ສຳນັກຂ່າວຕ່າງປະເທດລາຍງານວ່າ ອົດສະຕາລີອອກມາດຕະການເຂັ້ມງວດໃນການກວດຄົນເຂົ້າເມືອງ ໂດຍຫ້າມນັກຮຽນຕ່າງຊາດພາຄູ່ຄອງ ແລະ ລູກຕິດຕາມໄປຢູ່ອາໄສນຳ ພ້ອມເພີ່ມຄວາມເຂັ້ມງວດການປ່ຽນປະເພດວີຊາ ເພື່ອຫວັງຈະຫຼຸດຈຳນວນຜູ້ອົບພະຍົບໃຫ້ເຫຼືອ 2.25 ແສນຄົນພາຍໃນປີ 2028.
ລັດຖະບານປະເທດອົດສະຕາລີກຽມອອກມາດຕະການເຂັ້ມງວດຂອງລະບົບຄົນເຂົ້າເມືອງ ໂດຍໜຶ່ງໃນມາດຕະການສຳຄັນຄື ຫ້າມນັກຮຽນຕ່າງຊາດນຳສະມາຊິກຄອບຄົວຕິດຕາມໄປອົດສະຕາລີໃນລະຫວ່າງການຮ່ຳຮຽນ ເຊິ່ງຄາດວ່າຈະສົ່ງຜົນຕໍ່ຄູ່ຄອງ ແລະ ລູກທີ່ຢູ່ໃນການດູແລຂອງນັກຮຽນຕ່າງຊາດ.
ມາດຕະການດັ່ງກ່າວເປັນສ່ວນໜຶ່ງຂອງແຜນປະຕິຮູບລະບົບວີຊາຊົ່ວຄາວຂອງລັດຖະບານ. ໂດຍລັດຖະບານໄດ້ຕັ້ງເປົ້າໝາຍທີ່ຈະຫຼຸດຈຳນວນຜູ້ອົບພະຍົບຈາກປັດຈຸບັນປະມານ 300,000 ຄົນຕໍ່ປີ ໃຫ້ເຫຼືອ 225,000 ຄົນພາຍໃນປີ 2028.
ປັດຈຸບັນ, ນັກຮຽນຕ່າງຊາດພາຄູ່ຄອງ ລວມເຖິງລູກທີ່ອາຍຸຕ່ຳກວ່າ 18 ປີ ເດີນທາງໄປອົດສະຕາລີໃນຖານະສະມາຊິກຄອບຄົວທີ່ຕິດຕາມໄດ້ ໂດຍຄູ່ຄອງຍັງສາມາດເຮັດວຽກໃນອົດສະຕາລີໄດ້ ພາຍໃຕ້ຂໍ້ຈຳກັດດ້ານຈຳນວນຊົ່ວໂມງເຮັດວຽກທີ່ແຕກຕ່າງກັນຕາມຫຼັກສູດຂອງນັກຮຽນ.
ແຕ່ພາຍໃຕ້ມາດຕະການໃໝ່ ນັກຮຽນຕ່າງຊາດຈະຖືກຈຳກັດສິດໃນການພາຄອບຄົວຕິດຕາມໄປນຳ. ໂດຍສຳນັກຂ່າວ ABC ລາຍງານວ່າ ເຖິງວ່າລັດຖະບານຍັງບໍ່ໄດ້ປະກາດຫຼຸດຈຳນວນໂກຕານັກຮຽນຕ່າງຊາດໂດຍກົງ ແຕ່ການຕັດສິດພາຄອບຄົວໄປນຳຈະເປັນໜຶ່ງໃນກົນໄກສຳຄັນໃນການຄວບຄຸມຈຳນວນຜູ້ອົບພະຍົບ.
ຂໍ້ມູນຂອງລັດຖະບານອົດສະຕາລີບະລຸວ່າ ໃນປີງົບປະມານຫຼ້າສຸດ ມີການອະນຸມັດວີຊານັກຮຽນ 337,427 ຄົນ ແລະ ໃນຈຳນວນ 45,991 ຄົນນີ້ ເປັນວີຊ່າສຳລັບຜູ້ຕິດຕາມ ຫຼື ສະມາຊິກຄອບຄົວ ເຊິ່ງສະທ້ອນວ່າມາດຕະການດັ່ງກ່າວອາດມີຜົນຕໍ່ຜູ້ເດີນທາງເຂົ້າປະເທດຈຳນວນບໍ່ໜ້ອຍ.
ນອກຈາກເລື່ອງຄອບຄົວຂອງນັກຮຽນຕ່າງຊາດ ລັດຖະບານຍັງກຽມເພີ່ມຄວາມເຂັ້ມງວດກັບວີຊ່າຊົ່ວຄາວ ໂດຍຈະຈັດການກັບກໍລະນີຜູ້ຖືວີຊາ ແລ້ວປ່ຽນປະເພດວີຊາໃນພາຍຫຼັງອີກຄັ້ງ ເພື່ອຍືດເວລາພັກອາໄສໃນປະເທດ ແລະ ຕ້ອງການໃຫ້ຜູ້ຍ້າຍຖິ່ນຖານອອກຈາກອົດສະຕາລີເມື່ອວີຊາໝົດອາຍຸ ເພື່ອປ້ອງກັນການໃຊ້ຊ່ອງທາງທີ່ເອີ້ນວ່າ ‘Visa Hopping’.
ອົດສະຕາລີໄດ້ປະເຊີນກັບແຮງກົດດັນໃຫ້ຄວບຄົມຈຳນວນຜູ້ອົບພະຍົບ ຫຼັງຈຳນວນການຍ້າຍຖິ່ນຖານເພີ່ມຂຶ້ນຢ່າງຫຼາຍເທົ່າ ເມື່ອອົດສະຕາລີໄດ້ເປີດປະເທດອີກຄັ້ງໃນເດືອນກຸມພາ 2022 ຫຼັງໃຊ້ມາດຕະການຈຳກັດການເດີນທາງເກືອບ 2 ປີ ໃນຊ່ວງໂຄວິດ-19 ໂດຍນັກຮຽນຕ່າງຊາດ ຜູ້ເດີນທາງໃນຮູບແບບເຮັດວຽກ ພ້ອມກັບທ່ອງທ່ຽວພາຍໃນປະເທດອົດສະຕາລີ (Working Holiday) ແລະ ແຮງງານທັກສະຊົ່ວຄາວ ເປັນກຸ່ມສຳຄັນທີ່ຜັກດັນຕົວເລກດັ່ງກ່າວ.
ຂໍ້ມູນທາງການລະບຸວ່າ ຈຳນວນຜູ້ອົບພະຍົບໃນຊ່ວງເດືອນມິຖຸນາ 2025 ຢູ່ທີ່ 306,000 ຄົນ ຫຼຸດລົງຈາກ 429,000 ຄົນໃນປີ 2024 ແລະ ລະດັບສູງສຸດ 518,000 ຄົນໃນປີ 2023 ໂດຍນັກຮຽນຕ່າງຊາດຄິດເປັນຫຼາຍກວ່າເຄິ່ງໜຶ່ງຂອງຕົວເລກຫຼ້າສຸດ.
ຢ່າງໃດກໍຕາມ, ປະເດັນການຄວບຄຸມຜູ້ອົບພະຍົບກຳລັງເປັນທີ່ຖົກຖຽງໃນອົດສະຕາລີ ໂດຍມີທັງຂໍ້ກັງວົນເລື່ອງແຮງກົດດັນຕໍ່ທີ່ຢູ່ອາໄສ ແລະ ໂຄງສ້າງພື້ນຖານ. ໃນຂະນະດຽວກັນ, ພາກການສຶກສາກໍຈັບຕາສັງເກດການຜົນກະທົບຈາກມາດຕະການຈຳກັດການນຳຄອບຄົວຂອງນັກຮຽນຕ່າງຊາດເຂົ້າປະເທດຢ່າງໃກ້ຊິດເຊັ່ນດຽວກັນ.