ປະຈຸບັນ ຊົນຊັ້ນກຳມະກອນໄດ້ກາຍເປັນກຳລັງສຳຄັນໃນການປະກອບສ່ວນເຂົ້າໃນການພັດທະນາ ໂດຍສະເພາະປະກອບສ່ວນທາງດ້ານສະຕິປັນຍາ ແລະກຳລັງເຫື່ອແຮງ ເຮັດໃຫ້ເສດຖະກິດ-ສັງຄົມມີຄວາມເຂັ້ມແຂງໃນແຕ່ ລະໄລຍະເປັນຕົ້ນການກໍ່ສ້າງຖະໜົນຫົນທາງ, ກໍ່ສ້າງຂົວ, ອາຄານ, ຂຸດຄົ້ນແຮ່ທາດ, ກົນຈັກສ້ອມແປງ, ບໍລິການ ປຸງແຕ່ງ, ເຮັດການຜະລິດໃນໂຮງງານຕ່າງໆ, ການປ້ອງກັນຊາດ, ປ້ອງກັນຄວາມສະຫງົບ ແລະ ອື່ນໆ.
ວັນທີ 1 ພຶດສະພາ 1886 ຊຶ່ງເປັນເທື່ອທຳອິດໃນປະເທດອາເມລິກາຢູ່ຕົວ ເມືອງຊິກາໂກຊົນຊັ້ນກຳມະກອນ ແລະຊາວຜູ້ອອກແຮງງານໄດ້ມີການຕໍ່ສູ້ສົມທົບກັບເນື້ອ ໃນຂອງຖະແຫຼງການຮຽກຮ້ອງໃຫ້ນາຍທຶນຕ້ອງປະຕິບັດຕາມການສະເໜີຂອງ ກຳມະກອນວ່າ: “ແຕ່ນີ້ຕໍ່ໄປບໍ່ໃຫ້ກຳມະ ກອນຜູ້ໃດເຮັດວຽກເກີນ 8 ຊົ່ວໂມງຕໍ່ມື້, 8 ຊົ່ວໂມງພັກຜ່ອນ ແລະ 8 ຊົ່ວໂມງ ຮໍ່າຮຽນ” ໃນມື້ນັ້ນ ໄດ້ມີການນັດຢຸດງານເຖິງ 5 ພັນແຫ່ງ ໃນຕົວເມືອງໃຫຍ່ຂອງປະເທດອາເມລິກາເຊັ່ນ: ນິວຢອກ, ບານຕີມໍ, ວໍຊິງຕັນ ແລະອື່ນໆ ໂດຍມີຜູ້ເຂົ້າຮ່ວມເຖິງ 3,4 ແສນຄົນ, ໄດ້ຮຽກຮ້ອງ ແລະບັງຄັບໃຫ້ນາຍທຶນຕ້ອງຮັບຮອງເອົາສິດໃນການເຮັດວຽກຂອງກຳມະກອນໃນມື້ໜຶ່ງ 8 ຊົ່ວໂມງ ໃນຂະບວນການດັ່ງກ່າວ ພວກນາຍທຶນສົມທົບກັບເຈົ້າໜ້າທີ່ໄດ້ຍິງປືນກວາດໃສ່ຂະບວນການປະທ້ວງເຮັດໃຫ້ມີຄົນຕາຍ 9 ຄົນ.
ຕໍ່ສະພາບການຄືແນວນັ້ນ ວັນທີ 1 ພຶດສະພາ 1889 ກອງປະຊຸມພັກກອມມູນິດສາກົນຄັ້ງທີ II ໄດ້ໄຂຂຶ້ນທີ່ນະຄອນຫຼວງປາຣີ ປະເທດຝຣັ່ງ ໂດຍທີ່ປະຊຸມໄດ້ຜ່ານໂຄງການດຳເນີນງານສຳຄັນຄື: ຊົນຊັ້ນກຳມະກອນສາມັກຄີຕໍ່ສູ້ເພື່ອປະຕິບັດຄຳຂັວນ “ມື້ໜຶ່ງເຮັດວຽກ 8 ຊົ່ວໂມງ ແລະໄດ້ກຳນົດເອົາວັນທີ 1 ພຶດສະພາ 1886 ເປັນວັນກຳມະກອນສາກົນ” ແຕ່ນັ້ນມາວັນທີ 1 ພຶດສະພາ ຂອງທຸກໆປີຈິ່ງໄດ້ກາຍເປັນວັນບຸນໃຫຍ່ຂອງຊົນຊັ້ນກຳມະກອນໃນທົ່ວໂລກ.
ສະເພາະ ສປປ ລາວ ໃນທຸກໆປີຊົນຊັ້ນກຳມະກອນ ແລະຊາວຜູ້ອອກແຮງ ງານລາວ ກໍໄດ້ຈັດຕັ້ງງານໂຮມຊຸມນຸມໃຫຍ່ເພື່ອລະນຶກເຖິງມູນເຊື້ອສາມັກຄີຕໍ່ສູ້ຂອງຊາວກຳມະກອນ ເພື່ອເປັນການປົກປ້ອງສິດ ແລະຜົນປະໂຫຍດອັນຊອບທຳຂອງຜູ້ອອກແຮງງານ ແລະທັງເປັນການປົກປັກຮັກສາສັນຕິພາບໂລກເປັນຂີດໝາຍອັນສຳຄັນຂອງຊົນຊັ້ນກຳມະກອນ.
