ພິທີລົງນາມວ່າດ້ວຍການພົວພັນການຄ້າຊາຍແດນລະຫວ່າງລັດຖະບານລາວ ແລະ ຫວຽດນາມ ໄດ້ມີຂຶ້ນໃນວັນທີ 27 ມິຖຸນານີ້ ທີ່ແຂວງເງະອານ ສສ ຫວຽດນາມ ລະຫວ່າງລັດຖະມົນຕີກະຊວງອຸດສາຫະກຳ-ການຄ້າຂອງສອງປະເທດ ໂດຍການ ໃຫ້ກຽດເຂົ້າຮ່ວມຂອງທ່ານຮອງນາຍົກລັດຖະມົນຕີ ສົມສະຫວາດ ເລັ່ງສະຫວັດ ແລະ ທ່ານ ຫງວຽນຊວນຟຸກ ຮອງນາຍົກລັດຖະມົນຕີ ສສ ຫວຽດນາມ.
ສັນຍາດັ່ງກ່າວມັນມີຄວາມໝາຍສຳຄັນຍິ່ງ ເພື່ອສ້າງເງື່ອນໄຂທາງດ້ານລະບຽບ ກົດໝາຍໃຫ້ແກ່ການພົວພັນແລກ ປ່ຽນສິນຄ້າລະຫວ່າງສອງປະເທດໃຫ້ນັບມື້ຂະ ຫຍາຍໂຕ ແລະສ້າງຄວາມເປັນເອກະພາບໃນການແກ້ໄຂບາງບັນຫາຂອງການເຄື່ອນໄຫວພົວພັນແລກປ່ຽນ ສິນຄ້າຊາຍແດນ ລະຫວ່າງສອງຝ່າຍ, ປະກອບສ່ວນສຳຄັນເຂົ້າໃນການກະຕຸກຊຸກຍູ້ແກ້ໄຂຄວາມທຸກຍາກ ແລະ ການພັດທະນາເສດ ຖະກິດ-
ສັງຄົມຂອງບັນດາເຂດແຂວງຢູ່ລຽບຕາມຊາຍແດນສອງປະ ເທດໃຫ້ເຕີບໃຫຍ່ເຂັ້ມແຂງ. ພ້ອມນັ້ນ ກໍເປັນການ ກະຕຸກຊຸກຍູ້ ໃຫ້ບັນລຸເປົ້າໝາຍການພົວພັນການຄ້າລະຫວ່າງສອງປະເທດໃນປີນີ້ໃຫ້ໄດ້ 2 ຕື້ໂດລາສະຫະລັດ.
ສັນຍາໃໝ່ນີ້ລວມມີ 23 ມາດຕາ ທີ່ລະບຸແຈ້ງເຖິງການເຄື່ອນໄຫວຊື້-ຂາຍ, ແລກປ່ຽນສິນຄ້າຂອງປະຊາຊົນຢູ່ເຂດຊາຍ ແດນ, ພັດທະນາຕະຫລາດ ແລະ ການບໍລິການ ເພື່ອກະຕຸກຊຸກຍູ້ການຄ້າສອງຝ່າຍໃຫ້ມີຄວາມສະດວກ ແລະ ໃຫ້ບູລິມະ ສິດພາສີນຳເຂົ້າ 0% ໃຫ້ແກ່ໝວດສິນຄ້າທີ່ມີຕົ້ນກຳເນີດຢູ່ລາວ ແລະ ຫວຽດນາມດ້ວຍກັນ, ກະຕຸກຊຸກຍູ້ການລົງທຶນເຂົ້າ ເຂດຊາຍແດນ, ບ່ອນຫ່າງໄກສອກຫລີກ ເຊິ່ງຈະມີນະໂຍບາຍ 0% ຂອງພາສີນຳເຂົ້າ ແລະ ພາສີມູນຄ່າເພີ່ມ ແລະ ລຶບລ້າງ ບັນດາພາສີບາງປະເພດສິນຄ້າທີ່ນັກລົງທຶນຫວຽດນາມເປັນຜູ້ຜະລິດຢູ່ບັນດາແຂວງຊາຍແດນເບື້ອງລາວອອກໄປຫວຽດນາມ. ພ້ອມນັ້ນ ສັນຍາສະບັບນີ້ຍັງໄດ້ລະບຸເຖິງຂອດການຊຳລະສະສາງ, ການນຳເອົາເງິນສົດເຂົ້າ-ອອກ ກໍຄືພາຫະນະ ແລະ ຜູ້ຜ່ານແດນອື່ນໆເພື່ອສ້າງເງື່ອນໄຂໃຫ້ແກ່ການໄປມາຫາສູ່ລະຫວ່າງປະຊາຊົນສອງຝ່າຍມີ ຄວາມສະດວກສະບາຍຍິ່ງໆຂຶ້ນ.
ແຫລ່ງຂ່າວ: ລາວພັດທະນາ