ສຳນັກງານຂໍ້ມູນຕ້ານການຟອກເງິນທະນາຄານແຫ່ງສປປລາວໄດ້ຈັດຕັ້ງກອງປະຊຸມເຜີຍແຜ່ແລະຖອດຖອນບົດຮຽນການຈັດຕັ້ງປະຕິບັດວຽກງານວ່າດ້ວຍການຕ້ານການຟອກເງິນແລະການສະໜອງທຶນໃຫ້ແກ່ການກໍ່ການຮ້າຍ ( AML/CFT ) ຊຶ່ງໄດ້ຈັດຂຶ້ນລະຫວ່າງວັນທີ 16 – 17 ມີນາ 2016 ທີ່ນະຄອນຫຼວງວຽງຈັນໂດຍການໃຫ້ກຽດເປັນປະທານຂອງທ່ານນາງແພງສີແພງເມືອງຮັກສາການຫົວໜ້າສຳນັກງານຂໍ້ມູນຕ້ານການຟອກເງິນແລະມີຄະນະນຳ-ຕົວແທນຈາກບັນດາທະນາຄານທຸລະກິດແລະສະຖາບັນການເງິນເຂົ້າຮ່ວມ.
ກອງປະຊຸມໃນຄັ້ງນີ້ ໄດ້ມີການຖອດຖອນບົດຮຽນໃນການຈັດຕັ້ງປະຕິບັດວຽກງານການຕ້ານການຟອກເງິນແລະການສະໜອງທຶນໃຫ້ແກ່ການກໍ່ການຮ້າຍຂອງທະນາຄານທຸລະກິດແລະສະຖາບັນການເງິນ, ກົດໝາຍວ່າດ້ວຍການຕ້ານການຟອກເງິນແລະການສະໜອງທຶນໃຫ ້ແກ່ການກໍ່ການຮ້າຍ, ( ຮ່າງ ) ຂໍ້ຕົກລົງວ່າດ້ວຍມາດຕະການທາງບໍລິຫານຕໍ່ຜູ້ທີ່ລະເມີດກົດໝາຍວ່າດ້ວຍການຕ້ານການຟອກເງິນແລະການສະໜອງທຶນໃຫ້ແກ່ການກໍ່ການຮ້າຍ; ຂໍ້ຕົກລົງວ່າດ້ວຍການລາຍງານທຸລະກຳເງິນສົດທີ່ມີມູນຄ່າເກີນກຳນົດ; ຂໍ້ຕົກລົງວ່າດ້ວຍການຊອກຮູ້ລູກຄ້າແລະເພີ່ມທະວີການເອົາໃຈໃສ່ລູກຄ້າ; ຄຳແນະນຳວ່າດ້ວຍການລາຍງານທຸລະກຳທີ່ໜ້າສົງໄສວ່າເປັນການຟອກເງິນຫຼືສະໜອງທຶນໃຫ້ແກ່ການກໍ່ການຮ້າຍ; ຄຳແນະນຳວ່າດ້ວຍຕົວຊີ້ບອກຂອງທຸລະກຳທີ່ສົງໃສວ່າເປັນການຟອກເງິນຫຼືສະໜອງທຶນໃຫ້ແກ່ການກໍ່ການຮ້າຍ; ຂັ້ນຕອນແລະວິທີການລາຍງານ (STR/CTR) ທີ່ນຳສະເໜີໂດຍທ່ານ ດຣ. ເວີນສະຫວັນສີວິໄຊຮອງຫົວໜ້າສຳນັກງານຂໍ້ມູນຕ້ານການຟອກເງິນ.
ທ່ານຮອງຫົວໜ້າສຳນັກງານຂໍ້ມູນຕ້ານການຟອກເງິນໄດ້ຢືນຢັນວ່າ: ກອງປະຊຸມດັ່ງກ່າວເພື່ອທົບທວນແລະຖອດຖອນບົດຮຽນການຈັດຕັ້ງປະຕິບັດວຽກງານວ່າດ້ວຍການຕ້ານການຟອກເງິນແລະການສະໜອງທຶນໃຫ້ແກ່ການກໍ່ການຮ້າຍຂອງທະນາຄານທຸລະກິດແລະສະຖາບັນການເງິນໃນໄລຍະຜ່ານມາ, ຄືດັ່ງທີ່ຮູ້ແລ້ວວ່າ: ກົດໝາຍວ່າດ້ວຍການຕ້ານການຟອກເງິນແລະການສະໜອງທຶນໃຫ້ແກ່ການກໍ່ການຮ້າຍໄດ້ຖືກຮັບຮອງແລະປະກາດໃຊ້ໃນ 1 ປີຜ່ານມາເຫັນໄດ້ວ່າ: ໂດຍພື້ນຖານທະນາຄານທຸລະກິດແລະສະຖາບັນການເງິນໄດ້ເອົາໃຈໃສ່ຢ່າງຈິງຈັງໃນການຕ້ານແລະສະກັດກັ້ນການຟອກເງິນແລະການສະໜອງທຶນໃຫ້ແກ່ການກໍ່ການຮ້າຍໂດຍສະເພາະບັນດາທະນາຄານທຸລະກິດໄດ້ມີນະໂຍບາຍກ່ຽວກັບວຽກງານຕ້ານການຟອກເງິນແລະການສະໜອງທຶນໃຫ້ແກ່ການກໍ່ການຮ້າຍ, ມີລະບຽບຄູ່ມືກ່ຽວກັບການຊອກຮູ້ລູກຄ້າ, ການເພີ່ມທະວີເອົາໃຈໃສ່ລູກຄ້າ, ມີການແຕ່ງຕັ້ງເຈົ້າໜ້າທີ່ທີ່ມີໜ້າທີ່ລາຍງານ, ມີການທົບທວນລູກຄ້າ, ມີການປະເມີນຄວາມສ່ຽງຂອງຕົນ, ມີການກວດກາພາຍໃນ, ມີການລາຍງານທຸລະກຳທີ່ສົງໄສວ່າເປັນການຟອກເງິນແລະມີລະບົບ IT ກ່ຽວກັບການຕ້ານການຟອກເງິນແລະການສະໜອງທຶນໃຫ້ແກ່ການກໍ່ການຮ້າຍ.
ທ່ານ ດຣ. ເວີນສະຫວັນ ສີວິໄຊ ໄດ້ສະຫຼຸບເບື້ອງມະຫາພາກຊຶ່ງຜ່ານມາແມ່ນໄດ້ອອກກົດໝາຍ 1 ສະບັບແລະນິຕິກຳລຸ່ມກົດໝາຍ 18 ສະບັບຊຶ່ງບັນດານິຕິກຳຕ່າງໆແມ່ນຖືກຕ້ອງສອດຄ່ອງກັບມາດຕະຖານສາກົນແລະສະພາບແວດລ້ອມຂອງປະເທດເຮົາ, ນອກຈາກນັ້ນບັນດາພາກສ່ວນທີ່ກ່ຽວຂ້ອງກໍໄດ້ເອົາໃຈໃສ່ເປັນຢ່າງດີໃນການປະສານງານແລະຮ່ວມມືກັບສຳນັກງານຂໍ້ມູນຕ້ານການຟອກເງິນໃນການຈັດຕັ້ງປະຕິບັດກົດໝາຍແລະນິຕິກໍກົດໝາຍ ວ່າດ້ວຍການຕ້ານການຟອກເງິນ ແລະການສະໜອງທຶນໃຫ້ແກ່ການກໍ່ການຮ້າຍ.
ທີ່ມາ: