ຂປລ. ແຂວງສະຫວັນນະເຂດ ເຊື່ອວ່າຍັງມີແຮງງານຕ່າງປະເທດທີ່ຜິດກົດໝາຍ ຕົກຄ້າງຈໍານວນບໍ່ໜ້ອຍ ໃນເຂດຕົວເມືອງ ແລະ ເຂດຫ່າງໄກໃນແຂວງຂອງຕົນ ພາຍຫລັງສໍາເລັດການຂຶ້ນທະບຽນ ແຮງງານຕ່າງປະເທດ ທັງໝົດ 2.232 ຄົນ ໃນເດືອນມິຖຸນາ 2016 ຜ່ານມາ.
ທ່ານ ສິລິ ປາຖະໜາ ຮອງຫົວໜ້າຂະແໜງຄຸ້ມຄອງແຮງງານ, ພະແນກແຮງງານ ແລະ ສະ ຫວັດດີການສັງຄົມ ໄດ້ເປີດເຜີຍ ໃນວັນທີ 5 ກໍລະກົດ 2016 ນີ້ ວ່າ: ພາຍຫລັງເຈົ້າໜ້າທີ່ສະເພາະກິດຂອງຕົນ ໄດ້ກວດກາ ແລະ ຂຶ້ນທະບຽນແຮງງານຕ່າງປະເທດ ພາຍໃນແຂວງ ນັບແຕ່ເດືອນພຶດສະພາ 2016 ເຖິງປັດຈຸບັນ ສາມາດລະບຸ ແລະ ເກັບກໍາຂໍ້ມູນທັງໝົດໄດ້ 2.232 ຄົນ ໃນນັ້ນ ມີແຮງງານຫວຽດນາມ 2.223 ຄົນ, ໄທ 58 ຄົນ ແລະ ແຮງງານຈີນ 42 ຄົນ. ສໍາລັບຄ່າຂຶ້ນທະບຽນແຮງງານຕ່າງປະເທດ ຈະຕ້ອງຈ່າຍ 300,000 ກີບຕໍ່ຄົນຕໍ່ເດືອນ.
ຮອງຫົວໜ້າຂະແໜງຄຸ້ມຄອງແຮງງານ ໄດ້ຍັງຢືນຢັນຕື່ມວ່າ: ປັດຈຸບັນນີ້ ຍັງປະກົດມີແຮງງານຕ່າງປະເທດ ຕົກຄ້າງ ແລະ ຖືກປົກປິດ ໃນບາງເຂດທ້ອງຖິ່ນ ໂດຍສະເພາະກຸ່ມກໍາມະກອນເຄື່ອນຍ້າຍ ເຊິ່ງບັນຫາດັ່ງກ່າວ, ອາດເກີດປະກົດການຫຍໍ້ທໍ້ຕາມມາ ຖ້າຫາກປ່ອຍປະລະເລີຍດົນໄປ, ເນື່ອງຈາກວ່າຜ່ານມາ ໄດ້ເກີດມີສະພາບຂີ້ລັກງັດແງະ ແລະ ອື່ນໆ ໄດ້ກ່ຽວຂ້ອງກັບບາງກຸ່ມຄົນດັ່ງກ່າວ.
ແຫລ່ງຂ່າວ:
ຕິດຕາມເລື່ອງດີດີເພຈທ່ຽວເມືອງລາວ Laotrips ກົດໄລຄ໌ເລີຍ!