ສຳນັກຂ່າວຕ່າງປະເທດ ລາຍງານໃນວັນທີ 1 ມີນາຜ່ານມານີ້ວ່າ ຈີນໄດ້ຜະລິດລົດໄຟໃຕ້ດິນແບບບໍ່ມີຄົນຂັບ ຊຶ່ງຈະຖືກນຳໄປໃຊ້ໃຫ້ບໍລິການ ຢູ່ນະຄອນຫລວງປັກກິ່ງ ຫລັງຈາກທີ່ສຳເລັດຂັ້ນຕອນ ໃນການທົດສອບປະສິດທິພາບດ້ານຕ່າງໆ.
ທ່ານ ຈຽງຈິນ ຫົວໜ້າຝ່າຍເຕັກນິກ ບໍລິສັດ CRRC ຊິງເຕົາ ຊື່ຟົງ ຊຶ່ງເປັນບໍລິສັດຜູ້ຜະລິດລົດໄຟຄວາມໄວສູງ ຂອງລັດຖະບານຈີນ ໄດ້ລະບຸວ່າ ລົດໄຟແບບໃໝ່ນີ້ ເຮັດວຽກດ້ວຍລະບົບອັດຕະໂນມັດຮ້ອຍເປີເຊັນ ສາມາດຕິດຈັກລົດໄຟ ແລ່ນ ແລະ ຈອດລົດໄຟ ທັງໝົດຜ່ານລະບົບການຄວບຄຸມໄລຍະໄກ. ພ້ອມນັ້ນ, ທ່ານຍັງໄດ້ກ່າວເສີມວ່າ ລົດໄຟແບບບໍ່ມີຄົນຂັບນີ້ ມີປະສິດທິພາບ ແລະ ຄວາມປອດໄພ ທຽບເທົ່າກັບລົດໄຟປົກກະຕິ ທີ່ມີຄົນເປັນຜູ້ຄວບຄຸມໂດຍກົງ ໂດຍມັນຈະຊ່ວຍຫລຸດຜ່ອນຄວາມຜິດພາດ ຈາກການເຮັດວຽກຂອງຄົນ ແລະ ຍັງຊ່ວຍຫລີກລ່ຽງອຸບັດເຫດ ທີ່ເກີດຂຶ້ນຈາກຄວາມອ່ອນເພຍ ແລະ ເຈັບເປັນກະທັນຫັນ ຂອງຜູ້ຂັບລົດໄຟອີກດ້ວຍ.
