ການແຂ່ງຂັນກິລາເປຕັງທົ່ວປະເທດ ຊີງຂັນປະທານສະພາແຫ່ງຊາດ ຄັ້ງທີ VI ໄດ້ປິດລົງໃນຕອນຄ່ຳຂອງວັນທີ 14 ພະຈິກ 2015 ທີຜ່ານມານີ້ ທີ່ສະໜາມກິລາເປຕັງແຫ່ງຊາດ(ດົງໂດກ).
ການແຂ່ງຂັນໃນຄັ້ງນີ້ ມີ 10 ແຂວງ 10 ກະຊວງ ແລະ ບັນດາສະໂມສອນຕ່າງໆລວມທັງໝົດ 100 ທີມເຂົ້າຮ່ວມ ມີ 3 ປະເພດແຂ່ງຂັນຄື: ທີມຊຸດຕິ້ງທົ່ວໄປ, ຄູ່ຊາຍທົ່ວໄປ ແລະ ທີມຄູ່ກິຕິມະສັກ (VIP) ຜົນຂອງການແຂ່ງຂັນມີດັ່ງລຸ່ມນີ້: ຊະນະເລີດທີມຄູ່ທົ່ວໄປ ທ້າວ ເພັດອຳໄພ + ທ້າວ ສີສະຫວັດ ຈາກສະໂມສອນເປຕັງ ແຂວງ ວຽງຈັນໄດ້ຮັບຂັນ 1 ໜ່ວຍ ພ້ອມເງິນສົດ 5 ລ້ານກີບ, ທີ 2 ທ້າວ ວັນນະແສງ + ທ້າວ ສົມສີ ໄດ້ຮັບເງິນສົດ 2 ລ້ານ 5 ແສນກີບ ຈາກສະໂມສອນຄຳໃສໜອງພະຍາ, ທີ 3 ທ້າວ ບຸນສວນ + ທ້າວ ສົມສັກ ໄດ້ຮັບເງິນສົດ 1 ລ້ານ 5 ແສນກີບ ຈາກສະໂມສອນປາກຊາບເກົ່າ, ຊະນະເລີດທີມຊຸດຕິ້ງທົ່ວໄປ ທ້າວ ອາຢົງ + ທ້າວ ວິໄລແສງ ຈາກສະໂມສອນໂຮງສີເຂົ້າປ້າຈັນສົດ ໄດ້ຮັບຂັນ 1 ໜ່ວຍເງິນສົດ 2 ລ້ານກີບ, ທີ 2 ທ້າວ ສອນໄຊ + ທ້າວ ວົງຄຳ ຜອງ ຈາກສະໂມສອນຈຸດສຸມປ່າໜາມ ແຂວງຄຳມ່ວນ ໄດ້ຮັບເງິນ ສົດ 1 ລ້ານກີບ, ທີ 3 ສະໂມສອນເປຕັງ ນະຄອນຫຼວງວຽງຈັນ ໄດ້ຮັບເງິນສົດ 5 ແສນກີບ,

ຊະນະເລີດທີມຄູ່ກິຕິມະສັກ (VIP)ທ້າວ ແທນຄຳ+ ທ້າວ ສີສະຫວັດ ຈາກສະໂມສອນກົມພາສີ ໄດ້ຮັບ ຂັນ 1 ໜ່ວຍ ພ້ອມເງິນສົດ 1 ລ້ານ ກີບ, ທີ 2 ທ້າວ ວົງພະຈັນ+ ທ້າວ ເກດສະໜາ ຈາກສະໂມສອນໂຕ່ລັນໂຕ່ ໄດ້ຮັບເງິນ ສົດ 6 ແສນກີບ, ທີ 3 ທ້າວ ຄຳເກີດ + ທ້າວ ຟອງສານຸວົງ ຈາກສະໂມສອນ ບ້ານດອນຝ້າຍໄດ້ຮັບເງິນສົດ 5 ແສນກີບ ໃຫ້ກຽດ ມອບຂັນລາງວັນຂອງທ່ານ ດຣ.ອຸ່ນ ແກ້ວວຸທິລາດ ກຳມະການຄະນະປະຈຳຫົວໜ້າຄະນະປະຈຳສະພາແຫ່ງຊາດ, ທ່ານ ແສງພອນ ພົນອາມາດ ຫົວໜ້າກົມກິລາລະດັບສູງ ຮອງປະທານເລຂາທິການໂອແລັມປິກແຫ່ງຊາດລາວ ແລະ ທ່ານ ນາງ ພູນສະຫວັດ ອຸ່ນນະລົງ ຜູ້ຈັດການພົວພັນພາກລັດຂອງບໍລິສັດເບຍລາວຈຳກັດ, ການແຂ່ງຂັນໃນຄັ້ງນີ້ໄດ້ຮັບການອຸປະຖຳຫຼັກ ຈາກບໍລິສັດເບຍລາວ ຈຳກັດ