ຂປລ. ລັດຖະບານ ສສ ຫວຽດນາມ ໄດ້ໃຫ້ທຶນຊ່ວຍເຫລືອລ້າ ເພື່ອສ້າງໂຮງໝໍມິດຕະພາບ ຢູ່ແຂວງຫົວພັນ ເຊິ່ງໂຮງໝໍດັ່ງກ່າວຈະເປັນອາຄານມາດຕະຖານ, ມີ 200 ຕຽງ, ພ້ອມອຸປະກອນການແພດທີ່ທັນສະໄໝ.
ພິທີວາງສີລາເລີກໂຄງການກໍ່ສ້າງໂຮງໝໍມິດຕະພາບ ຢູ່ແຂວງຫົວພັນ ໄດ້ຈັດຂຶ້ນໃນລະຫວ່າງວັນທີ 2-3 ມັງກອນ 2016 ນີ້ ໂດຍໃຫ້ກຽດເຂົ້າຮ່ວມຂອງທ່ານ ສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ, ຜູ້ຊີ້ນຳວຽກງານເສດຖະ ກິດການຜະລິດ ແລະ ຈໍລະຈອນ ທັງເປັນປະທານ ຄະນະກໍາມາທິການຮ່ວມມື ລາວ-ຫວຽດນາມ ແລະ ຕາງໜ້າຝ່າຍຫວຽດນາມ ແມ່ນທ່ານ ຫງວຽນ ຈີ ຢຸງ ລັດຖະມົນຕີຊ່ວຍວ່າການກະຊວງແຜນການ ແລະ ການລົງທຶນ ຫວຽດນາມ, ຮອງປະທານຄະນະກຳມາທິການຮ່ວມມື ຫວຽດນາມ-ລາວ ເຊິ່ງມີບັນດາການນຳຂອງແຂວງຫົວພັນ, ຕາງໜ້າແຂວງແຮກສ່ຽວ, ກະຊວງ-ກົມກອງ ຂອງສອງຝ່າຍ ແລະ ຄະນະກຳມາທິການຮ່ວມມື ລາວ-ຫວຽດນາມ, ຫວຽດນາມ-ລາວ ເຂົ້າຮ່ວມ.
ໃນໂອກາດດັ່ງກ່າວ, ທ່ານ ຫງວຽນ ຈີ ຢຸງ ໄດ້ເນັ້ນຄືນເຖິງຄວາມເປັນຫວ່ງເປັນໄຍ ຂອງການນຳທັງສອງປະເທດ ກ່ຽວກັບວຽກງານການດູເບິ່ງແຍງຮັກສາສຸຂະພາບ ໃຫ້ປະຊາຊົນລາວບັນດາເຜົ່າ ເຊິ່ງໂຄງການກໍ່ສ້າງໂຮງໝໍມິດຕະພາບ ຢູ່ແຂວງຫົວພັນ ມັນໄດ້ສະແດງໃຫ້ເຫັນເຖິງ ການຕັດສິນໃຈສູງຂອງສອງລັດຖະບານ ໃນການຊຸກຍູ້ການຈັດຕັ້ງປະຕິບັດແຜນຍຸດທະສາດ ການຮ່ວມມື ຫວຽດນາມ-ລາວ ຢູ່ແຂວງຫົວພັນ.
ຖ້າໂຄງການນີ້ສຳເລັດ ຂະແໜງສາທາລະນະສຸກ ກໍ່ຈະໄດ້ນຳໃຊ້ເຄື່ອງມື ແລະ ວິທະຍາສາດເຕັກນິກທາງການແພດຂັ້ນສູງ ເຂົ້າໃນການບົ່ງມະຕິພະຍາດ ແລະ ການປິນປົ່ວຄົນເຈັບ ຢູ່ພາຍໃນແຂວງ ແລະ ບັນດາແຂວງອ້ອມຂ້າງອັນຈະເປັນ ການປະກອບສ່ວນອັນໃຫຍ່ຫລວງ ເຂົ້າໃນການພັດທະນາ ເສດຖະກິດ-ສັງຄົມ ຂອງບັນດາແຂວງພາກເໜືອ.
ແຫລ່ງຂ່າວ:
