ຂປລ. ໃນວັນທີ 4 ເມສາ ນີ້ ຢູ່ກະຊວງປ້ອງກັນຄວາມສະຫງົບ ໄດ້ຈັດພິທີໂຮມຊຸມນຸມສະເຫລີມ ສະຫລອງວັນສ້າງຕັ້ງກໍາລັງປ້ອງກັນຄວາມສະຫງົບ ຄົບຮອບ 55 ປີ (5/4/1951-5/4/2016) ເພື່ອເປັນການຫວນຄືນມູນເຊື້ອ ແລະ ຜົນງານອັນໃຫຍ່ຫລວງຂອງກໍາລັງ ປກສ ຕະຫລອດໄລຍະ 55 ປີ ຜ່ານມາ ໃຫ້ກຽດເຂົ້າຮ່ວມໂດຍ ສະຫາຍ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານສູນກາງພັກປະ ຊາຊົນປະຕິວັດລາວ, ຮອງປະທານປະເທດ, ສະຫາຍພົນຕີ ສົມແກ້ວ ສີລາວົງ ເລຂາທິການສູນກາງພັກ, ລັດຖະມົນຕີກະຊວງປ້ອງກັນຄວາມສະຫງົບ, ມີບັນດາກົມການ ເມືອງສູນ ກາງພັກ, ກໍາມະການສູນກາງພັກ, ຮອງລັດຖະມົນຕີກະຊວງປ້ອງກັນຄວາມສະຫງົບ, ນາຍ ແລະ ພົນຕໍາຫລວດ ພ້ອມດ້ວຍບັນດາຜູ້ຕາງໜ້າຈາກອົງການຈັດຕັ້ງມະຫາຊົນເຂົ້າຮ່ວມ.
ສະຫາຍ ພົນຕີ ສົມແກ້ວ ສິລາວົງ ໄດ້ຍົກໃຫ້ເຫັນການເຕີບໃຫຍ່ຂະຫຍາຍຕົວຂອງກໍາລັງ ປກສ ຕະຫລອດໄລຍະ 55 ປີຜ່ານມາ ເຊິ່ງກໍາລັງປ້ອງກັນຄວາມສະຫງົບ ເປັນພາຫະນະອັນແຫລມຄົມ, ເປັນ ກໍາລັງທີ່ໄວ້ເນື້ອເຊື່ອໃຈ, ເປັນກໍາລັງຫລັກແຫລ່ງແກ່ນສານໃນການປະຕິບັດແນວທາງ ປກຊ–ປກສ ທົ່ວປວງຊົນຮອບດ້ານຂອງພັກ, ຮັບປະກັນຄວາມໝັ້ນຄົງພາຍໃນຊາດ, ສະກັດກັ້ນ ແລະ ຕ້ານທຸກເລ້ຫລ່ຽມ ກົນອຸບາຍຂອງພວກອິດທິກໍາລັງປໍລະປັກ ທີ່ຫວັງທໍາລາຍມ້າງເພ, ແບ່ງແຍກ, ສ້າງຄວາມປັ່ນປ່ວນກໍ່ ຄວາມບໍ່ສະຫງົບ ແລະ ຮັກສາຄວາມເປັນລະບຽບຮຽບຮ້ອຍຂອງສັງຄົມ, ປ້ອງກັນການນໍາພັກ–ລັດ, ແຂກພາຍໃນ ແລະ ຕ່າງປະເທດ, ກອງປະຊຸມລະດັບຊາດ ແລະ ສາກົນ ໃຫ້ມີຄວາມປອດໄພ, ຕອບສະໜອງກັບຄວາມຮຽກຮ້ອງຕ້ອງການ ຂອງພາລະກິດຕໍ່ສູ້ປົດປ່ອຍຊາດໃນເມື່ອກ່ອນ ແລະ ພາລະກິດປົກປັກຮັກສາ ແລະ ສ້າງສາພັດທະນາປະເທດຊາດໃນປັດຈຸບັນ.
