ສຳນັກຂ່າວສານປະເທດລາວ: ວັນທີ 13 ກໍລະກົດ 2015, ກະຊວງພະລັງງານ ແລະ ບໍ່ແຮ່ ຖະແຫລງຂ່າວ ກ່ຽວກັບການຈັດກອງປະຊຸມ ສຳມະນາກ່ຽວກັບຄວາມຄືບໜ້າ ສຳລັບການພັດທະນາ ໂຄງການກໍ່ສ້າງເຂື່ອນ ໄຟຟ້ານ້ຳຂອງໄຊຍະບູລີ ຊຶ່ງຈະໄດ້ຈັດຂຶ້ນໃນໄວໆ ນີ້ເພື່ອລາຍງານເຖິງຂັ້ນຕອນ, ວິທີການອອກແບບ ແລະ ການກໍ່ສ້າງ ລວມທັງການນຳໃຊ້ ມາດຕະການທີ່ຈຳເປັນຕ່າງໆ ທີ່ລັດຖະບານລາວ ແລະ ຜູ້ພັດທະນາໂຄງການດັ່ງກ່າວ ໄດ້ນຳໃຊ້ເຂົ້າໃນການປະຕິບັດເພື່ອຫລຸດຜ່ອນ ຜົນກະທົບທີ່ອາດຈະເກີດຂື້ນ ຫລັງການ ນຳໃຊ້ໂຄງການດັ່ງກ່າວຢ່າງເປັນທາງການ.
ອີງຕາມແຈ້ງການ ຂອງກະຊວງພະລັງງານ ແລະ ບໍ່ແຮ່ ວ່າ: ກອງປະຊຸມດັ່ງກ່າວ ຊຶ່ງຈະໄດ້ຈັດຂຶ້ນ ແລະ ດຳເນີນໄປເປັນເວລາໜຶ່ງວັນເຕັມ ທີ່ໂຮງແຮມດອນຈັນພາເລດສ, ນະຄອນຫລວງວຽງຈັນ ໂດຍຈະມີຫລາຍຂະແໜງການ ທີ່ກ່ຽວຂ້ອງເຂົ້າຮ່ວມເຊັ່ນ: ໜ່ວຍງານທີ່ກ່ຽວຂ້ອງຂອງລັດຖະບານ ຈາກສູນກາງ ແລະ ທ້ອງຖິ່ນ, ຜູ້ຕາງໜ້າຈາກບັນດາ ປະເທດສະມາຊິກ ຂອງຄະນະກຳມະການແມ່ນ້ຳຂອງ, ຜູ້ຕາງໜ້າຈາກປະເທດຄູ່ຮ່ວມພັດທະນາ (ອົດສະຕາລີ, ແບນຊິກ, ດານມາກ, ສະຫະພາບເອີລົບ, ແຟງລັງ, ຝຣັ່ງ, ເຢຍລະມັນ, ຍີ່ປຸ່ນ, ນູແວນເຊລັງ, ຊູແອດ, ສະວິດ, ສ. ອາເມລິກາ ແລະ ບັນດາປະເທດອາຊຽນ), ອົງການຈັດຕັ້ງສາກົນທີ່ເປັນຄູ່ຮ່ວມພັດທະນາ (ທະນາຄານອາຊີ, ອົງການຈັດສາກົນເພື່ອອານຸລັກທຳມະຊາດ, ອົງການສະຫະປະຊາຊາດ, ທະນາຄານໂລກ ແລະ ກອງທຶນປົກປ້ອງສັດປ່່າ) ແລະ ຜູ້ພັດທະນາໂຄງການໄຟຟ້ານ້ຳຕົກຢູ່ພາຍໃນ ສປປ ລາວ./.
ຂ່າວສານປະເທດລາວແລະໂຕະນ້ຳຊາ