ຂປລ. ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ຈັດພິທີມອບ-ຮັບໜ້າທີ່ ລະຫວ່າງ ທ່ານ ຂັນທອງ ມະໂນທຳ, ຫົວໜ້າຫ້ອງການກະຊວງ ຜູ້ເກົ່າ (ເຂົ້າຮັບເບ້ຍບຳນານ) ແລະ ທ່ານ ວັນສີ ກົວມົວ, ເປັນຜູ້ຮັກສາການ ຫົວໜ້າຫ້ອງການກະຊວງ ຜູ້ໃໝ່ ໃນວັນທີ 9 ຕຸລາ 2015 ທີ່ກະຊວງດັ່ງກ່າວ, ໂດຍເຂົ້າຮ່ວມເປັນສັກຂີພິຍານຂອງ ທ່ານ ສຈ.ດຣ ບໍ່ແສງຄຳ ວົງດາລາ, ລັດຖະມົນຕີວ່າການກະຊວງ ຖວທ, ມີບັນດາລັດຖະມົນຕີຊ່ວຍວ່າການ, ຫົວໜ້າກົມ, ຮອງກົມ ແລະ ພະນັກງານພາຍໃນຫ້ອງການ (ຖວທ) ເຂົ້າຮ່ວມ.
ໃນໂອກາດນີ້, ທ່ານ ສຈ.ດຣ. ບໍ່ແສງຄຳ ວົງດາລາ ກໍໄດ້ສະແດງຄວາມຍ້ອງຍໍຊົມເຊີຍຕໍ່ ທ່ານ ຂັນທອງ ມະໂນທຳ, ທີ່ໄດ້ນຳພາ ພະນັກງານພາຍໃນຫ້ອງການ ເຄື່ອນໄຫວໜ້າທີ່ວຽກງານ ວິຊາສະເພາະ ຢ່າງມີຜົນສຳເລັດຫລາຍດ້ານ ຕະຫລອດໄລຍະຜ່ານມາ, ພ້ອມທັງໂອ້ລົມ ໃຫ້ທິດຊີ້ນຳຕໍ່ພະນັກງານ ພາຍໃນຫ້ອງການກະຊວງ ກໍຄື ທ່ານ ວັນສີ ກົວມົວ ຮັກສາການຫົວໜ້າຫ້ອງການກະຊວງຜູ້ໃໝ່ ຈົ່ງຕັ້ງໜ້າບຸກບືນ, ອົດທົນຜ່ານຜ່າຄວາມຫຍຸ້ງຍາກຕ່າງໆ, ພະຍາຍາມເປັນເຈົ້າການ ສະແຫວງຫາເງື່ອນໄຂຕ່າງໆ ທີ່ຈະອຳນວຍຄວາມສະດວກໃຫ້ແກ່ຫ້ອງການກະຊວງ; ເຊີດຊູຄວາມຮັບຜິດຊອບ ການເມືອງໃຫ້ສູງ; ຊອກທຸກວິທີທາງເພື່ອເຮັດໃຫ້ວຽກງານ ເດີນແມ່ນແລ່ນສະດວກ; ຖ້າມີບັນຫາຫຍຸ້ງຍາກ ກໍໃຫ້ສົມທົບໂດຍກົງ ກັບການນຳກະຊວງ ເພື່ອເຮັດໃຫ້ການເຄື່ອນໄຫວວຽກງານ ມີຄວາມສະດວກ ແລະ ສືບຕໍ່ເສີມຂະຫຍາຍຈຸດດີ ໃນການຈັດຕັ້ງປະຕິບັດວຽກງານ ໄລຍະຜ່ານມາ, ແກ້ໄຂຈຸດອ່ອນ ຂໍ້ຄົງຄ້າງ ບາງຢ່າງໃຫ້ກາຍເປັນຈຸດດີ, ເຮັດໃຫ້ວຽກງານຫ້ອງການກະຊວງ ສືບຕໍ່ປະສົບຜົນສຳເລັດໃໝ່ ໃຫຍ່ຫລວງກວ່າເກົ່າ, ສ້າງໄດ້ຜົນງານອັນດີເດັ່ນຂຶ້ນເລື້ອຍໆ ເພື່ອປະກອບສ່ວນເຮັດໃຫ້ກະຊວງ ຖວທ ໄດ້ຮັບການພັດທະນາຍິ່ງໆຂຶ້ນ. ທັງວຽກງານກຸ່ມເສນາທິການ ແລະ ວຽກງານວິຊາການຕ່າງໆ ເດີນແມ່ນແລ່ນສະດວກ ໂດຍມີຫ້ອງການເປັນຈຸດປະສານງານທີ່ເຂັ້ມແຂງ.
ແຫລ່ງຂ່າວ:
