດ້ຮັບການສະໜັບໜູນຈາກບັນດາປະເທດສະມາຊິກອາຊຽນ+3 ຢ່າງກວ້າງຂວາງ.
ໃນກອງປະຊຸມລັດຖະມົນຕີຕ່າງປະເທດຂອງກອງປະຊຸມສຸດຍອດອາຊີຕາເວັນອອກໄດ້ຢ້ຳຄືນຄວາມສຳຄັນຂອງ ການສ້າງຄວາມເຂັ້ມແຂງໃຫ້ແກ່ກົນໄກຂ້າງເທິງ ຊຶ່ງເປັນເວທີຜູ້ນຳສຳລັບ ການປຶກສາຫາລືກ່ຽວກັບບັນຫາຍຸດທະ ສາດການເມືອງ ແລະເສດຖະກິດທີ່ມີ ຄວາມເປັນຫ່ວງ ແລະສົນໃຈຮ່ວມກັນ ໂດຍມີເປົ້າໝາຍເພື່ອສົ່ງເສີມສັນຕິພາບ, ສະຖຽນລະພາບ ແລະ “ຄວາມສົມບູນພູນສຸກໃນອາຊີຕາເວັນອອກ, ໄດ້ປຶກສາຫາລືກ່ຽວກັບທິດທາງເພື່ອຈັດຕັ້ງປະຕິບັດ 6 ຂົງເຂດບູລິມະສິດ ກອງປະຊຸມໄດ້ສະ ແດງການສະໜັບສະໜູນຢ່າງກວ້າງ ຂວາງຕໍ່ຮ່າງຖະແຫຼງການວຽງຈັນ ວ່າດ້ວຍການສົ່ງເສີມການຮ່ວມມືເພື່ອພັດທະນາພື້ນຖານໂຄງລ່າງໃນອາຊີຕາເວັນອອກທີ່ສະເໜີໂດຍ ສປປ ລາວ ແລະຈະໄດ້ຮັບຮອງເອົາໂດຍບັນດາຜູ້ນຳອາຊີຕາເວັນອອກໃນກອງປະຊຸມສຸດຍອດອາຊີຕາເວັນອອກຄັ້ງທີ 11 ໃນເດືອນກັນຍາ 2016 ນີ້ທີ່ນະຄອນຫຼວງວຽງຈັນ. ຖະແຫຼງການດັ່ງກ່າວມີຈຸດປະສົງເພື່ອລະດົມຄວາມສາມາດຂອງພາກພື້ນໃນການສົ່ງເສີມບັນດາໂຄງການພັດທະນາພື້ນຖານໂຄງລ່າງ ເພື່ອກ້າວໄປສູ່ການຮັດແໜ້ນການເຊື່ອມຈອດພາກພື້ນອັນເປັນການປະກອບສ່ວນສົ່ງເສີມການພັດທະນາແບບຍືນຍົງ, ການເຕີບໂຕທາງດ້ານເສດຖະກິດ ແລະການເຊື່ອມໂຍງພາກພື້ນ.
ໃນກອງປະຊຸມເວທີພາກພື້ນອາຊຽນ ກໍໄດ້ຢ້ຳຄືນຄວາມສຳຄັນຂອງເວທີດັ່ງກ່າວ ຊຶ່ງເປັນເວທີເພື່ອການປຶກສາຫາລື ຢ່າງສ້າງສັນ ແລະການຮ່ວມມືທາງດ້ານການເມືອງ ແລະຄວາມໝັ້ນຄົງທີ່ທຸກຝ່າຍ ມີຄວາມເປັນຫ່ວງ ແລະມີຄວາມສົນໃຈຮ່ວມກັນ, ທັງຢ້ຳຄືນບົດບາດຄວາມສຳຄັນຂອງເວທີພາກພື້ນອາຊຽນໃນການປະກອບສ່ວນຮັບມືກັບບັນດາສິ່ງທ້າທາຍຕໍ່ຄວາມໝັ້ນຄົງທີ່ບໍ່ແມ່ນການທະຫານໃຫ້ນັບມື້ເພີ່ມຂຶ້ນ ລັດຖະມົນຕີເວທີພາກພື້ນອາຊຽນໄດ້ຮັບຮອງເອົາ 23 ກິດຈະກຳສຳລັບສົກປີ 2016-2017 ແລະເຫັນດີຮັບຮອງເອົາ 3 ຖະແຫຼງການຄື: ຖະແຫຼງການເວທີພາກພື້ນອາຊຽນວ່າດ້ວຍການຮັດແໜ້ນການຮ່ວມມືເພື່ອຄຸ້ມຄອງການເຄື່ອນໄຫວຂ້າມຊາຍແດນຂອງກຸ່ມອາຊະຍາກອນ; ຖະແຫຼງການເວທີພາກພື້ນອາຊຽນວ່າດ້ວຍການຮັດແໜ້ນການຮ່ວມມືລະຫວ່າງບັນດາອົງກອນທີ່ຮັບຜິດຊອບການບັງຄັບໃຊ້ກົດໝາຍທາງທະເລ; ຖະແຫຼງການລັດຖະມົນຕີເວທີພາກພື້ນອາຊຽນກ່ຽວກັບການກໍ່ການຮ້າຍ.
ສປປ ລາວ ໃນນາມປະທານອາຊຽນ ໄດ້ນຳສະເໜີປຶ້ມວິໄສທັດປະຈຳປີຂອງເວທີພາກພື້ນອາຊຽນ 2016 ຊຶ່ງເປັນ ສະບັບທີ 17 ທີ່ໄດ້ລວບຮວມເອົາການປະກອບຄຳຄິດຄຳເຫັນຈາກບັນດາປະເທດເຂົ້າຮ່ວມເວທີພາກພື້ນອາຊຽນ, ປຶ້ມວິໄສທັດນີ້ຖືເປັນເອກະສານສຳຄັນ ເພື່ອສົ່ງເສີມຄວາມເຂົ້າໃຈ, ການໄວ້ເນື້ອເຊື່ອໃຈ ແລະຄວາມໂປ່ງໃສລະຫວ່າງປະເທດຜູ້ເຂົ້າຮ່ວມເວທີພາກພື້ນອາຊຽນ ໃນບັນດາກອງປະຊຸມດັ່ງກ່າວນີ້, ໄດ້ມີການແລກປ່ຽນທັດສະນະຢ່າງເປີດເຜີຍກົງໄປກົງມາ ແລະ ສ້າງສັນກ່ຽວກັບພາກພື້ນ ແລະ ສາກົນທີ່ທຸກຝ່າຍມີຄວາມສົນໃຈ ແລະເປັນຫ່ວງຮ່ວມກັນກອງປະຊຸມລັດຖະມົນຕີຕ່າງປະເທດອາຊຽນຄັ້ງທີ 49 ແລະກອງປະຊຸມລະດັບລັດຖະມົນຕີອື່ນໆທີ່ກ່ຽວຂ້ອງໄດ້ອັດລົງດ້ວຍຜົນສຳເລັດອັນຈົບງາມ.
ທີ່ມາ: ນສພ ເສດຖະກິດ-ສັງຄົມ