ສຳນັກຂ່າວເອພີລາຍງານເມື່ອວັນທີ 18 ເມສາ ນາງຄາເມນ ຄາສຕິລໂລ ລັດຖະມົນຕີກະຊວງສາທາລະນະສຸກຊີວີຖະແຫລງ ພົບຍຸງສາຍພັນທີ່ເປັນພາຫະເຊື້ອໄວຣັສຊີກາໃນແຜ່ນດິນໃຫຍ່ຂອງປະເທດເປັນຄັ້ງທຳອິດໃນຮອບ 60 ປີ.
ນາງຄາສຕິລໂລ ເປີດເຜີຍວ່າ ຂະນະນັກວິທະຍາສາດຊີ້ກວດພົບຕົວຢ່າງຍຸງລາຍບ້ານ (Aedes aegypti mosquito) ໃນເມືອງອາຣິກາ ແລະຖືເປັນການກວດພົບຍຸງລາຍຄັ້ງທຳອິດໃນແຜ່ນດິນໃຫຍ່ຂອງປະເທດຕັ້ງແຕ່ປີ ຄສ 1960 ເຮັດໃຫ້ຕ້ອງມີຄວາມລະມັດລະວັງຫລາຍຂຶ້ນ.
ກ່ອນໜ້ານີ້ ຊີລີກວດພົບຍຸງລາຍບ້ານເທິງເກາະອິສເຕີຂອງປະເທດທີ່ຢູ່ຫ່າງໄກໃນທະເລປາຊີຟິກ ແຕ່ບໍ່ແມ່ນແຜ່ນດິນໃຫຍ່ທີ່ມີສະພາບແວດລ້ອມເຕັມໄປດ້ວຍພູ ແລະທະເລຊາຍຈົນເຮັດໃຫ້ບໍ່ມີຍຸງຫຼາຍປານໃດ.
ທັງນີ້ ໄວຣັສຊີກາທີ່ສາມາດແພ່ຜ່ານຍຸງລາຍບ້ານ ແລະຕິດຕໍ່ທາງເພດສຳພັນມີຄວາມເຊື່ອມໂຍງຕໍ່ພາວະຫົວນ້ອຍທີ່ພົບໃນເດັກເກີດໃໝ່ຜູ້ຕິດເຊື້ອລະຫວ່າງຢູ່ໃນທ້ອງມານດາ ພາວະດັ່ງກ່າວເຮັດໃຫ້ຫົວຂອງເດັກນ້ອຍມີຂະໜາດນ້ອຍກວ່າປົກກະຕິ ແລະກະທົບຕໍ່ພັດທະນາການສະໝອງ ນອກຈາກນີ້ ຊີກາຍັງມີຄວາມເຊື່ອມໂຍງຕໍ່ກຸ່ມອາການກິລແລງ-ບາເຣທີ່ເຮັດໃຫ້ເສັ້ນປະສາດອັກເສບແບບກະທັນຫັນ.