ໂດນັລ ທຣັມ ອະດີດປະທານາທິບໍດີ ໄດ້ເດີນທາງໄປເຮືອນຈຳໃນເມືອງແອັດແລນຕາ ລັດຈໍເຈຍ ສະຫະລັດອາເມຣິກາ ໃນວັນທີ 24 ສິງຫາ 2023 ເພື່ອເຂົ້າມອບຕົວ ພາຍຫຼັງຖືກຟ້ອງໃນຂໍ້ຫາກ່ຽວກັບການພະຍາຍາມລົ້ມລ້າງຜົນການນັບຄະແນນເລືອກຕັ້ງປະທານາທິບໍດີໃນລັດຈໍເຈຍປີ 2020.

ຕາມຄຳຟ້ອງສານ ໄດ້ລະບຸວ່າ ທຣັມ ຖືກກ່າວຫາເປັນຜູ້ນຳກຸ່ມອາຊະຍາກຳເຊິ່ງເປັນສ່ວນໜຶ່ງຂອງຜູ້ຮ່ວມຂະບວນການ ເພື່ອປ່ຽນແປງຜົນການເລືອກຕັ້ງໃນລັດຈໍເຈຍທີ່ ທຣັມ ໄດ້ຄະແນນໜ້ອຍກວ່າ ໂຈ ໄບເດັນ ຄູ່ແຂ່ງຈາກພັກເດໂມແຄຣດ.

ມີລາຍງານວ່າ ທຣັມ ໄດ້ພິມລາຍນິ້ວມື ຖ່າຍຮູບປະຫວັດຜູ້ຖືກຫາ ແລະ ຢູ່ໃນຄຸກເປັນເວລາ 20 ນາທີ ກ່ອນທີ່ຈະຖືກປະກັນຕົວອອກໄດ້ ດ້ວຍຫຼັກຊັບປະກັນ 200.000 ໂດລາ ຫຼື ປະມານ 4 ຕື້ກີບ ພ້ອມທັງສັນຍາວ່າຈະບໍ່ສະແດງພຶດຕິກຳທີ່ເປັນການຂົ່ມຂູ່ພະຍານ ແລະ ຈຳເລີຍອື່ນໆອີກ 18 ຄົນ.

ການຍອມຈຳນົນຂອງທຣັມໃນຈໍເຈຍ ຖືເປັນຄັ້ງທີ 4 ໃນປີນີ້ ເຊິ່ງໄດ້ມອບຕົວຕໍ່ເຈົ້າໜ້າທີ່ທ້ອງຖິ່ນ ຫຼື ລັດຖະບານກາງ ພາຍຫຼັງມີການຕັ້ງຂໍ້ຫາທາງອາຍາຕໍ່ເຂົາ ເຊິ່ງເປັນເຫດການທີ່ບໍ່ເຄີຍພົບເຫັນໃນສະຫະລັດອາເມຣິກາ.

ແຫຼ່ງຂ່າວ CNN