ຂີ້ເຫຍື້ອແມ່ນບັນຫາໜຶ່ງທີ່ພວມສົ່ງຜົນກະທົບທັງທາງກົງ ແລະ ທາງອ້ອມຕໍ່ສິ່ງແວດລ້ອມຂອງຕົວເມືອງ ໂດຍສະ
ເພາະໃນເມືອງໃຫຍ່ນະຄອນຫຼວງວຽງຈັນ ທີ່ເປັນສູນກາງທາງດ້ານເສດຖະກິດມີປະຊາຊົນເຂົ້າມາອາໃສຢູ່ຫຼາຍ ຂຶ້ນ
ແຕ່ລະປີປະລິມານຂີ້ເຫຍື້ອເປັນເງົາເພີ່ມຂຶ້ນຕາມຕົວ ເຮັດໃຫ້ພະນັກງານກ່ຽວຂ້ອງບໍ່ສາມາດເກັບມ້ຽນອອກຈາກ
ຕົວເມືອງໄດ້ ໝົດໃນແຕ່ລະມື້ສະເລ່ຍ ປະມານ 1 ຮ້ອຍໂຕນ ທີ່ປະຊາຊົນຕ້ອງມ້ຽນເອງ ທັງນີ້ ອັນເນື່ອງມາຈາກສະ
ພາບຍານພາຫະນະຮັບໃຊ້ເປ່ເພ, ກຳມະກອນຍົກ-ຂົນຂີ້ເຫຍື້ອຂື້ນລົດຂ້ອນຂ້າງຫາຍາກ, ຄວາມຕື່ນຕົວຂອງບຸກ
ຄົນຈຳນວນໜຶ່ງຍັງຖືເບົາສະແດງອອກພັນທະບໍ່ ຢາກເສຍ ແລະ ອື່ນໆ.
ທ່ານ ພູດອນ ເມກສະຫວັນ ຮອງປະ ທານອົງການພັດທະນາ ແລະ ບໍລິຫານ ຕົວເມືອງວຽງຈັນ (ອພບ) ໄດ້ຊີ້ແຈງໃຫ້
ຮູ້ຫວ່າງບໍ່ດົນມານີ້ຮູ້ວ່າ: ປະຈຸບັນນີ້ ປະລິມານຂີ້ເຫຍື້ອຢູ່ນະຄອນຫຼວງວຽງຈັນແມ່ນນັບມື້ນັບເພີ່ມຂຶ້ນ ຊຶ່ງກ່ຽວພັນ
ກັບບັນຫາການເພີ່ມຂຶ້ນຂອງປະຊາກອນ, ຕິດພັນກັບການຫຼັ່ງ ໄຫຼຂອງປະຊາຊົນຢູ່ເຂດຊົນນະບົດ ຫຼື ບັນດາແຂວງ
ຕ່າງໆເຂົ້າມາອາໃສຢູ່ຕາມຕົວເມືອງຂອງນະຄອນຫຼວງວຽງຈັນ ຫຼາຍຂຶ້ນນຳອີກດ້ານໜຶ່ງຍ້ອນການຂະຫຍາຍຕົວ
ທາງດ້ານເສດຖະກິດ- ສັງຄົມຂອງຕົວເມືອງທີ່ວ່ອງໄວ ຢ່າງໃດກໍຕາມ ນະຄອນຫຼວງວຽງຈັນກໍຄືພາກສ່ວນທີ່ກ່ຽວ
ຂ້ອງກໍໄດ້ພະຍາຍາມຢ່າງ ຕັ້ງໜ້າທີ່ຈະແກ້ໄຂໃຫ້ມີການຫັນ ປ່ຽນ ແລະ ມີການຄຸ້ມຄອງທີ່ດີ.
ສຳລັບໃນໄລຍະຜ່ານມານັ້ນທາງ ອພບ ໄດ້ເອົາໃຈໃສ່ປະຕິບັດໜ້າທີ່ຂອງຕົນຕາມພາລະບົດບາດ-ໜ້າທີ່ ທີ່ຂັ້ນເທິງ
ມອບໝາຍໃຫ້ຢ່າງມີຜົນສຳເລັດຫຼາຍດ້ານ, ໃນການຈັດຕັ້ງປະຕິບັດຕົວຈິງໄດ້ມີການແບ່ງງານແບ່ງຄວາມຮັບຜິດ
ຊອບໃຫ້ແຕ່ລະພາກສ່ວນເພື່ອຈັດຕັ້ງປະຕິບັດຢ່າງເປັນເອກະພາບ ໂດຍສະເພາະປະຈຸບັນນີ້ມີຜູ້ປະກອບການເກັບ
ມ້ຽນ-ຂົນສົ່ງຂີ້ເຫຍື້ອ ນັບທັງພາກລັດ ແລະ ເອກະຊົນຈຳນວນ 7 ພາກສ່ວນດ້ວຍກັນ ໃນນີ້ ລັດມີ 1 ພາກສ່ວນຄື
ກອງບໍລິການຂົນສົ່ງຂີ້ເຫຍື້ອທີ່ຂື້ນກັບການຊີ້ນຳ ໂດຍກົງຂອງ ອພບ, ທີ່ຍັງເຫຼືອແມ່ນພາກເອກະຊົນທີ່ເຄື່ອນໄຫວ
ບໍລິການຕາມຂອບເຂດພື້ນ ທີ່ທີ່ ອພບ ໄດ້ຈັດສັນໃຫ້ ແລະ ອພບ ເປັນຜູ້ຄຸ້ມຄອງ.
