ເພື່ອເຮັດໃຫ້ວຽກງານສະກັດກັ້ນ ແລະຕ້ານອັກຄີໄພພາຍໃນແຂວງບໍລິຄຳໄຊ ມີຄວາມສະຫງົບທາງດ້ານການ ເມືອງ ແລະ ຄວາມເປັນລະບຽບຮຽບຮ້ອຍທາງສັງຄົມ, ມີຄວາມປອດໄພທາງດ້ານອັກຄີໄພຮັກສາແລະຈຳກັດໄດ້ຜົນເສຍຫາຍທາງດ້ານຊັບສີນຂອງລັດ, ເອກະຊົນ, ພົນລະເມືອງໃຫ້ຫຼຸດໜ້ອຍຖອຍລົງເທື່ອລະກ້າວ.
ໃນວັນທີ 1-4 ມີນາ 2016 ຜ່ານມາ, ທີມງານໂຄສະນາໂຄງການສະກັດກັ້ນ ແລະຕ້ານອັກຄີໄພ ປກສ ແຂວງ ບໍລິຄຳ ໄຊໄດ້ສືບຕໍ່ລົງເຄື່ອນໄຫວໂຄສະນາວຽກງານດັ່ງກ່າວໃຫ້ແກ່ຮ້ານຂາຍລົດສະຕາປາກຊັນ, ຮ້ານຂາຍລົດໃຫຍ່ສົມ ຍົດໄຊຍະສິດ ແລະບໍລິສັດສະຕາໂທລະຄົມຈຳກັດ (ສາຂາແຂວງບໍລິຄຳໄຊ), ນຳພາໂດຍທ່ານ ພັນຕີ ແຂກ ພົມມະກົດ ຮອງພະແນກຕຳຫຼວດສະກັດກັ້ນ ແລະ ຕ້ານອັກຄີໄພ ປກສ ແຂວງ, ເປັນກຽດເຂົ້າຮ່ວມ ທ່ານ ສາລີ ວົງທະຈັກ ເຈົ້າຂອງຮ້ານຂາຍລົດສະຕາປາກຊັນ, ທ່ານ ນາງ ດາວວອນ ເພັດສານຸພົນ ອຳນວຍການບໍລິສັດສະຕາໂທລະຄົມຈຳກັດ (ສາ ຂາແຂວງບໍລິຄຳໄຊ), ທ່ານ ສົມຍົດ ໄຊຍະສິດ ມີບັນດາທ່ານຫົວໜ້າບໍລິສັດ, ເຈົ້າຂອງທຸລະກິດພາກສ່ວນດັ່ງກ່າວພ້ອມດ້ວຍພະນັກງານເຂົ້າຮ່ວມ.
ທ່ານ ພັນຕີ ແຂກ ພົມມະກົດ ໄດ້ຍົກໃຫ້ເຫັນສາເຫດຂອງການເກີດອັກຄີໄພ-ໄຟໄໝ້ຊຶ່ງມັກເກີດຈາກການການໄຕ້ທູບທຽນບູຊາ, ການດັງໄຟແຕ່ງກິນແລ້ວບໍ່ດັບມອດ, ເກີດຈາກໄຟຟ້າລັດວົງຈອນ ແລະອື່ນໆ ເຮັດໃຫ້ມີຜົນເສຍຫາຍທາງດ້ານຊັບສິນ, ຊີວິດ, ສຸຂະພາບ, ບັນລະຍາຍ ແລະອະທິບາຍຄວາມຮູ້ຂັ້ນພື້ນຖານໃນການສະກັດກັ້ນ ແລະຕ້ານອັກຄີໄພຕາມອາຄານຂອງສຳນັກງານ, ອົງການເຮືອນຊານບ້ານຊ່ອງ, ຕະຫຼາດ, ເຂດ ຊຸມຊົນຕ່າງໆ ຄວນຕິດຕັ້ງລະບົບບັ້ງມອດໄຟ, ລະບົບສັນຍານເຕືອນໄຟໄໝ້ ແລະໃນເວລາເກີດເຫດໄຟໄໝ້ຕ້ອງຮີບຮ້ອນກົດປຸ່ມສັນຍານເຕືອນໄຟໄໝ້ ຫຼື ຮ້ອງເຕືອນໃຫ້ທຸກຄົນຮັບຮູ້ ແລະປິດກົງເຕີເພື່ອຕັດກະແສໄຟຟ້າ, ຈາກນັ້ນໃຫ້ໂທ ແຈ້ງເຈົ້າໜ້າທີ່ມອດໄຟ ແລະໃຊ້ບັ້ງມອດໄຟ ຫຼື ນ້ຳສີດໃສ່ບ່ອນທີ່ໄຟກຳລັງລຸກໄໝ້ໃນໄລຍະ 1-3 ແມັດເພື່ອສະກັດໄຟບໍ່ໃຫ້ໄໝ້ລາມໄປເປັນບໍລິເວນກວ້າງ, ການຊ່ວຍເຫຼືອຕົວເອງ ແລະຜູ້ເຄາະຮ້າຍ, ການເກັບກູ້ເອົາຊັບສິນທີ່ມີຄ່າອອກຈາກສະຖານທີ່ເກີດເຫດຢ່າງປອດໄພ, ການປ້ອງກັນສະຖານທີ່ເກີດເຫດເພື່ອບໍ່ໃຫ້ຄົນບໍ່ດີສວຍໂອກາດລັກເອົາຊັບສິນຕ່າງໆ ແລະອາດທຳລາຍຫຼັກຖານສຳຄັນອີກດ້ວຍ, ຈາກນັ້ນກໍ່ໄດ້ອະທິບາຍວິທີການນຳໃຊ້ບັ້ງມອດໄຟຊະນິດຕ່າງໆທີ່ເປັນອຸປະກອນມອດໄພໃນຂັ້ນຕົ້ນ, ການກວດກາລະບົບປ້ອງກັນອັກຄີໄພໃນອາຄານຫ້ອງການ, ເຮືອນຊານບ້ານຊ່ອງເຊັ່ນ: ກວດກາລະບົບບັ້ງມອດໄຟ, ລະບົບສັນຍານເຕືອນໄຟໄໝ້, ລະບົບໄຟຟ້າ ແລະລະບົບນ້ຳປະປາໃຫ້ຢູ່ໃນສະພາບປົກກະຕິພ້ອມໃຊ້ງານໄດ້ໃນເວລາເກີດເຫດໄຟໄໝ້, ຈາກນັ້ນກໍ່ໄດ້ສາທິດວິທີມອດໄຟດ້ວຍບັ້ງມອດໄຟ, ວິທີມອດໄຟຈາກຖັງແກ໊ສ ແລະວິທີມອດໄຟດ້ວຍການເອົາຜ້າຫົ່ມ ຫຼື ຜ້າແພຈຸ່ມນ້ຳເພື່ອມອດໄຟທີ່ເລີ່ມລຸກໄໝ້ໃນຂັ້ນຕົ້ນ.
ການລົງໂຄສະນາເຜີຍແຜ່ຄວາມຮູ້ຂັ້ນພື້ນຖານໃນການສະກັດກັ້ນ ແລະ ຕ້ານອັກຄີໄພໃນຄັ້ງນີ້ກໍ່ເພື່ອເປັນການ ຍົກສູງນ້ຳໃຈຄວາມຮັບຜິດຊອບຂອງພົນລະເມືອງ, ເຈົ້າຂອງທຸລະກິດຕ່າງໆ ແລະຮູ້ໄດ້ຜົນເສຍຫາຍ, ໄພອັນຕະລາຍຂອງໄຟໄໝ້ ແລະສາມາດແກ້ໄຂສະຖານະການສຸກເສີນເມື່ອເກີດເຫດໄຟໄໝ້ຂຶ້ນຕື່ມອີກ.
ຂໍ້ມູນຈາກ http://www.sedthakid.la/