ຄູ່ຮັກຈີນສ່ຽງຕາຍໃຊ້ໄຕ້ຝຸ່ນ “ຕູ້ຈຽນ” ເປັນສາກຫລັງຖ່າຍຮູບ ຄູ່ຮັກຫລາຍກວ່າ 100 ຄູ່ ແຫ່ກັນສ່ຽງຕາຍຖ່າຍຮູບແຕ່ງງານໜ້າຫາດຊາຍ ທີ່ພາຍຸໄຕ້ຝຸ່ນຕູ້ຈຽນພັດເຂົ້າຝັ່ງ ຫລັງລົມແຮງຄື້ນສູງໄດ້ໃຈ ໃຫ້ພາບອອກມາງາມ ວັນພຸດທີ່ 30 ກັນຍາ 18:21 ນ. ເວັບໄຊຕ໌ສຳນັກຂ່າວ “ຊີຊີທີວີ”ຂອງຈີນ ລາຍງານຈາກມົນທົນຊານຕົງ ປະເທດຈີນ ເມື່ອວັນທີ່ 30 ກັນຍາ ວ່າ ຄູ່ຮັກໜຸ່ມສາວຊາວຈີນກວ່າ 100 ຄູ່ແຫ່ກັນສ່ຽງຕາຍ ຖ່າຍຮູບບໍລິເວນຫາດຊາຍເມືອງຫລື້ເຈົ້າ ມົນທົນຊານຕົງ ພື້ນທີ່ທີ່ໄດ້ຮັບອິດທິພົນຂອງໄຕ້ຝຸ່ນຕູ້ຈຽນ ເປັນສາກຫລັງໃນຮູບພີເວດດິ້ງຂອງຕົນເອງ ເນື່ອງຈາກບໍລິເວນນັ້ນມີລົມແຮງ ແລະ ຄື້ນສູງ ເມື່ອຄື້ນພັດເຂົ້າຊາຍຝັ່ງເຮັດໃຫ້ໄດ້ພາບອອກມາສີງາມ ແລະ ເປັນສາກທີ່ໜ້າປະທັບໃຈ ນອກນີ້ຜູ້ທີ່ຜ່ານໄປມາເຂົ້າໃຈວ່າ ບ່າວສາວເຫລົ່ານີ້ຕ້ອງການໃຫ້ຄື້ນລົມເປັນພະຍານໃນຄວາມຮັກຂອງພວກເຂົາເທື່ອນີ້ ທັງນີ້ພາຍຸຕູ້ຈຽນເພີ່ມທະວີຄວາມຮຸນແຮງຂຶ້ນເປັນຊູເປີໄຕ້ຝຸ່ນ ກ່ອນພັດຂຶ້ນຝັ່ງທີ່ມົນທົນອີ໋ຫລານ ທາງຕະເວັນອອກຂອງໄຕ້ຫວັນ ແຮງພາຍຸເຮັດໃຫ້ຕົ້ນໄມ້ຫັກລົ້ມ ມີຝົນຕົກໜັກ ແລະ ດິນເຈື່ອນໃນຫລາຍພື້ນທີ່ ມີລາຍງານຜູ້ເສຍຊີວິດຢ່າງໜ້ອຍ 3 ລາຍ ແລະ ບາດເຈັບຢ່າງ 324 ລາຍ ຈາກອຸປະຕິເຫດທາງລົດ ແລະ ໄດ້ຮັບບາດເຈັບຈາກວັດຖຸທີ່ຖືກກະແສລົມພັດມາ ທາງການໄຕ້ຫວັນສັ່ງອົບພະຍົບປະຊາຊົນຫລາຍກວ່າ 12,000 ຄົນ ຂະນະທີ່ປະຊາຊົນປະມານ 2 ລ້ານຫລັງຄາເຮືອນບໍ່ມີໄຟຟ້າໃຊ້“