ໂດຍປະລິມານຂີ້ເຫຍື້ອຢູ່ນະຄອນຫຼວງວຽງຈັນມີປະມານ 300-350 ໂຕນຕໍ່ມື້, ໃນນີ້ ສາມາດເກັບມ້ຽນ-ຂົນໄປບຳ
ບັດຢູ່ສະໜາມຫຼັກ 32 ໄດ້ປະມານ 220-250 ໂຕນຕໍ່ມື້ເທົ່ານັ້ນ ຊຶ່ງໝາຍຄວາມວ່າຍັງມີຂີ້ເຫຍື້ອຄົງຄ້າງຢູ່ໃນ ນວ
ປະມານ 80-100 ໂຕນຕໍ່ມື້ ທີ່ປະຊາຊົນຫາວິທີກຳຈັດກັນເອງ (ອາດຈະດ້ວຍວິທີຂົນໄປຖິ້ມເອງ, ຈູດເຜົາ, ຝັງ) ຊຶ່ງ
ສາເຫດທັງໝົດນັ້ນແມ່ນຂົນສົ່ງບາງຄັ້ງຍັງບໍ່ທ່ວງທັນກັບເວລາ ກຳນົດໝາຍລົດຂົນສົ່ງເປ່ເພ ເພາະນຳໃຊ້ມາ
ຫຼາຍປີປະສິດທິພາບບໍ່ສູງເທົ່າທີ່ຄວນ, ກຳມະກອນທີ່ເຮັດວຽກຍົກ-ຂົນຂີ້ເຫຍື້ອຂຶ້ນລົດຂ້ອນຂ້າງຫາຍາກ ແລະ
ຈຳກັດ ເພາະສັງຄົມລາວຍັງຖືວ່າເປັນວຽກທີ່ຕ່ຳ-ເປື້ອນເປິ ຫຼື ສັງຄົມລັງກຽດ, ຄວາມຕື່ນຕົວຂອງບຸກຄົນຈຳນວນ
ໜຶ່ງຍັງຖືເບົາສະແດງອອກພັນທະບໍ່ ຢາກຈ່າຍ, ປະຊາຊົນຈຳນວນໜຶ່ງຍັງມີລາຍຮັບສະເລ່ຍຕ່ຳແລ້ວກໍບໍ່ຢາກໃຊ້
ບໍລິການເກີດມີປາກົດການຖິ້ມຂີ້ເຫຍື້ອຊະຊາຍຕາມຈຸດຕ່າງໆໂດຍເຈດ ຕະນາ ຫຼື ບໍ່ເຈດຕະນາ.
ແນວໃດກໍດີ ໃນທິດທາງຕໍ່ໜ້າແຜນການຂະຫຍາຍການບໍລິການ-ຂົນສົ່ງເກັບມ້ຽນຂີ້ ເຫຍື້ອທີ່ເປັນລະບົບ, ຮ່ວມ
ມືກັບອົງການໄຈກາປະເທດຍີ່ປຸ່ນໃນການປັບປຸງຫັນປ່ຽນພາຫະນະ ທີ່ນຳໃຊ້ມາດົນນານແລ້ວນັ້ນໃຫ້ຫັນໄປສູ່ມາດ
ຕະຖານເພື່ອຮັບປະກັນ ໃນການບໍລິການທີ່ວ່ອງໄວ ແລະ ມີພາຫະນະທີ່ພຽງພໍຕໍ່ການບໍລິການຂົນສົ່ງ ແລະ ປີ 2015
ນີ້ ລັດຖະບານຍີ່ປຸ່ນຈະຊ່ວຍເຫຼືອລ້າລົດຂົນສົ່ງເກັບມ້ຽນຂີ້ເຫຍື້ອ ຕື່ມອີກຈຳນວນ 50 ຄັນ, ເພີ່ມຂະຫຍາຍການໃຫ້
ການບໍລິການຄວບຄຸມຢ່າງທົ່ວເຖິງໃນພື້ນທີ່ຂອບ ເຂດການບໍລິການຂອງກອງບໍລິການຂົນສົ່ງຂີ້ເຫຍື້ອ (ທຸກຄອບ
ຄົວແມ່ນເຮັດສັນຍາ).
ແຫລ່ງຂ່າວ: ເສດຖະກິດ – ສັງຄົມ