ວັນທີ 20 ພະຈິກ 2015 ທີ່ເດີ່ນພະທາດຫຼວງ ໄດ້ຈັດພິທີເປີດງານວາງສະແດງ ແລະ ຂາຍສິນຄ້າ ເນື່ອງໃນບຸນນະມັດສະການພະທາດຫຼວງ ປະຈຳປີ 2015 ໂດຍເປັນກຽດເຂົ້າຮ່ວມຂອງທ່ານ ອາຊາງ ລາວລີ ຮອງນາຍົກລັດຖະມົນຕີ ທ່ານ ດຣ. ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ ບັນດາການນຳພັກ-ລັດ ການນຳນະຄອນຫຼວງ ທູຕານຸທູດ ອົງການຈັດຕັ້ງສາກົນປະຈຳລາວ ພະນັກງານ ແລະ ຫົວໜ່ວຍທຸລະກິດ.
ໃນພິທີ ທ່ານ ສາຍທອງ ແກ້ວດວງດີ ຮອງເຈົ້າຄອງນະຄອນຫຼວງວຽງຈັນ ກ່າວວ່າ: ບຸນນະມັດສະການພະທາດຫຼວງ ແລະ ງານວາງສະແດງສິນຄ້າ ປະຈຳປີ 2015 ເປັນງານບຸນໃຫຍ່ຂອງປວງຊົນລາວບັນດາເຜົ່າ ໄດ້ຈັດຂຶ້ນປະຈຳທຸກໆປີ ເພື່ອເປັນການສືບທອດມູນເຊື້ອປະເພນີອັນດີງາມ ທີ່ເປັນເອກະລັກທາງດ້ານວັດທະນະທຳທີ່ອຸດົມສົມບູນ ປະກອບມີຫຼາຍສີສັນ ແລະ ມີການຮ່ວມມືຢ່າງກວ້າງຂວາງຂອງປວງຊົນລາວບັນດາເຜົ່າ ໃນຂອບເຂດທົ່ວປະເທດ ແລະ ບັນດາປະເທດເພື່ອນມິດໃກ້ຄຽງ.
ງານບຸນນະມັດສະການພະທາດຫຼວງມາຮອດປີນີ້ ແມ່ນຄົບຮອບ 449 ປີ ເປັນການສົ່ງເສີມວັດທະນະທຳຮີດຄອງປະເພນີ ແບບອະນຸຮັກ ຮັກສາຈາກຮຸ່ນສູ່ຮຸ່ນໃຫ້ຄົງຢູ່ຕະຫຼອດໄປ ຮັບປະກັນຄວາມປອດໄພເປັນລະບຽບຮຽບຮ້ອຍ ທັງເປັນການຊຸກຍູ້ສົ່ງເສີມການຜະລິດເປັນສິນຄ້າ ຕາມແນວທາງໄລຍະໃໝ່ ໂດຍສະເພາະແມ່ນ ສິນຄ້າຄອບຄົວຕົວແບບ ຫຼື ສິນຄ້າພູມປັນຍາຊາວບ້ານ (ODOP) ເພື່ອໃຫ້ນັກທ່ອງທ່ຽວທັງພາຍໃນ ແລະ ຕ່າງປະເທດ ທີ່ເຂົ້າຮ່ວມໃນງານໄດ້ຢ້ຽມຊົມຜະລິດຕະພັນດັ່ງກ່າວ ນອກຈາກນີ້ ຍັງເປັນການສ້າງຂະບວນການຄຳນັບຮັບຕ້ອນ 2 ວັນປະຫວັດສາດຂອງຊາດ-ຂອງພັກ.
ສຳລັບການຈັດງານຢ່າງເປັນທາງການ ເລີ່ມແຕ່ວັນທີ 20-25 ພະຈິກ 2015 ແຕ່ປີນີ້ ຈະບໍ່ມີການວາງສະແດງສິນຄ້າຢູ່ສະຖານທີ່ເດີ່ນສະໜາມຫຼວງຄືກັບທຸກໆປີຜ່ານມາ ເນື່ອງຈາກສະຖານທີ່ດັ່ງກ່າວ ຈະໃຊ້ເປັນບ່ອນເຝິກຊ້ອມກຳລັງກຽມສະແດງງານສະເຫຼີມສະຫຼອງ ສປປ ລາວ ຄົບຮອບ 40 ປີ ດັ່ງນັ້ນ ທາງຄະນະໄດ້ກຳນົດເອົາເດີ່ນກົມມະລຽນພະທາດຫຼວງ ເປັນບ່ອນວາງສະແດງສິນຄ້າຈຳນວນໜຶ່ງ ສູນການຄ້າລາວ-ໄອເຕັກ ແລະ ສູນການຄ້າທາດຫຼວງສະແຄຣ໌ ສຳລັບພິທີທາງສາສະໜາ ປະກອບມີ: ວັນທີ 23 ເວລາ 15:00 ໂມງ ສູດປະລິຕະມຸງຄຸນທີ່ພະທາດຫຼວງ ວັນທີ 24 ເວລາ 13:30 ໂມງ ມີການແຫ່ຜາສາດເຜີ້ງເຂົ້າສູ່ກົມມະລຽນ ພະທາດ ແລະ ຟັງທຳມະເທສະໜາ ວັນທີ 25 ເວລາ 7:00 ໂມງ ພິທີໄຫວ້ພະຮັບສິນ ໃສ່ບາດຖວາຍສັງຄະທານ ເວລາ 14:00 ໂມງ ມີການແຂ່ງຂັນຕີຄີທີ່ເດີ່ນສະໜາມຫຼວງ ແລະ ເວລາ 19:30 ໂມງ ພິທີວຽນທຽນຈູດທູບທຽນບູຊາອ້ອມພະທາດຫຼວງ ຈູດບັ້ງໄຟຕະໄລ ບັ້ງໄຟຊ້າງ ເປັນການສັກກາລະບູຊາ ແລະ ຄົບງັນຕາມຮີດຄອງປະເພນີທີ່ເຄີຍປະຕິບັດກັນມາ.
ແຫ່ລງຂ່າວ
