ນໍ້າປະປາໄຫລບໍ່ດວກໃນລະດູແລ້ງເປັນບັນຫາຕ້ອງແກ້ໄຂຮີບດ່ວນ
ນໍ້າປະປາມາບໍ່ສະດວກຍັງເປັນບັນຫາຊໍາເຮື້ອໃນບາງເຂດຢູ່ນະຄອນຫລວງວຽງຈັນ ຂະນະທີ່ລັດວິສາຫະກິດນໍ້າປະປານະຄອນຫລວງຢືນຢັນຈະສູ້ຊົນຂະຫຍາຍລະບົບນໍ້າປະປາເພີ່ມຂຶ້ນເພື່ອຮັບປະກັນການສະໜອງນໍ້າໃຫ້ຜູ້ບໍລິໂພກພຽງພໍ. ປັດຈຸບັນນີ້ ລັດວິສາຫະກິດນໍ້າປະປານະຄອນຫລວງວຽງສາມາດຜະລິດນໍ້າປະປາໄດ້ປະມານ 300.000 ແມັດກ້ອນຕໍ່ມື້ໃນຂົງເຂດນະຄອນຫລວງວຽງຈັນ ໃນນັ້ນ ໂຮງງານຜະລິດນ້ຳຈີ່ນາຍໂມ້ມີກຳລັງການຜະລິດນໍ້າໄດ້ 80.000 ແມັດກ້ອນ/ ມື້; ໂຮງງານຜະລິດນ້ຳເກົ້າລ້ຽວມີກຳລັງການຜະລິດນໍ້າໄດ້ 60.000 ແມັດກ້ອນ/ ມື້ ;ໂຮງງານນໍ້າປະປາດົງໝາກຄາຍມີກໍາລັງການຜະລິດ100.000 ແມັດກ້ອນ/ ມື້ ແລະ ໂຮງງານດົງບັງມີກໍາລັງການຜະລິດແມ່ນ 20.000 ກ້ອນ/ມື້ ພ້ອມນີ້ ລັດວິສາຫະກິດນໍ້າປະປາດັ່ງກ່າວຍັງວາງວິໃສທັດໄວ້ວ່າ: ຈະສູ້ຊົນສະໜອງ ແລະ ບໍລິການນໍ້າປະປາທີ່ສະອາດດ້ວຍຮູບການແບບວິສາຫະກິດທີ່ມີຄວາມເຂັ້ມແຂງ ແລະ ໝັ້ນຄົງທາງດ້ານການເງິນ, ມີຄວາມສາມາດເພີ່ມກໍາລັງການຜະລິດ ແລະ ຂະຫຍາຍຂອບການສະໜອງນໍ້າປະປາທີ່ມີຄຸນນະພາບໃຫ້ພຽງພໍເພື່ອຮອງຮັບການພັດທະນາ ແລະ ການເຕີບໂຕຂອງຕົວເມືອງແຕ່ນີ້ຫາປີ 2020ໃຫ້ 80-90% ຂອງຈໍານວນປະຊາກອນທີ່ດໍາລົງຊີວິດໃນຂອບເຂດທົ່ວນະຄອນຫລວງວຽງຈັນ.