ຊຶ່ງຕະຫຼອດໄລຍະ 130 ປີຜ່ານມາ (1 ພຶດສະພາ 1886-1 ພຶດສະພາ 2016) ພາຍໃຕ້ການຊີ້ນຳໂດຍກົງຂອງພັກປະຊາຊົນປະຕິວັດລາວ ໃນໄລຍະນີ້ ອົງການກຳມະບານລາວແຕ່ລະຂັ້ນໄດ້ເອົາໃຈໃສ່ສຶກສາອົບຮົມການເມືອງແນວຄິດໃຫ້ກຳມະກອນໃນການສືບຕໍ່ເສີມຂະຫຍາຍທາດແທ້, ລັກສະນະດີ ເລີດຂອງຊົນຊັ້ນກຳມະກອນ ແລະມູນເຊື້ອປະຕິວັດອັນດີງາມຂອງຊາດ, ປະຕິບັດສິດ ແລະພັນທະເຂົ້າໃນພາລະກິດປະຕິວັດໃນໄລຍະໃໝ່ຢ່າງຖືກຕ້ອງ.
ປະຈຸບັນ ຊົນຊັ້ນກຳມະກອນລາວຢູ່ຕາມບັນດາຫົວໜ່ວຍແຮງງານ, ໂຮງຈັກໂຮງງານ, ຮາກຖານຕ່າງໆໄດ້ກາຍເປັນເຈົ້າຂອງການຜະລິດ ແລະພາຫະນະການຜະລິດເຂົາເຈົ້າໄດ້ຍົກສູງສິດເປັນເຈົ້າຕົນເອງ, ເປັນເຈົ້າລວມໝູ່ ແລະເປັນເຈົ້າຂອງປະເທດຊາດໄດ້ປະກອບສ່ວນທາງດ້ານສະຕິປັນຍາ ແລະກຳລັງເຫື່ອແຮງໃນການພັດທະນາເສດຖະກິດ-ສັງຄົມ ແຕ່ລະໄລຍະມີການເຕີບໃຫຍ່ເຂັ້ມແຂງເປັນຕົ້ນການກໍ່ສ້າງຖະໜົນຫົນທາງ, ກໍ່ສ້າງຂົວ, ອາຄານ, ການຂຸດຄົ້ນແຮ່ທາດ, ນໍ້າປະປາ, ກົນຈັກສ້ອມແປງ, ບໍລິການປຸງແຕ່ງ, ການຄົມມະນາຄົມຂົນສົ່ງ, ເຮັດການຜະລິດໃນໂຮງຈັກໂຮງງານຕ່າງໆ, ການປ້ອງກັນຊາດ, ປ້ອງກັນຄວາມສະຫງົບ ແລະອື່ນໆ ລ້ວນແຕ່ມີການປະກອບສ່ວນຢ່າງຕັ້ງໜ້າຂອງກຳມະກອນ ແລະຊາວຜູ້ອອກແຮງງານເຮັດໃຫ້ພື້ນຖານໂຄງລ່າງ ແລະ ເສດຖະກິດ-ສັງຄົມຂອງຊາດມີຄວາມໜັກແໜ້ນເຂັ້ມແຂງ.
ຊຶ່ງມັນໄດ້ສະແດງໃຫ້ເຫັນວ່າເສດຖະກິດ-ສັງຄົມ ໃນໄລຍະ 5 ປີຜ່ານມາ ມີການຂະຫຍາຍຕົວຢ່າງຕໍ່ເນື່ອງສະເລ່ຍ 7,9% ຕໍ່ປີ, ລວມຍອດຜະລິດຕະພັນພາຍໃນຕໍ່ຫົວຄົນສະເລ່ຍ 1.970 ໂດລາ, ລື່ນແຜນທີ່ວາງໄວ້ 270 ໂດລາຕໍ່ຫົວຄົນ, ໂຄງປະກອບເສດຖະກິດຫັນປ່ຽນ ໄປຕາມທິດຫັນເປັນອຸດສາຫະກຳ ແລະ ທັນສະໄໝ, ອັດຕາເງິນເຟີ້ຢູ່ໃນລະດັບຕໍ່າ, ການເກັບລາຍຮັບເຂົ້າງົບປະມານ ໄດ້ 24,6% ຂອງ ຈີດີພີ ລື່ນຄາດໝາຍທີ່ກຳນົດໄວ້, ການລົງທຶນທັງໝົດບັນລຸສູງກວ່າ 236 ພັນຕື້ກີບ, ຈຳນວນຄອບຄົວທີ່ທຸກຍາກໄດ້ຫຼຸດລົງຍັງເຫຼືອ 6,59% ຂອງຈຳນວນຄອບຄົວທັງໝົດໃນທົ່ວປະເທດ, ພື້ນຖານໂຄງລ່າງດ້ານຄົມມະນາຄົມ ແລະໂທລະຄົມມະນາຄົມໄດ້ຂະ ຫຍາຍຕົວຢ່າງແຂງແຮງ, ມີເສັ້ນທາງທີ່ສາມາດໄປ-ມາໄດ້ທັງສອງລະດູເຖິງທຸກບໍລິເວນຂອງປະເທດ ແລະ ເຊື່ອມຈອດກັບບັນດາປະເທດໃກ້ຄຽງ.
ໂດຍປະຈຸບັນ ທົ່ວປະເທດມີແຮງງານທີ່ມີວຽກເຮັດງານທຳ (ແຮງງານໃນລະບົບ) ມີ 551.254 ຄົນ ໃນນັ້ນ ເປັນລັດຖະກອນ 161.527 ຄົນ, ແຮງງານພາກວິສາຫະກິດມີ 389.727 ຄົນ, ຍິງ 170.756 ຄົນ ແລະມີຫົວໜ່ວຍ ແຮງງານທັງໝົດ 45.274 ແຫ່ງໃນທົ່ວປະເທດ.
ທີ່ມາ: 