ປະເທດທີ່ມີການສໍ້ລາດບັງຫຼວງໜ້ອຍທີ່ສຸດ ອີງຕາມການຈັດລຳດັບຂອງ Transparency International (TI) ຫຼື ອົງການຄວາມໂປງໃສນານາຊາດ. ເຊິ່ງໃນວັນທີ 30 ມັງກອນ ທີ່ຜ່ານມາ, ໄດ້ເຜີຍແຜ່ດັດສະນີຕົວເລກການສໍ້ລາດບັງຫຼວງ (CPI) ປະຈຳປີ 2023, ໂດຍໄດ້ມີການປະເມີນພາບລັກການສໍ້ລາດບັງຫຼວງໃນ 180 ປະເທດທົ່ວໂລກ, ເຊິ່ງຈະມີການໃຫ້ຄະແນນເລີ່ມແຕ່ 0 ໝາຍເຖິງມີການສໍ້ລາດບັງຫຼວງຫຼາຍ ໄປຈົນຮອດ 100 ໝາຍເຖິງມີການສໍ້ລາດບັງຫຼວງໜ້ອຍ, ຈາກການສະຫຼຸບຜົນການໃຫ້ຄະແນນເຫັນວ່າ ອັນດັບທີ 1 ໄດ້ແກ່ ປະເທດເດນມາກ 90 ຄະແນນ, ອັນດັບທີ 2 ແມ່ນ ປະເທດຟິນແລນ 87 ຄະແນນ ແລະ ອັນດັບທີ 3 ຄື ປະເທດນິວຊີແລນ 85 ຄະແນນ.

ສຳລັບບັນດາໃນປະເທດອາຊຽນ, ປະເທດທີ່ມີການສໍ້ລາດບັງຫຼວງໜ້ອຍທີ່ສຸດ ໄດ້ເປັນອັນດັບທີ 1 ແມ່ນປະເທດສິງກະໂປ ມີ 83 ຄະແນນ (ອັນດັບທີ 5 ຂອງໂລກ) ແລະ ອັນດັບສຸດທ້າຍຂອງອາຊຽນໄດ້ແກ່ ປະເທດມຽນມາ ມີ 20 ຄະແນນ (ອັນດັບທີ 162 ຂອງໂລກ). ສ່ວນ ສປປ ລາວ ເຮົາ ແມ່ນໄດ້ 28 ຄະແນນ (ອັນດັບທີ 136 ຂອງໂລກ).