ວັນທີ 20 ທັນວາ 2013 ຜ່ານມາ ທີ່ຫໍປະຊຸມແຫ່ງຊາດ (ຫຼັກ 6) ສະຫາຍ ຈູມມາລີ ໄຊຍະສອນ ເລຂາທິການໃຫຍ່ ຄະນະບໍລິຫານງານສູນກາງພັກ ປະທານປະເທດແຫ່ງ ສປປ ລາວ ໄດ້ພົບປະໂອ້ລົມບັນດາສະຫາຍ ພະນັກງານປະຕິວັດອາວຸໂສ ໃນໂອກາດສະເຫຼີມສະຫຼອງ ວັນສ້າງຕັ້ງກອງທັບ ຄົບຮອບ 65 ປີ (20 ມັງກອນ 1949-20 ມັງກອນ 2014).
ໃນໂອກາດດັ່ງກ່າວ ສະຫາຍ ຈູມມາລີ ໄຊຍະສອນ ໄດ້ຫວນຄືນມູນເຊື້ອອັນພິລະອາດຫານ ຂອງກອງທັບປະຊາຊົນລາວ ໃນໄລຍະຕໍ່ສູ້ປົດປ່ອຍຊາດ ພາຍໃຕ້ການຊີ້ນຳໆພາຂອງພັກປະຊາຊົນປະຕິວັດລາວ ຈົນສາມາດຍາດມາໄດ້ໄຊຊະນະອັນໃຫຍ່ຫຼວງ ກໍຄືໄລຍະແຫ່ງການປະຕິບັດສອງໜ້າທີ່ຍຸດທະສາດ ກໍຄືການປົກປັກຮັກສາ ແລະ ສ້າງສາພັດທະນາປະເທດຊາດ ໃນໄລຍະໃໝ່.
ພ້ອມນັ້ນ ສະຫາຍຍັງໄດ້ກ່າວຕື່ມວ່າ: ເພື່ອເປັນການສືບຕໍ່ຈັດຕັ້ງປະຕິບັດ ຂອງບັນດາຄາດໝາຍທີ່ກອງປະຊຸມໃຫຍ່ ຄັ້ງທີ IX ຂອງພັກ ແລະ ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VII ຂອງລັດ ໃຫ້ມີຜົນສຳເລັດ ເພື່ອເຮັດໃຫ້ຂົງເຂດວຽກງານຕ່າງໆ ມີການຫັນປ່ຽນຢ່າງຈະແຈ້ງກວ່າເກົ່າ ຮັບປະກັນໃຫ້ປະເທດຊາດມີສະຖຽນລະພາບຢ່າງໜັກແໜ້ນ ສັງຄົມມີຄວາມສະຫງົບ ແລະ ຄວາມເປັນລະບຽບຮຽບຮ້ອຍ ສືບຕໍ່ຢຶດໝັ້ນການພັດທະນາເສດຖະກິດ-ສັງຄົມ ແລະ ປົກປັກຮັກສາສິ່ງແວດລ້ອມ ໃຫ້ມີຄວາມຍືນຍົງ ຮັກສາການຂະຫຍາຍຕົວທາງດ້ານເສດຖະກິດ ໃຫ້ມີຈັງຫວະຢ່າງຕໍ່ເນື່ອງ ແລະ ໝັ້ນທ່ຽງບໍ່ໃຫ້ເກີດວິກິດການ ສືບຕໍ່ແກ້ໄຂຄວາມທຸກຍາກຂອງປະຊາຊົນ ແລະ ສູ້ຊົນບັນລຸຄາດໝາຍສະຫັດສະວັດດ້ານການພັດທະນາ.
ເພື່ອບັນລຸຄາດໝາຍຕ່າງໆນັ້ນ ກອງທັບປະຊາຊົນລາວພວກເຮົາ ຕ້ອງສືບຕໍ່ປະຕິບັດຕາມທິດທາງວຽກງານຈຳນວນໜຶ່ງ ເຊັ່ນ: ເພີ່ມທະວີສຶກສາອົບຮົມການເມືອງ ນຳພາແນວຄິດຕໍ່ສະພາບການໃໝ່ ເຮັດໃຫ້ທຸກຄົນເຫັນແຈ້ງບັນດາກົນອຸບາຍ ຂອງພວກອິດທິກຳລັງປໍລະປັກ ສືບຕໍ່ລົງກໍ່ສ້າງຮາກຖານການເມືອງຢ່າງແຂງແຮງ ສືບຕໍ່ກໍ່ສ້າງກຳລັງປ້ອງກັນຊາດ ປ້ອງກັນຄວາມສະຫງົບ ທົ່ວປວງຊົນຢ່າງແຂງແຮງ ຕິດພັນກັບການພັດທະນາຊົນນະບົດຮອບດ້ານ ເອົາໃຈໃສ່ກໍ່ສ້າງກອງທັບໃຫ້ເຂັ້ມແຂງຮອບດ້ານ ໂດຍຖືເອົາຄຸນນະພາບທາງດ້ານການເມືອງ-ແນວຄິດເປັນກົກ ຖືເອົາຄວາມຮູ້ຄວາມສາມາດທາງດ້ານວິຊາສະເພາະ ຫົວຄິດປະດິດສ້າງ ແລະ ການຈັດຕັ້ງບັນຊາເປັນສິ່ງສຳຄັນ ເພີ່ມທະວີສຶກສາອົບຮົມໃຫ້ພະນັກງານນັກຮົບ ເຊື່ອມຊຶມກຳແໜ້ນໄດ້ແນວທາງການປ່ຽນແປງໃໝ່ຂອງພັກ ລະບຽບກົດໝາຍຂອງລັດ ແລະ ແນວທາງການທະຫານຂອງພັກ ເພີ່ມທະວີກໍ່ສ້າງ ແລະ ປັບປຸງພັກໃຫ້ມີຄວາມປອດໄສ ໜັກແໜ້ນເຂັ້ມແຂງທາງດ້ານການເມືອງ-ແນວຄິດ ການຈັດຕັ້ງ ແລະ ແບບແຜນນຳພາສືບຕໍ່ເອົາໃຈໃສ່ ເສີມຂະຫຍາຍມູນເຊື້ອເພິ່ງຕົນເອງ ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ ດຸໝັ່ນ-ປະຢັດ ມັດທະຍັດ ເອົາໃຈໃສ່ສືບຕໍ່ຄຸ້ມຄອງ-ປົກປັກຮັກສາອາວຸດ ພາຫະນະເຕັກນິກໃນກອງທັບ ຮັບປະກັນຄຸນນະພາບ ຍູ້ແຮງເພີ່ມພູນການຜະລິດ ເພື່ອແກ້ໄຂຊີວິດການເປັນຢູ່ໃຫ້ພະນັກງານ-ນັກຮົບ ແລະ ສ້າງລາຍຮັບໃຫ້ກັບກົມກອງ ພ້ອມນັ້ນກໍສືບຕໍ່ປະຕິບັດແນວທາງການຕ່າງປະເທດຂອງພັກ ເພີ່ມທະວີການພົວພັນຮ່ວມມືກັບບັນດາປະເທດເພື່ອນມິດ ຍຸດທະສາດ ເພື່ອປັບປຸງກໍ່ສ້າງກຳລັງ ແລະ ເປັນເຈົ້າການຍາດແຍ່ງເອົາບົດຮຽນ ແລະ ຊ່ວຍເຫຼືອນຳເພື່ອນມິດ ເພື່ອມາພັດທະນາກອງທັບໃຫ້ເຂັ້ມແຂງ.
ທີ່ມາ http://www.vientianemai.net/teen/khao/1/10842