ໃນໂອກາດນີ້, ສະຫາຍ ບຸນຍັງ ວໍລະຈິດ ໄດ້ໃຫ້ກຽດໂອ້ລົມ ຍ້ອງຍໍຊົມເຊີຍຄະນະພັກ, ນາຍ ແລະ ພົນຕໍາຫລວດຂອງກໍາລັງ ປກສ ທີ່ສາມາດຍາດໄດ້ຜົນງານ ແລະ ໄຊຊະນະອັນພົ້ນເດັ່ນໃນຫລາຍດ້ານ ເຊິ່ງເປັນການສ້າງເງື່ອນໄຂອໍານວຍຄວາມສະດວກ ໃຫ້ແກ່ປະຊາຊົນບັນດາເຜົ່າ ທຸກ ຊັ້ນຄົນ ກໍຄື ບັນດາພາກສ່ວນເສດຖະກິດ, ນັກລົງທຶນ, ນັກທ່ອງທ່ຽວທັງພາຍໃນ ແລະ ຕ່າງປະເທດ ໄດ້ທໍາມາຫາກິນ ເຄື່ອນໄຫວເຮັດການຜະລິດ–ທຸລະກິດ ດ້ວຍຄວາມອຸ່ນອ່ຽນ ປະກອບສ່ວນອັນສໍາຄັນ ເຂົ້າໃນການພັດທະນາເສດຖະກິດ–ສັງຄົມຂອງປະເທດ, ຮັບປະກັນໃຫ້ຄວາມປອດໄພໃຫ້ແກ່ກອງ ປະຊຸມທີ່ສໍາຄັນ ກໍຄືການສະເຫລີມສະຫລອງວັນບຸນສໍາຄັນ ທີ່ມີຄວາມໝາຍສໍາຄັນທາງປະຫວັດສາດ ແລະ ຂອງຊາດ, ພ້ອມນີ້ ສະຫາຍ ບຸນຍັງ ວໍລະກິດ ຍັງໄດ້ເນັ້ນໃຫ້ກໍາລັງປ້ອງກັນຄວາມສະຫງົບ ສືບຕໍ່ເອົາໃຈໃສ່ປັບປຸງ ແລະ ເພີ່ມທະວີຄວາມສາມັກຄີຢູ່ພາຍໃນ ຕິດພັນກັບການເອົາໃຈໃສ່ສຶກ ສາອົບຮົມການເມືອງແນວຄິດ, ປັບປຸງລະບຽບວິໄນ, ເຊີດຊູສະຕິລະວັງຕົວ ແລະ ກຽມພ້ອມສູ້ຮົບ ພ້ອມທັງຕັດສິນໃຈຕີຖອຍປະກົດການຫຍໍ້ທໍ້ ຢູ່ພາຍໃນຖັນແຖວກໍາລັງປ້ອງກັນຄວາມສະຫງົບ, ສ້າງສັດທາ ແລະ ຄວາມເຊື່ອໝັ້ນຈາກປະຊາຊົນຢ່າງໜັກແໜ້ນ, ສືບຕໍ່ປະຕິບັດຍຸດທະສາດ ຫັນລົງກໍ່ສ້າງ ຮາກຖານການເມືອງຢ່າງແຂງແຮງ, ສືບຕໍ່ປັບປຸງ ແລະ ກໍ່ສ້າງກໍາລັງປ້ອງກັນຄວາມສະຫງົບ ປະຊາຊົນໃຫ້ມີຄຸນນະພາບໃໝ່, ເອົາໃຈໃສ່ແກ້ໄຂຊີວິດການເປັນຢູ່ຂອງພະນັກງານ–ນັກຮົບ ທັງສາມາດແກ້ໄຂດ້ານພະລາທິການກັບທີ່ ດ້ວຍການຈັດຕັ້ງເພີ່ມພູນຜະລິດຜົນ ເພື່ອຮັບປະກັນເບີ່ງແຍງກໍາລັງເປັນຢ່າງດີ, ຕ້ອງຍືດໝັ້ນແນວທາງການຕ່າງປະເທດສັນຕິພາບ, ມິດຕະພາບ ແລະ ການຮ່ວມມືຢ່າງສະເໝີຕົ້ນສະເໝີປາຍ, ສືບຕໍ່ຮັດແໜ້ນຄວາມສາມັກຄີສາຍພົວພັນແບບພິເສດ ແລະ ການຮ່ວມມືຮອບດ້ານກັບ ສສ ຫວຽດນາມ, ເພີ່ມທະວີມິດຕະພາບ ແລະ ການພົວພັນເປັນຄູ່ຮ່ວມມືຍຸດທະສາດຮອບ ດ້ານກັບ ສປ ຈີນ, ຮັດແໜ້ນສາຍພົວພັນຮ່ວມມື ກັບບັນດາປະເທດທີ່ມີຊາຍແດນຕິດຈອດກັບສປປ ລາວ, ບັນດາປະເທດອາຊຽນ ແລະ ປະເທດເພື່ອມິດສາກົນອື່ນໆ.
ໃນໂອກາດດຽວກັນນິ້, ສະຫາຍ ບຸນຍັງ ວໍລະຈິດ ໄດ້ໃຫ້ກຽດມອບຫລຽນໄຊແຮງງານຊັ້ນ I ໃຫ້ກະຊວງປ້ອງກັນຄວາມສະຫງົບ ແລະ ມອບຫລຽນໄຊແຮງງານຊັ້ນ II ໃຫ້ກົມກອງຈໍານວນ 9 ກົມກອງ ແລະ ຫລຽນໄຊແຮງງານຊັ້ນ III ໃຫ້ກົມກອງ ຈໍານວນ 27 ກົມກອງຕື່ມອີກ.
ແຫລ່ງຂ່າວ:
