ສຳນັກຂ່າວເອເອຟພີລາຍງານເມື່ອວັນທີ 18 ເມສາ ທາງການຍີ່ປຸ່ນເກນເຈົ້າໜ້າທີ່ທະຫານສະຫະລັດອາເມລິກາ ໃຫ້ຊ່ວຍສົ່ງເຮືອບິນອອກປະຕິບັດການຊ່ວຍເຫຼືອນຳສົ່ງເຄື່ອງໃຊ້ທີ່ຈຳເປັນໃຫ້ແກ່ປະຊາຊົນຍີ່ປຸ່ນປະມານ 1 ແສນຄົນທີ່ຕ້ອງກາຍເປັນຄົນບໍ່ມີເຮືອນຢູ່ ຫຼັງຍີ່ປຸ່ນປະສົບເຫດແຜ່ນດິນໄຫວແມກນິຈູດ 7,3 ໃນແຂວງຄຸມາໂມໂຕະ
ປະຊາຊົນຫຼາຍຄົນທຳການອົບພະຍົບພາຍຫລັງທີ່ບ້ານເຮືອນຂອງຕົນໄດ້ຮັບຄວາມເສຍຫາຍແລະຖືກທຳລາຍຈາກແຜ່ນດິນໄຫວ ພວກເຂົາຈຳເປັນຕ້ອງນອນໃນທີ່ພັກຊົ່ວຄາວ ຫຼື ອາໄສໃນສູນລີ້ໄພ ຂະນະທີ່ສື່ລາຍງານເຖິງບັນຫາການສົ່ງມອບອາຫານ ແລະສິ່ງຂອງຈຳເປັນອື່ນໆ
ຊ່ອງໂທລະພາບຟູຈິລາຍງານວ່າ ປະຊາຊົນປະມານ 1 ແສນຄົນ ຕັດສິນໃຈອາໄສຢູ່ໃນລົດຂອງຕົນທີ່ຈອດໃນເດີ່ນຈອດລົດຂອງເມືອງ ແຕ່ຍັງບໍ່ມີຝ່າຍໃດດຳເນີນການສົ່ງມອບສິ່ງຂອງຈຳເປັນໃຫ້ເນື່ອງຈາກຍັງບໍ່ຖືກລົງທະບຽນໃນຖານະບ່ອນລີ້ໄພ
ຂະນະທີ່ອາສາສະໝັກ ແລະທະຫານອອກສົ່ງມອບສິ່ງຂອງຈຳເປັນ ແລະນໍ້າລວມ 6 ຄັນໃຫ້ໂຮງໝໍແຫ່ງໜຶ່ງໃນແຂວງຄຸມາໂມໂຕະ ຫຼັງຈາກທ່ານໝໍເທເຄຊິ ຮາຊຸດາ ຂຽນຜ່ານເຟສບຸກວ່າ ນໍ້າ ແລະອາຫານສຳລັບຄົນເຈັບບໍ່ພຽງພໍ ດ້ານນາຍົກເທສະມົນຕີຄຸມາໂມໂຕະ ຄາຊຸຟຸມິ ໂອນິຊິ ທະວິດຂໍ້ຄວາມຂໍອະໄພໃນຄວາມຫຼ້າຊ້າ ແລະຮຽກຮ້ອງໃຫ້ປະຊາຊົນອົດທົນ ພ້ອມສັນຍາວ່າຈະມີການແກ້ໄຂສະຖານະການໃຫ້ໄວທີ່ສຸດ.