ເມື່ອວັນທີ່ 28 ກໍລະກົດ 2015 ທີ່ຜ່ານມາ ເວັບໄຊຕ໌ androidpolice.com ໄດ້ເຜີຍໄອເດຍສຸດລ້ຳຂອງ Jono Williams ວິສະວະກອນພາດຕິກແລະນັກອອກແບບກາບຟິກຊາວນິວຊີແລນດ໌ ເຊີ່ງກ່ອນໜ້ານີ້ພວກເຂົາເຄີຍມີຄວາມຕັ້ງໃຈທີ່ຈະສ້າງເຮືອນຕົ້ນໄມ້ເປັນຂອງຕົວເອງ ແຕ່ຕິດບັນຫາແລະຂໍ້ຈຳກັດຫລາຍຢ່າງ ບໍ່ວ່າຈະເປັນຄວາມສ່ຽງທີ່ເຮືອນຈະພັງເມື່ອຕົ້ນໄມ້ເຕີບໂຕຂຶ້ນ ລວມທັງກິ່ງໄມ້ທີ່ຍື່ນມາຂວາງທິວທັດຂອງໜ້າຕ່າງເຮືອນ ຈົນສຸດທ້າຍພວກເຂົາກໍປ່ຽນໃຈມາສ້າງເຮືອນລອຍຟ້າທີ່ພວກເຂົາເອີ້ນວ່າ Skysphere ຂຶ້ນມາແທນ
ພວກເຂົາໄດ້ໃຊ້ເງີນເປັນຈຳນວນ $50, 000 ແລະເວລາຫລາຍກວ່າ 3,000 ຊົ່ວໂມງໃນການອອກແບບແລະສ້າງ Skysphere ຂຶ້ນມາ ດ້ວຍການສ້າງຊິ້ນສ່ວນເທື່ອລະຊິ້ນແລ້ວເອົາມາປະກອບກັນຈົນເປັນເຮືອນຮູບຮ່າງກົມຕັ້ງຢູ່ເທິງເສົາເຫລັກທີ່ສູງລະດັບດຽວກັບເຮືອນຕົ້ນໄມ້ທົ່ວໄປ ມີໜ້າຕ່າງຮອບຕົວເຮືອນ ພ້ອມທັງຕົກແຕ່ງດ້ວຍເຟີນິເຈີຢູ່ພາຍໃນ
ເມື່ອສະແກນລາຍນິ້ວມືເພື່ອປົດລັອກປະຕູທາງເຂົ້າເຮືອນແລ້ວ ຈະມີບັນໃດທີ່ຢູ່ພາຍໃນເສົາເຫລັກໃຫ້ສາມາດປີນຂຶ້ນໄປເທິງຕົວເຮືອນຫລືດາດຟ້າໄດ້ ພາຍໃນເຮືອນຈະມີທັງຕຽງນອນ, ໂຊຟາ, ຕູ້ແຊ່ ປະດັບດ້ວຍໄຟ LED ແຖມຍັງມີເຄື່ອງສາຍພາບ ລຳໂພງລະບົບສຽງແບບໄຮ້ສາຍ ແລະອິນເຕີເນັດຄວາມໄວສູງອີກດ້ວຍ ເຊີ່ງທັງໝົດນີ້ຈະໃຊ້ພະລັງງານໄຟຟ້າຈາກແຜງໂຊລ່າເທິງຕົວເຮືອນທີ່ສາມາດເກັບພະລັງງານເອົາໄວ້ໃຊ້ເຄື່ອງໃຊ້ໄຟຟ້າຕ່າງໆ ໃນຕົວເຮືອນໄດ້ດົນເຖິງ 2 ມື້ຕໍ່ອາທິດເລີຍ ແຕ່ພາຍໃນເຮືອນຍັງບໍ່ມີຫ້ອງອາບນ້ຳເນື່ອງຈາກພວກເຂົາຍັງບໍ່ໄດ້ເຮັດລະບົບປ້ຳນ້ຳ
ສິ່ງທີ່ລ້ຳທີ່ສຸດຂອງ Skysphere ນີ້ກໍຄື ພວກເຂົາສາມາດໃຊ້ສະມາດໂຟນແອນດຣອຍຄວບຄຸ້ມສິ່ງຕ່າງໆ ໃນເຮືອນໄດ້ ບໍ່ວ່າຈະເປັນສີຫລອດໄຟ LED ດ້ວຍສຽງ, ຕູ້ແຊ່, ຜ້າມ່ານ ລວມທັງລະບົບຮັກສາຄວາມປອດໄພ ນອກຈາກນີ້ຍັງມີລະບົບແຈ້ງເຕືອນເມື່ອຂອງໃນຕູ້ແຊ່ໃກ້ໝົດອີກດ້ວຍ