ສຳນັກຂ່າວຕ່າງປະເທດ ລາຍງານໃນວັນທີ 29 ກຸມພາຜ່ານມານີ້ວ່າ ເກີດເຫດລະເບີດຂ້າຕົວຕາຍ ຢູ່ເຂດຕະຫລາດ ໂທລະສັບມືຖື ຊຶ່ງເປັນຊຸມຊົນທີ່ຢູ່ອາໄສຂອງຊາວມຸດສະລິມ ນິກາຍຊີອະ ໃຈກາງນະຄອນຫລວງແບກແດດ ປະເທດອີຣັກ ໂດຍມີຜູ້ກໍ່ເຫດ 2 ຄົນ ລົງມືໂຈມຕີ ເຮັດໃຫ້ມີຜູ້ເສຍຊີວິດຈາກເຫດການດັ່ງກ່າວ ຢ່າງໜ້ອຍ 70 ຄົນ ແລະ ບາດເຈັບອີກຫລາຍກວ່າ 100 ຄົນ ຊຶ່ງນັບເປັນເຫດລະເບີດຂ້າຕົວຕາຍ ຄັ້ງຮຸນແຮງທີ່ສຸດໃນຮອບປີ ຂອງອີຣັກ.

ຫລັງຈາກເກີດເຫດການລະເບີດດັ່ງກ່າວ ກຸ່ມລັດອິດສະລາມ ຫລື ໄອເອັສ ຊຶ່ງເປັນກຸ່ມຜູ້ນັບຖືສາສະໜາອິດສະລາມ ນິກາຍຊຸນນີ່ຫົວຮຸນແຮງ ໄດ້ອອກຖະແຫລງການ ອ້າງຢູ່ເບື້ອງຫລັງການກໍ່ເຫດ ແລະ ຕໍ່ມາ ນາຍົກລັດຖະມົນຕີ ໄຮເດີ ອັນ-ອາບາດີ ແຫ່ງ ອີຣັກ ໄດ້ອອກມາລະບຸວ່າ ເຫດລະເບີດດັ່ງກ່າວ ແມ່ນເປັນຝີມືຂອງກຸ່ມໄອເອັສ ທີ່ປະລາໄຊຕໍ່ນັກຮົບ ແລະ ທະຫານອີຣັກ ໃນສະໜາມຮົບ ເມື່ອບໍ່ດົນຜ່ານມານີ້.