ຂປລ. ທ່ານ ສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ, ຜູ້ຊີ້ນຳວຽກງານເສດຖະກິດ ຂົງເຂດການຜະລິດ ແລະ ຈໍລະຈອນ ໄດ້ແນະໃຫ້ກົມປູກຝັງ, ກົມລ້ຽງສັດ ແລະ ການປະມົງ ກະຊວງກະສິກຳ ແລະ ປ່າໄມ້ ລວມທັງພາກສ່ວນອື່ນໆທີ່ກ່ຽວຂ້ອງ ເລັ່ງເຈລະຈາກັບບັນດາປະເທດເພື່ອບ້ານ ໂດຍສະເພາະແມ່ນ ສສ ຫວຽດນາມ, ສປ ຈີນ ແລະ ປະເທດໄທ ເພື່ອສ້າງຂໍ້ຕົກລົງ ແລະ ສັນຍາກ່ຽວກັບສຸຂະນາໄມພືດ ແລະ ສັດ ໃຫ້ສຳເລັດໂດຍໄວ ແລ້ວຈຶ່ງດຳເນີນການເຮັດສັນຍາ ກັບປະເທດອື່ນໆ ທີ່ນອນໃນແຜນການສົ່ງ ອອກຜະລິດຕະພັນກະສິກຳຂອງປະເທດເຮົາ.
ໃນກອງປະຊຸມວຽກງານກະສິກຳ ແລະ ປ່າໄມ້ ທົ່ວປະເທດ ທີ່ຈັດຂຶ້ນເມື່ອບໍ່ດົນນີ້ ທີ່ນະຄອນຫລວງວຽງຈັນ, ທ່ານ ຮອງນາຍົກລັດຖະມົນຕີ ໄດ້ຍົກໃຫ້ເຫັນວ່າ: ການເຮັດສັນຍາ ຫລື ຂໍ້ຕົກລົງກ່ຽວກັບສຸຂະນາໄມພືດ ແລະ ສັດ ແມ່ນມີຄວາມຈຳເປັນທີ່ສຸດ ເພາະຈະເປັນການຢັ້ງຢືນ ແລະ ຮັບປະກັນເຖິງຄຸນນະພາບຂອງຜະລິດຕະພັນກະສິກຳຂອງລາວ ໃນເວລາສົ່ງອອກໄປຕ່າງປະເທດ ຍັງເປັນການສ້າງສິ່ງອຳນວຍຄວາມສະດວກ ດ້ານການຕະຫລາດໃຫ້ແກ່ຜະລິດຕະພັນກະສິກຳ. ການເຮັດສັນຍາກ່ຽວກັບສຸຂະນາໄມພືດ ແລະ ສັດ ນີ້ທຸກພາກສ່ວນກ່ຽວຂ້ອງຕ້ອງຮ່ວມກັນຈັດຕັ້ງປະຕິບັດໃຫ້ສຳເລັດໂດຍໄວ ໂດຍເລີ່ມຈາກການສ້າງກົນໄກ ແລະ ກຳນົດທິດທາງຂຶ້ນມາໃຫ້ສຳເລັດ ແລ້ວຈຶ່ງສະເໜີ ໃຫ້ຂະແໜງອຸດສາຫະກຳ ແລະ ການຄ້າດຳເນີນການກຳນົດດ້ານການຕະຫລາດ ແລະ ຄັດເລືອກເອົາບໍລິສັດມາຮ່ວມເຮັດວຽກທີ່ປິ່ນອ້ອມໂຄງການນີ້.
ແຫລ່ງຂ່າວ:
