ນັກວິທະຍາສາດອິຕາລີພົບວ່າ ການດື່ມກາເຟພໍດີແລະສະໝ່ຳສະເໝີຈະເປັນປະໂຫຍດ ແຕ່ຫາກເພີ່ມປະລິມານການດື່ມຫລືບໍ່ດື່ມເລີຍນັ້ນ ຈະມີໂອກາດເປັນພະຍາດທາງລະບົບປະສາດຫລາຍຂຶ້ນ
ງານວິໄຈຈາກວາລະສານວິຊາການ Journal of Alzheimer’s Disease ສະບັບໜຶ່ງ ເຜີຍເຖິງຕົວເລກຂອງຄົນອິຕາລີ 5,632 ຄົົນທີ່ອາຍຸລະຫວ່າງ 65-84 ປີນັ້ນມີອາການບົກຜ່ອງທາງການຮັບຮູ້ເລັກນ້ອຍນີ້ເຖິງ 1,445 ຄົນເລີຍ
“ຄວາມບົກຜ່ອງທາງການຮັບຮູ້ເລັກນ້ອຍ” ຫລື Mild Cognitive Impairment (MCI) ນີ້ເປັນອາການບອກເຫດຂອງການເປັນພະຍາດຄວາມຈຳເສື່ອມ ຫລືອັນໄຊເມີລ໌ໃນເວລາຕໍ່ມາ ປະຈຸບັນຍັງບໍ່ມີວິທີການປິ່ນປົວທີ່ມີປະສິດທິພາບ ດັ່ງນັ້ນ ການກວດພົບພະຍາດນີ້ຕັ້ງແຕ່ແຮກເລີ່ມ ຫລືແມ່ນກະທັ່ງການກວດລັກສະນະອາການຂອງ MCI ຕະຫລອດຈົນພັດທະນາການສູ່ພະຍາດອັນໄຊເມີລ໌ ກໍອາດຈະເປັນຂັ້ນຕອນທີ່ມີຄວາມສຳຄັນບໍ່ນ້ອຍ ພະຍາດເຫລົ່ານີ້ມີຜົນກະທົບມາຈາກຫລາຍປັດໄຈ ໜຶ່ງໃນນັ້ນກໍຄືອາຫານທີ່ເຮົາທານກັນຢູ່ທຸກມື້ນີ້ ແລະແນ່ນອນວ່າ ກາເຟກໍເປັນໜຶ່ງໃນເຄື່ອງດື່ມຍອດຮິດສຳລັບຄົນທົ່ວໂລກຫລາຍລ້ານຄົນ ແລະມີຢູ່ບໍ່ນ້ອຍທີ່ມີອາການຕິດຄາເຟອີນ ສານທີ່ກໍ່ໃຫ້ເກີດການກະຕຸ້ນປະສາດແລະຊ່ວຍພັດທະນາລະບົບການຮັບຮູ້ນຶກຄິດໃນລະຫວ່າງມື້
ນອກຈາກເຄື່ອງດື່ມທີ່ມີກາເຟຈະມີຜົນໃນໄລຍະສັ້ນແລ້ວ ຍັງມີງານວິໄຈພົບວ່າກາເຟ ຊາ ຫລືເຄື່ອງດື່ມທີ່ປະສົມຄາເຟອີນນັ້ນມີຜົນກະທົບໃນໄລຍະຍາວດ້ວຍ ອາດຈະຊ່ວຍປ້ອງກັນການເສື່ອມສະພາບທາງລະບົບການຮັບຮູ້ ຄວາມຈຳເສື່ອມ ແລະພະຍາດອື່ນໆອີກ
ແຕ່ສິ່ງທີ່ໜ້າສົນໃຈໃນການວິໄຈເທື່ອນີ້ຄື ນັກວິໄຈໄດ້ພົບວ່າໃນກຸ່ມຄົົນທີ່ມີລະບົບປະສາດປົກກະຕິ ເມື່ອປ່ຽນພຶດຕິກຳຕົວເອງມາດື່ມກາເຟເລື້ອຍຂຶ້ນ (ດື່ມຫລາຍຂຶ້ນໜຶ່ງແກ້ວຕໍ່ມື້) ກັບມີອັດຕາການເກີດຂອງພະຍາດ MCI ຫລາຍຂຶ້ນເຖິງ 2 ເທົ່າເມື່ອທຽບກັບຄົົນທີ່ດື່ມກາເຟລຸດລົງ (ດື່ມນ້ອຍກວ່າໜຶ່ງແກ້ວຕໍ່ມື້) ແລະມີຄວາມສ່ຽງຫລາຍກວ່າຜູ້ທີ່ດື່ມເທົ່າເດີມຄິດເປັນ 1.5 ເທົ່າ ຍິ່ງໄປກວ່ານັ້ນ ພຶດຕິກຳການດື່ມໃນປະລິມານປົກກະຕິ (ປະມານ 1-2 ແກ້ວຕໍ່ມື້) ນັ້ນຊ່ວຍລຸດການເກີດ MCI ກວ່າຄົົນທີ່ບໍ່ດື່ມຫລືບໍ່ຄ່ອຍດື່ມກາເຟເລີຍ ແຕ່ເມື່ອທຽບລະຫວ່າງຜູ້ທີ່ດື່ມຫລາຍໆ (ຫລາຍກວ່າ 2 ແກ້ວຕໍ່ມື້) ກັບຜູ້ທີ່ບໍ່ດື່ມເລີຍ ກັບບໍ່ໄດ້ພົບຄວາມສຳພັນໃດໆກັບອາການ MCI ເລີຍ
