ຂປລ. ໂຄງການກໍ່ສ້າງ ສະໜາມກິລາເປີດ–ປິດ ຄັງໜອງຫລວງ ແຂວງຊຽງຂວາງ ເພື່ອກະກຽມຄວາມພ້ອມ ໃນການເປັນເຈົ້າພາບ ຈັດງານແຂ່ງຂັນກິລາແຫ່ງຊາດ ຄັ້ງທີ XI ເຊິ່ງຈະຈັດຂຶ້ນໃນ ປີ 2018 ທີ່ຈະມາເຖິງ. ໄດ້ເລີ່ມລົງມືກໍ່ສ້າງ ມາແຕ່ວັນທີ 1 ຕຸລາ 2015 ມາຮອດປະຈຸບັນ ໂຄງການດັ່ງກ່າວ ໄດ້ສຳເລັດແລ້ວ 30% ຂອງໂຄງການ ໂດຍແມ່ນບໍລິສັດດາວພວນ ສຳຫລວດອອກແບບ ແລະ ກໍ່ສ້າງຈຳກັດ ເປັນຜູ້ຮັບເໝົາກໍ່ສ້າງ. ລວມມູນຄ່າກໍ່ສ້າງ ທັງໝົດ 215 ຕື້ກວ່າກີບ ເປັນງົບປະມານຂອງລັດຖະບານ.
ໂຄງການດັ່ງກ່າວ ມີເນື້ອທີ່ການກໍ່ສ້າງ 350.000 ຕາເມັດ, ສາມາດບັນຈຸນັກກິລາ ແລະ ຜູ້ຊົມ 11.000 ຄົນ. ປະຈຸບັນກຳລັງສຸມໃສ່ ໂຄງສ້າງອັດສະຈັນ (ບ່ອນນັ່ງ) ໃຫ້ໄປຕາມແຕ່ລະໜ້າວຽກ, ໄປຕາມແຜນປະຕິບັດ ໄດ້ຕາມຄາດໝາຍທີ່ທາງແຂວງ ໄດ້ມີການລົງກວດກາ ແລະ ຕິດຕາມແຕ່ລະໜ້າວຽກ ເພື່ອໃຫ້ຖືກຕາມເຕັກນິກ
ທ່ານ ບຸນປະເສີດ ເຂັມທອງ ວິຊາການພາກສະໝາມ ກິລາເປີດ–ປິດ ຄັງໜອງຫລວງ ໄດ້ກ່າວວ່າ: ແຜນການກໍ່ສ້າງສະໝາມກິລາເປີດ–ປິດ ແມ່ນໃຫ້ສຳເລັດ ໃນທ້າຍປີ 2017 ເພື່ອກຽມພ້ອມຮອງຮັບ ຈັດງານມະຫາກຳກິລາແຫ່ງຊາດ ຄັ້ງທີ XI ປີ 2018 ພ້ອມໄຂຂຶ້ນທີ່ ແຂວງຊຽງຂວາງ.
ແຫລ່ງຂ່າວ:
ຕິດຕາມເລື່ອງດີດີເພຈທ່ຽວເມືອງລາວ Laotrips ກົດໄລຄ໌ເລີຍ!