ສຳນັກຂ່າວຕ່າງປະເທດ ລາຍງານໃນວັນທີ 14 ກໍລະກົດນີ້ວ່າ ທາງການແມັກຊິກໂກ ໄດ້ຕັ້ງເງິນລາງວັນນຳຈັບ ທ້າວ ໂຈອາຄິນ ຄາຊິບັນໂດ ກຸດມັນ ໂລເອລາ ຫລື ເອນ ຊາໂປ ເຈົ້າພໍ່ຄ້າຢາເສບຕິດສູງເຖິງ 60 ລ້ານເປໂຊ ຫລື ປະມານ 3.8 ລ້ານໂດລາສະຫະລັດ ຫລັງຈາກທີ່ເຂົາສາມາດແຫກອອກຈາກຄຸກ ອັນຕິປລາໂນ ເຊິ່ງເປັນຄຸກຄວາມໝັ້ນຄົງສູງສຸດຂອງແມັກຊິກໂກ ໃນມື້ວັນທີ 11 ກໍລະກົດຜ່ານມາ.

ດ້ານລັດຖະມົນຕີກະຊວງປ້ອງກັນຄວາມສະຫງົບຂອງແມັກຊິກໂກໄດ້ລະບຸວ່າ ເອນ ຊາໂປ ສາມາດຫລົບໜີຈາກຄຸກດັ່ງກ່າວນີ້ໄດ້ ເນື່ອງຈາກເຂົາຕ້ອງໄດ້ຮັບການຊ່ວຍເຫລືອຈາກເຈົ້າໜ້າທີ່ຄ້າຍຄຸມຂັງແນ່ນອນ ເພາະເຂົາສາມາດຫລົບໜີໄດ້ໃນຂະນະທີ່ຖືກໃສ່ກຸນແຈມືທີ່ມີສັນຍານຕິດຕາມ ແລະ ຢູ່ໃນຄ້າຍຄຸມຂັງດັ່ງກ່າວນີ້ ກໍຍັງມີເຈົ້າໜ້າທີ່ອອກກວດກາເວນຍາມຢ່າງເຂັ້ມງວດ 24 ຊົ່ວໂມງ ໂດຍປັດຈຸບັນກະຊວງໄດ້ສັ່ງປົດຕຳແໜ່ງ ເຈົ້າໜ້າທີ່ຄ້າຍຄຸມຂັງລະດັບສູງແລ້ວ 3 ຄົນ ໃນນັ້ນແມ່ນມີຜູ້ອຳນວຍການຄ້າຍຂຸມຄັງດັ່ງກ່າວລວມຢູ່ນຳ.

ທັງນີ້ ທ້າວ ເອນ ຊາໂປ ໃຊ້ວິທີການຫລົບໜີອອກຈາກຄຸກດັ່ງກ່າວ ເນື່ອງຈາກມີການຂຸດອຸໂມງຂະໜາດ 50×50 ຊັງຕີແມັດ ຢູ່ບໍລິເວນຫ້ອງອາບນ້ຳ ເລິກໜ້າດິນເຖິງ 10 ແມັດ ແລະ ມີຄວາມຍາວເຖິງ 2.4 ກິໂລແມັດ ແລ້ວມີປ່ອງອອກຢູ່ບໍລິເວນສະຖານທີ່ກໍ່ສ້າງແຫ່ງໜຶ່ງນອກກຳແພງຄຸກ.