“ການຄົ້ນພົບເທື່ອນີ້ເປັນການຄົ້ນພົບທີ່ບອກເຮົາວ່າ ລະບົບການຮັບຮູ້ຂອງຜູ້ສູງອາຍຸທີ່ບໍ່ເຄີຍດື່ມກາເຟຫລືດື່ມແຕ່ນ້ອຍກັບຜູ້ທີ່ເພີ່ມປະລິມານກາເຟທີ່ດື່ມນັ້ນຈະມີຄວາມສ່ຽງຕໍ່ການພັດທະນາເປັນພະຍາດ MCI ທີ່ຫລາຍຂຶ້ນ ດັ່ງນັ້ນ ການດື່ມແຕ່ພໍດີແລະສະໝ່ຳສະເໝີຈະຊ່ວຍປ້ອງກັນລະບົບປະສາດບໍ່ໃຫ້ເປັນພະຍາດ MCI ໄດ້ ເຊີ່ງຖືວ່າສອດຄ້ອງກັບງານວິໄຈກ່ອນຫນ້າທີ່ກ່ຽວຂ້ອງກັບຜົນກະທົບຂອງການດື່ມກາເຟ ຊາ ແລະເຄື່ອງດື່ມທີ່ມີຄາເຟອີນໃນໄລຍະຍາວທີ່ພົບວ່າເຄື່ອງດື່ມເຫລົ່ານີ້ຊ່ວຍປ້ອງກັນລະບົບປະສາດບໍ່ໃຫ້ເປັນພະຍາດຄວາມຈຳເສື່ອມ” ດຮ. ວິນເຊນໂກ ໂຊນຟຣິຊະຊີ ແລະ ດຮ. ຟຣານເຊດໂກ ແພນຊາ ແຫ່ງມະຫາວິທະຍາໄລບາລີ ອັນໂດ ໂມໂລ ແຫ່ງອິຕາລີ ເຜີຍ
ໃນການສຶກສາເທື່ອນີ້ ນັກວິໄຈຢາກຈະຮູ້ກົນໄກທີ່ຢູ່ເບື້ອງເລິກເບື້ອງຫລັງຂອງຜົນຂອງການດື່ມກາເຟຕໍ່ການປ້ອງກັນລະບົບປະສາດບໍ່ໃຫ້ເສື່ອມ ໃນໄລຍະຍາວນັ້ນການດື່ມກາເຟຈະປິ່ນປົວສົມດຸນຂອງລະບົບ Adenosine ຈະຊ່ວຍຫລຸດຜົນກະທົບຄວາມເສຍຫາຍທີ່ເກີດຈາກ “ແອມີລອຍບີຕາ” ທີ່ເປັນອົງປະກອບຫລັກຂອງຄາບທີ່ໄປເກາະໃນສະໝອງຜູ້ປ່ວຍພະຍາດອັນໄຊເມີລ໌ ໃນຄວາມເປັນຈິງແລ້ວ ການດື່ມກາເຟເອງກໍຊ່ວຍລຸດລະດັບຂອງແອມີລອຍບີຕາໃນສະໝອງທີ່ເປັນພະຍາດອັນໄຊເມີລ໌ທັງໃນໄລຍະສັ້ນແລະໄລຍະຍາວ ເຮັດໃຫ້ເກີດການຄືນຄວາມຊົງຈຳແລະພະຍາດອັນໄຊເມີລ໌ເລີ່ມຫາຍໄປ
ນັກວິໄຈຕັ້ງສົມມຸດວ່າ ສົມດຸນຂອງສ່ວນປະກອບຍ່ອຍຂອງລະບົບ Adenosine ອັນປະກອບໄປດ້ວຍ Adenosine A1 receptors (A1Rs) ແລະ Adenosine A2A receptors (A2ARs) ນັ້ນ ໜ້າຈະມີຄວາມສຳຄັນຕໍ່ລະບົບປະສາດ ຫາກສົມດຸນນີ້ສູນເສຍໄປ ເຊັ່ນ ກະຕຸ້ນຫລາຍຫລືນ້ອຍໄປ ຈະເຮັດໃຫ້ລະບົບຄວາມຊົງຈຳເສຍຫາຍໄປ
ນັກວິໄຈເຊື່ອວ່າ ເມື່ອຄາເຟອີນສາມາດປ້ອງກັນບໍ່ໃຫ້ຄວາມຊົງຈຳເສື່ອມໄປກໍໝາຍຄວາມວ່າຄາເຟອີນກໍໜ້າຈະມີຄວາມກ່ຽວຂ້ອງກັບ A2ARs ຫລາຍກວ່າ A1Rs ເພາະສົມມຸດນີ້ສາມາດອະທິບາຍໄດ້ບາງສ່ວນວ່າ ເຫດໃດຄົົນທີ່ບໍ່ດື່ມກາເຟກັບດື່ມກາເຟຫລາຍໄປຈຶ່ງມີຄວາມສ່ຽງທີ່ຈະມີອາການ MCI ຫລາຍ ໃນຂະນະທີ່ການດື່ມກາເຟຢ່າງປານກາງນັ້ນກັບຊ່ວຍໃຫ້ຄວາມຊົງຈຳຂອງເຮົາດີຂຶ້ນ ຂະນະທີ່ການດື່ມຫລາຍນັ້ນເຮັດໃຫ້ຄວາມຊົງຈຳຮ້າຍກວ່າເກົ່າ ແຕ່ຍັງຄົງຕ້ອງມີການສຶກສາເພິ່ມເຕິມເພື່ອຫາຄຳຕອບທີ່ແທ້ຈິງຕໍ່ໄປ