ທ່ານ ພົນເອກ ຄຳສອນ ສີດາວົງ ຮອງຫົວໜ້າກົມຕຳຫຼວດຈະລາຈອນ ຖະແຫຼງຂ່າວຕໍ່ສື່ມວນຊົນ ສຳລັບປີໃໝ່ລາວທີ່ຈະມາເຖິງນີ້ ເປັນປີທີ່ສຳຄັນ ຢູ່ໃນສະພາບເງື່ອນໄຂຂອງລັດຖະບານ ເຊິ່ງໄດ້ກຳນົດເປັນປີທ່ອງທ່ຽວລາວ ແນ່ນອນວ່າຈະມີມວນຊົນທັງໃນ ແລະ ຕ່າງປະເທດ ເຂົ້າມາທ່ຽວຊົມສະຖານທີ່ ທຳມະຊາດ ວັດທະນະທຳ ປະຫວັດສາດ ແລະ ລາວເຮົາຍັງໄດ້ຮັບກຽດເປັນເຈົ້າພາບຈັດກອງປະຊຸມສຸດຍອດອາຊຽນໃນທ້າຍປີນີ້.

ເພື່ອເປັນການເພີ່ມທະວີປ້ອງກັນຊາດປ້ອງກັນຄວາມສະຫງົບ ໃນການພັດທະນາເສດຖະກິດສັງຄົມສົ່ງເສີມການທ່ອງທ່ຽວປົກປ້ອງ ສະກັດກັ້ນ ຫຼຸດຜ່ອນອຸບັດຕິເຫດຈະລາຈອນທາງບົກ ເຊິ່ງປີໃໝ່ລາວປີນີ້ທາງກົມຈະລາຈອນ ກໍໄດ້ເຮັດໜ້າທີ່ສະກັດກັ້ນປ້ອງກັນອຸບັດຕິເຫດໃນໄລຍະບຸນປີໃໝ່ລາວ.

ໃນໄລຍະບຸນປີໃໝ່ທີ່ຜ່ານມາກໍຄື ພສ 2566 ມີການເກີດອຸບັດຕິເຫດຂຶ້ນທັງໝົດ 342 ລາຍທົ່ວປະເທດ ພາຫະນພເປເພຈຳນວນ 589 ຄັນ ຜູ້ໄດ້ຮັບບາດເຈັບຈຳນວນ 611 ຄົນ ເສຍຊີວິດ 35 ຄົນ, ຍິງ 5 ຄົນ ສ້າງຜົນເສຍຫາຍທາງດ້ານ ສຸຂະພາບຊີວິດ ແລະ ຊັບສິນຂອງລັດ ຂອງລວມໝູ່ ແລະ ຂອງປະຊາຊົນ, ໃນນັ້ນມີເຫດດື່ມສິ່ງມຶນເມົາເກີດຂຶ້ນທັງໝົດ 112 ລາຍ, ເສຍຊີວິດ 5 ຄົນ, ຂັບຂີ່ເກີນຄວາມໄວທີ່ກຳນົດ 94 ລາຍ ແລະ ເສຍຊີວິດ 25 ຄົນ, ພາຫະນະຮ່ວມເກີດອຸບັດຕິເຫດລົດຈັກຕຳລົດຍົນ 96 ລາຍ ເສຍຊີວິດ 6 ຄົນ, ລົດຈັກຕຳລົດຈັກ 106 ລາຍເສຍຊີວິດ 5 ຄົນ, ເຂດທີ່ມັກເກີດອຸບັດຕິເຫດຫຼາຍກໍຄືເຂດເທດສະບານເມືອງ 168 ລາຍເສຍຊີວິດ 11 ຄົນ, ນອກເທດສະບານ 174 ລາຍເສຍຊີວິດ 24 ຄົນ ແລະ ໄລຍະເວລາທີ່ມັກເກີດອຸບັດຕິເຫດ 18:00ໂມງ- 23:00ໂມງ.

ທ້າຍນີ້, ກໍຂໍໃຫ້ຜູ້ຂັບຂີ່ມີສະຕິລະມັດລະວັງ ການໃຊ້ຄວາມໄວ ການດື່ມສິ່ງມຶນເມົາ ການປະມາດຂາດສະຕິ ແລະ ກໍຂໍໃຫ້ການຫຼິ້ນບຸນປີໃໝ່ລາວ ເບີກບານມ່ວນຊື່ນ ແລະ ປອດໄພ.