ສຳນັກຂ່າວຕ່າງປະເທດ ລາຍງານໃນວັນທີ 6 ມັງກອນຜ່ານມານີ້ວ່າ ເຈົ້າໜ້າທີ່ຕຳຫລວດຈີນ ສາມາດຈັບກຸມຕົວ ຜູ້ລົງມືກໍ່ເຫດ ເຜົາລົດເມໂດຍສານ ຢູ່ເມືອງຢິນຊວນ ທາງພາກຕາເວັນຕົກສຽງເໜືອຂອງຈີນ ໃນຕອນຂ້ອນແຈ້ງຂອງວັນຈັນ ທີ 4 ມັງກອນຜ່ານມາ ຊຶ່ງຜູ້ກໍ່ເຫດຊື່ ທ້າວ ໝ່າຢົງຜິງ ອາຍຸ 34 ປີ ຊຶ່ງຖືກຈັບຕົວໄດ້ ໃນຂະນະທີ່ເຂົາກຳລັງຈະໂດດຕຶກຂ້າຕົວຕາຍ ເພື່ອໜີການຈັບກຸມ ແຕ່ເຈົ້າໜ້າທີ່ຕຳຫລວດ ໄດ້ໃຊ້ເວລາ 4 ຊົ່ວໂມງ ເພື່ອເຈລະຈາໃຫ້ມອບຕົວ ຈົນສາມາດຄວບຄຸມຕົວເຂົາໄດ້ໄດ້ ເພື່ອດຳເນີນການສືບສວນ ເຖິງແຮງຈູງໃຈໃນການກໍ່ເຫດ ແລະ ດຳເນີນຄະດີຕາມກົດໝາຍ.
ທັງນີ້ ເຫດການດັ່ງກ່າວ ໄດ້ສົ່ງຜົນເຮັດໃຫ້ມີຜູ້ເສຍຊີວິດ 17 ຄົນ ແລະ ບາດເຈັບອີກ 32 ຄົນ.
