ໃນເວລາປະມານ 14:30 ໂມງຂອງວັນທີ 24 ພຶດສະພາຜ່ານມານີ້, ໄດ້ມີເຫດ ການຍິງກັນຕາຍ ທີ່ບ້ານສີໃຄ ເມືອງສີໂຄດຕະບອງ ນະຄອນຫລວງວຽງຈັນ ເຊິ່ງເປັນຊາຍໄວກາງຄົນ ຖືກຍິງ 2 ຈຸດ ເສຍຊີວິດຄາທີ່.
ເຈົ້າໜ້າທີ່ກອງພິສູດຫລັກຖານນະຄອນຫລວງວຽງຈັນ ໃຫ້ຮູ້ວ່າ: ພາຍຫລັງໄດ້ຮັບແຈ້ງເຫດກໍນຳກຳລັງລົງຈຸດ ເກັບກຳຂໍ້ມູນ, ຫລັກຖານ, ຊຶ່ງຜູ້ເສຍຊີວິດຄື ທ້າວ ສົມຈັນ ຈັນທະວິດ ຫລື ຕຸ້ຍ ອາຍຸ 41 ປີ ອາຊີບຄ້າຂາຍ ຢູ່ບ້ານວັດໃຕນ້ອຍທ່າ ໜ່ວຍ 10 ເມືອງສີໂຄດຕະບອງ ນະຄອນຫລວງວຽງຈັນ. ກ່ອນເກີດເຫດຜູ້ກ່ຽວກັບໝູ່ອີກ 2 ຄົນ ໄດ້ນັ່ງຊຸມແຊວຢູ່ໂຕະຫີນໜ້າເຮືອນຂອງໝູ່, ແຕ່ບໍ່ພໍເທົ່າໃດນາທີຕໍ່ມາກໍໄດ້ມີລົດຈັກຄັນໜຶ່ງຂັບຂີ່ເຂົ້າມາຈອດຢູ່ຕໍ່ໜ້າເຮືອນດັ່ງກ່າວແລ້ວຍ່າງເຂົ້າໄປຍິງທ້າວ ຕຸ້ຍ ທີ່ກຳລັງຊຸມແຊວກັບໝູ່ຢູ່ນັ້ນ 2 ນັດ,
ນັດທີ 1 ຍິງເຂົ້າໄປທີ່ລຸ່ມແກ້ມເບື້ອງຂວາ ແລະ ອີກນັດ 1 ແມ່ນຍິງເຂົ້າກາງຫລັງເບື້ອງຂວາເຮັດໃຫ້ເສຍຊີວິດຄາທີ່. ຈາກນັ້ນຜູ້ກໍ່ເຫດກໍໄດ້ຂຶ້ນລົດຈັກຫລົບໜີໄປ, ຊຶ່ງປັດຈຸບັນກຳລັງເຈົ້າໜ້າທີ່ພວມເລັ່ງນຳຈັບຕົວມາລົງໂທດໃຫ້ໄດ້ໂດຍໄວ. ສ່ວນສາເຫດຂອງການຄາດຕະກຳຄັ້ງນີ້ ເຈົ້າໜ້າທີ່ພວມດຳເນີນການສືບສວນ-ສອບສວນ ແລະ ໄດ້ມຸ້ງປະເດັນໄປທີ່ການຄັດແຍ່ງຜົນປະໂຫຍດທາງທຸລະກິດ.
ແຫລ່ງຂ່າວ: ລາວພັດທະນາ