ສຳນັກຂ່າວຕ່າງປະເທດ ລາຍງານໃນວັນທີ 24 ມີນາຜ່ານມານີ້ວ່າ ລັດຖະສະພາມຽນມາ ໄດ້ລົງມະຕິຮັບຮອງ ຄະນະລັດຖະບານມຽນມາຊຸດໃໝ່ ທີ່ນຳສະເໜີໂດຍ ທ່ານ ຖິ່ນຈໍ (Htin Kyaw) ປະທານາທິບໍດີມຽນມາ ໂດຍປະກອບມີລັດຖະມົນຕີທັງໝົດ 18 ຄົນ ຊຶ່ງໃນນັ້ນປະກອບມີສະມາຊິກສະພາ ສັງກັດພັກສະຫະພາບເພື່ອການພັດທະນາ ແລະ ຄວາມປອງດອງ (Union Solidarity and Development Party) ຊຶ່ງເປັນພັກການເມືອງຂອງຝ່າຍທະຫານ ລວມຢູ່ຢ່າງໜ້ອຍ 1 ຄົນ ແລະ ເມື່ອລວມກັບລັດຖະມົນຕີ ທີ່ນຳສະເໜີໂດຍກອງທັບອີກ 3 ຄົນ ເຮັດໃຫ້ພາຍໃນຄະນະລັດຖະບານຊຸດໃໝ່ນີ້ ມີລັດຖະມົນຕີທີ່ເປັນຝ່າຍທະຫານ ລວມຢູ່ນຳ 4 ຄົນ, ນອກຈາກນັ້ນ ແມ່ນເປັນຄົນຂອງພັກສັນນິບາດຊາດ ເພື່ອປະຊາທິປະໄຕ ຫລື NLD ທີ່ມີ ນາງ ອອງ ຊານ ຊູຈີ ເປັນຜູ້ນຳ.

ກ່ອນໜ້ານີ້ ປະທານາທິບໍດີ ຖິ່ນຈໍ ແຫ່ງ ສະຫະພາບສາທາລະສະລັດມຽນມາ ໄດ້ປະກາດຍຸບກະຊວງ ພາຍໃນລັດຖະບານລົງ ຈຳນວນ 15 ກະຊວງ ໃຫ້ເຫລືອພຽງ 21 ກະຊວງ ໂດຍໃຫ້ເຫດຜົນວ່າ ບັນດາກະຊວງໃນເມື່ອກ່ອນ ເຮັດວຽກງານຊ້ຳຊ້ອນກັນ ແລະ ການຫລຸດຈຳນວນກະຊວງລົງ ຈະເຮັດໃຫ້ການບໍລິຫານ ມີປະສິດທິພາບຫລາຍຂຶ້ນ ແລະ ຍັງຊ່ວຍປະຢັດງົບປະມານ ໃນສ່ວນເງິນເດືອນຂອງລັດຖະມົນຕີ ໄດເຖິງ 4 ລ້ານໂດລາ ຕະຫລອດວາລະ 5 ປີຂ້າງໜ້າອີກດ້ວຍ.