ແຕ່ຄວາມເປັນຈິງນັ້ນເຫັນວ່າການສະໜອງນໍ້າໃຫ້ປະຊາຊົນໃນບາງບ້ານ ແລະ ບາງເຂດຢູ່ນະຄອນຫລວງວຽງຈັນຍັງບໍ່ພຽງພໍກັບຄວາມຕ້ອງການໂດຍສະເພາະໃນລະດູແລ້ງ ເນື່ອງຈາກວ່າໄລຍະນີ້ເປັນເວລາທີ່ມີຄົນໃຊ້ນໍ້າຫລາຍເປັນພິເສດ. ນາງ ນ້ອຍ ນັກສຶກສາ ອາໃສຢູ່ຫໍພັກຊິເກມຂອງມະຫາວິທະຍາໄລແຫ່ງຊາດດົງໂດກເປີດເຜີຍວ່າ: ຕົນເອງອາໃສຢູ່ຫໍພັກມະຫາໄລແຫ່ງຊາດນີ້ແຕ່ປີທີ ຫາ ປີທີ 5 ເຫັນວ່ານໍ້າປະປາບໍ່ມັກໃນຍາມກາງວັນ ແຕ່ກາງຄືນນໍ້າຈິ່ງໄຫລສະດວກດີ ພ້ອມນີ້ໄຟຟ້າກໍມັກດັບເປັນໄລຍະໆ ໂດຍບໍ່ຮູ້ສາຍເຫດ ນີ້ເຫດການເກີດຂຶ້ນບໍ່ພຽງແຕ່ຢູ່ຫໍພັກເທົ່ານັ້ນ ຫາກລວມເຮືອນພັກຄູອາຈານກໍເຊັນກັນ. ສະນັ້ນ ສຶກສາສ່ວນໃຫຍ່ບໍ່ມັກຢູ່ຫໍພັກໃນວັນເສົາ-ວັນທິດ ແລະ ຕ້ອງໄປຢູ່ເຮືອນຍາດຕິພີ່ນ້ອງແທນເພາະບໍ່ມີນໍ້າອາບນໍ້າໃຊ້ ເຊິ່ງກະທົບບໍ່ໜ້ອຍ. ນັກສຶກສາຈໍານວນໜຶ່ງຊີ້ແຈງວ່າ: ວັນເສົາ-ວັນທິດແທນຈະໄດ້ຊັກເຄື່ອງນຸ່ງຫົ່ມ, ແຕ່ງຢູ່ຄົວກິນກັບໝູ່ເພື່ອນຢູ່ຫໍພັກເພື່ອປະຫຍັດລາຍຈ່າຍ ແຕ່ຊ້ຳພັດໄດ້ອອກໄປກິນເຂົ້າຢູ່ນອກຫໍພັກ. ແມ່ຕູ້ໃບ ເປັນປະຊາຊົນບ້ານສະຟັງມຶກ ເມືອງໄຊທານີນະຄອນຫລວງວຽງຈັນເວົ້າວ່າ: ລະຫວ່າງເດືອນເມສາ ຫາ ເດືອນມິຖະນາຂອງ ທຸກໆປີນໍ້າປະປາມາບໍ່ສະດວກໃນຍາມກາງເວັນ ແຕ່ຂ້ອນແຈ້ງ 2-3ໂມງເຊົ້ານໍ້າຈິ່ງມາສະດວກດີ ສະນັ້ນຕົນເອງເປັນຄອບຄົວໃຫຍ່ ແລະ ມີລາຍຮັບໜ້ອຍບໍ່ມີເງິນຫລາຍທີ່ຈະເຮັດອ່າງກັກເກັບນໍ້າໄວ້ຄືເພີ່ນ ຍິ່ງກວ່ານັ້ນຄ່າໄຟຟ້າ-ນໍ້າປະປາກໍຍິ່ງຂຶ້ນນັບມື້ ບາງຄັ້ງຫາເງິນກໍພໍແຕ່ຈ່າຍອາຫານການກິນເກືອບຈະບໍ່ລອດແລ້ວ. ສະນັ້ນຮຽກຮ້ອງໃຫ້ພາກສ່ວນກ່ຽວຂ້ອງຄວນເບິ່ງໃນການພັດທະນາ ແລະ ສະ ຫຍາຍລະບົບນໍ້າປະປາໂດຍສະເພາະການປ່ຽນຖ່າຍທໍ່ນໍ້າຂະໜາດນ້ອຍໃຫ້ໃຫຍ່ຂຶ້ນກວ່າເກົ່າໄປຄວບຄູ່ກັບນະໂຍບາຍຜ່ອນຜັນສໍາລັບຄົນທຸກຍາກ ຫລື ພະນັກງານຄວນໃຫ້ຈ່າຍຕໍ່າກວ່າພາກສ່ວນທຸລະກິດ. ຕູ້ໃບຍັງກ່າວວ່າ: ຜ່ານມາເຫັນແຕ່ຂ່າວອອກໂທລະພາບວ່າຂະຫຍາຍສະຖານີນໍ້າປະປາ ແລະ ເປີດນໍາໃຊ້ສະຖານີນໍ້າປະປາແຫ່ງໃໝ່ເລື້ອຍໆ ແຕ່ປະກົດວ່ານໍ້າປະປາຄືບໍ່ແຮງ ແລະ ບໍ່ໄດ້ວ່ອງໄວຄືອອກຂ່າວ.
ແຫລ່ງຂ່າວຈາກ: Pathedlao Lao