ທ່ານ ສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ ຜູ້ຊີ້ນຳຂົງເຂດເສດ ຖະກິດການຜະລິດ ແລະ ຈໍລະຈອນ ໄດ້ຢ້ຽມຢາມ ແລະ ເຮັດວຽກຢູ່ ແຂວງບໍລິຄຳໄຊ ໃນວັນ ທີ 27 ຕຸລາ ໂດຍມີທ່ານ ດຣ. ກອງແກ້ວ ໄຊສົງຄາມ ເຈົ້າແຂວງບໍລິຄຳໄຊ ພ້ອມດ້ວຍ ການນຳແຂວງໃຫ້ການຕ້ອນ ຮັບຢ່າງ ອົບອຸ່ນ.
ໃນໂອກາດດັ່ງກ່າວ, ທ່ານຮອງນາຍົກ ຍັງໄດ້ລົງກວດກາ ຄວາມຄືບໜ້າຂອງການກໍ່ສ້າງ ອະນຸສາວະລີ ທ່ານ ສີສົມພອນ ລໍວັນໄຊ ຊຶ່ງແມ່ນການນຳ ຮຸ່ນທຳອິດຂອງການປະຕິວັດ. ອະນຸສາວະລີດັ່ງກ່າວ ແມ່ນຕັ້ງຢູ່ ບ້ານອານຸສອນໄຊ ເມືອງປາກຊັນ ແຂວງບໍລິຄຳໄຊ ໃນເນື້ອທີ່ 2,6 ເຮັກຕາ ມູນຄ່າການກໍ່ສ້າງ 21 ຕື້ກີບ, ໃນນັ້ນ ທຶນຂອງລັດຖະບານ 18 ຕື້ກີບ ແລະ ທຶນຂອງແຂວງ 3 ຕື້ກີບ ຮັບເໝົາກໍ່ສ້າງໂດຍ ບໍລິສັດ ທະວີໄຊກໍ່ສ້າງ ຊຶ່ງມາຮອດປັດຈຸບັນ ສຳເລັດແລ້ວ 93% ຂອງໜ້າວຽກທັງໝົດ.
ໂອກາດດຽວກັນນີ້, ທ່ານຮອງນາຍົກ ພ້ອມດ້ວຍການນຳຂອງແຂວງ ຍັງໄດ້ຮ່ວມໃສ່ບາດ ເນື່ອງໃນວັນອອກພັນສາປະວໍລະນາ ທີ່ວັດສີວາວະນາລາມ ບ້ານອານຸສອນໄຊ ພ້ອມໃຫ້ກຽດເຂົ້າຮ່ວມຊົມ ງານບຸນຊ່ວງເຮືອປະເພນີ ແລະ ທ່ຽວຊົມສິນຄ້າຜະລິດຕະພັນຕ່າງໆ ຂອງພູມປັນຍາຊາວບ້ານ ເມືອງປາກຊັນ ທີ່ນຳມາວາງສະແດງ ແລະ ຂາຍຢູ່ສະຖານທີ່ງານບຸນ ແຄມນ້ຳຂອງຈຸດປາກນ້ຳຊັນ.
ແຫລ່ງຂ່າວ:
