ໂດຍຕອບສະໜອງຕາມຄຳເຊື້ອເຊີນຂອງສະຫາຍ ບຸນຍັງ ວໍລະຈິດ ກຳມະການກົມການເມືອງສູນກາງພັກ ຮອງປະທານປະເທດ ສະຫາຍນາງ ຫງວຽນ ທີຢວານ ຮອງປະທານປະເທດ ແຫ່ງ ສສ ຫວຽດນາມ ພ້ອມດ້ວຍຄະນະ ໄດ້ເດີນທາງມາຢ້ຽມຢາມສັນຖະວະໄມຕີ ສປປ ລາວ ຢ່າງເປັນທາງການ ໃນລະຫວ່າງວັນທີ 15-18 ຕຸລາ 2015 ເພື່ອສືບຕໍ່ຮັດແໜ້ນສາຍພົວພັນຮ່ວມມືແບບພິເສດ ແລະ ຮອບດ້ານ ລະຫວ່າງສອງຊາດ ລາວ-ຫວຽດນາມ ໃຫ້ນັບມື້ໜັກແໜ້ນເຂັ້ມແຂງ ແລະ ກ້າວສູ່ລວງເລິກຍິ່ງຂຶ້ນ.
ພິທີຕ້ອນຮັບສະຫາຍນາງ ຫງວຽນ ທີຢວານ ຢ່າງເປັນທາງການ ໄດ້ຈັດຂຶ້ນຕອນບ່າຍວັນທີ 15 ຕຸລາ 2015 ທີ່ທຳນຽບປະທານປະເທດ (ຫໍຄຳ) ໂດຍສະຫາຍ ບຸນຍັງ ວໍລະຈິດ ໄດ້ໃຫ້ກຽດຕ້ອນຮັບຢ່າງອົບອຸ່ນ ຈາກນັ້ນ ສອງຝ່າຍໄດ້ພົບປະເຮັດວຽກຮ່ວມກັນ ເຊິ່ງການພົບປະຄັ້ງນີ້ ສອງຝ່າຍໄດ້ຕີລາຄາສູງການຮ່ວມມືໄລຍະຜ່ານມາ ພ້ອມທັງເປັນເອກະພາບ ຢືນຢັນຢ່າງໜັກແໜ້ນ ສືບຕໍ່ຮັກສາມູນເຊື້ອສາຍພົວພັນມິດຕະພາບ ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງພັກ ສອງລັດ ແລະ ປະຊາຊົນສອງຊາດ ລາວ-ຫວຽດນາມ ໃຫ້ນັບມື້ແຕກດອກອອກຜົນຍິ່ງຂຶ້ນ.
ໂອກາດດັ່ງກ່າວ ສະຫາຍ ບຸນຍັງ ວໍລະຈິດ ໄດ້ສະແດງຄວາມຂອບໃຈ ແລະ ຕີລາຄາສູງຕໍ່ການຊ່ວຍເຫຼືອອັນມີປະສິດທິຜົນຂອງພັກ-ລັດຖະບານ ແລະ ປະຊາຊົນຫວຽດນາມ ເຊິ່ງໄດ້ປະກອບສ່ວນສຳຄັນ ເຂົ້າໃນການພັດທະນາເສດຖະກິດ-ສັງຄົມຂອງລາວ ໃຫ້ມີຄວາມເຕີບໃຫຍ່ຂະຫຍາຍຕົວຢ່າງບໍ່ຢຸດຢັ້ງ.
ຂ່າວແຈ້ງຕື່ມວ່າ: ຕອນແລງວັນດຽວກັນນີ້ ສະຫາຍນາງ ຫງວຽນ ທີຢວານ ພ້ອມຄະນະ ຍັງໄດ້ຮ່ວມພົບປະເຮັດວຽກກັບ ສະຫາຍ ທອງສິງ ທຳມະວົງ ກຳມະການກົມການເມືອງສູນກາງພັກ ນາຍົກລັດຖະມົນຕີ ທີ່ຫ້ອງວ່າການລັດຖະບານ.
ແຫລ່ງຂ່າວ:
