ທ້າຍເດືອນພຶດສະພາ 2015 ຜ່ານມາ ບໍລິສັດ ທິລິກິດແອນກິບບິນສ໌ລາວ ຈຳກັດ ໄດ້ຮ່ວມກັບພະແນກວິທະຍາສາດ ແລະ ເຕັກໂນໂລຊີ ນະຄອນຫຼວງວຽງຈັນ ພ້ອມດ້ວຍເຈົ້າໜ້າທີ່ກ່ຽວຂ້ອງຈາກຫຼາຍພາກສ່ວນ ໄດ້ລົງກວດກາສິນຄ້າປອມແປງໃນຂົງເຂດນະຄອນຫຼວງວຽງຈັນ ໂດຍສະເພາະແມ່ນນ້ຳມັນເຄື່ອງກາຊ້າງຂອງບໍລິສັດ ສະຫຍາມຄູໂບຕ້າຄໍໂປເຣຊັນ ຈຳກັດ.
ໃນການດຳເນີນການຄັ້ງນີ້ ທາງເຈົ້າໜ້າທີ່ໄດ້ມີການປຶກສາຫາລືກັນ ໂດຍມີນັກວິຊາການຂອງບໍລິສັດ ທິລິກິດແອນກິບບິນສ໌ລາວ ຈຳກັດ ໄດ້ມາອະທິບາຍເຖິງຄວາມແຕກຕ່າງຂອງສິນຄ້າລະຫວ່າງຂອງແທ້ ແລະ ປອມແປງ ຄືນ້ຳມັນເຄື່ອງກາຊ້າງ ຫາກເບິ່ງຜິວເຜີນອາດຈະບໍ່ຮູ້ວ່າອັນໃດແທ້ອັນໃດປອມ ແຕ່ກໍ່ມີຫຼາຍຈຸດທີ່ໃຫ້ພວກເຮົາໄດ້ສັງເກດ ນັກວິຊາການຍັງໄດ້ແຈ້ງຕື່ມອີກວ່າ ສິນຄ້າປອມແປງຫາກໄປນຳໃຊ້ກັບເຄື່ອງຈັກຄູໂບຕ້າແລ້ວ ຈະເຮັດໃຫ້ອາຍຸການໃຊ້ງານຂອງເຄື່ອງຈັກຫຼຸດໜ້ອຍລົງ ເຊິ່ງຈະສະແດງໃຫ້ເຫັນເຄື່ອງຈັກມີອາຍຸໃຊ້ງານໄດ້ 20 ປີ ແຕ່ຖ້າໃຊ້ສິນຄ້າປອມແປງອາດຈະເຫຼືອ ອາຍຸການໃຊ້ງານໄດ້ 10 ປີເທົ່ານັ້ນ.
ສະນັ້ນ ຈຶ່ງຢາກແນະນຳຜູ້ໃຊ້ເຄື່ອງຈັກການກະສິກຳຂອງບໍລິສັດ ສະຫຍາມຄູໂບຕ້າຄໍໂປເຣຊັນ ຈຳກັດ ເລືອກຊື້ນ້ຳມັນເຄື່ອງ ແລະ ອາໄຫຼ່ຂອງແທ້ຈຳໜ່າຍຂອງບໍລິສັດນັ້ນ ເພື່ອຄວາມໝັ້ນໃຈວ່າຈະໄດ້ຮັບສິນຄ້າທີ່ດີ ແລະ ມີຄຸນະພາບຈາກຜູ້ຜະລິດໂດຍກົງ.
ຈາກນັ້ນ ຄະນະປະຕິບັດງານໄດ້ລົງກວດກາກຸ່ມເປົ້າໝາຍທີ່ມີຢູ່ 16 ຮ້ານ ໃນຂົງເຂດນະຄອນຫຼວງວຽງຈັນ ແລະ ໄດ້ພົບສິນຄ້າປອມແປງແຕ່ພຽງ 2 ຮ້ານ ເພາະກ່ອນໜ້ານີ້ ໄດ້ມີການແຈ້ງການກ່ອນທີ່ຈະລົງມາກວດ ເຮັດໃຫ້ຜູ້ລະເມີດມີຄວາມເຂົ້າໃຈ ແລະ ປະຕິບັດຕາມເປັນຢ່າງດີ ສ່ວນສິນຄ້າປອມແປງທີ່ພົບເຫັນໃນຄັ້ງນີ້ ແມ່ນມີພຽງນ້ຳມັນເຄື່ອງກາຊ້າງ ຈຳນວນ 12 ຕຸກ ທາງເຈົ້າໜ້າທີ່ຈຶ່ງໄດ້ເຮັດບົດບັນທຶກຕໍ່ຜູ້ລະເມີດ ພ້ອມຢຶດສິນຄ້າປອມແປງດັ່ງກ່າວ ໄວ້ເພື່ອທຳລາຍ.
ແຫລ່ງຂ່າວ: ວຽງຈັນໃໝ່