ເຈົ້ານະຄອນ ຫຼວງພະບາງ ອອກແຈ້ງການ ເຖິງ: ພໍ່ແມ່ປະຊາຊົນ, ພະນັກງານ, ທະຫານຕໍາຫຼວດ, ຜູ້ປະກອບການ ທີ່ສັນຈອນຜ່ານຂົວນໍ້າຄານ ເກົ່າ (ຂົວເບເລ) ບ້ານຫມື່ນນາ – ບ້ານເມືອງງາ ກ່ຽວກັບການປິດການສັນຈອນເທີງຫນ້າຂົວຊົ່ວຄາວ ໃນໄລຍະສ້ອມແປງຂົວນໍ້າຄານເກົ່າ(ຂົວເບເລເກົ່າ) ບ້ານ ຫມື່ນນາ – ບ້ານເມືອງງາ ນະຄອນຫຼວງພະບາງ.
ອີງຕາມ ຫນັງສືແຈ້ງການຂອງພະແນກ ແຜນການ ແລະ ການລົງທຶນ ແຂວງ ຫຼວງພະບາງ ສະບັບເລກທີ 2060/ພຜທ, ລົງວັນທີ 21 ທັນວາ 2022 ວ່າດ້ວຍການຈັດຕັ້ງປະຕິບັດໂຄງການທີ່ນໍາໃຊ້ບ້ວງເງີນ 80 ລ້ານບາດຂອງບໍລິສັດໄຊຍະບູລີພາວເວີ ສະຫນັບສະຫນູນ ເພື່ອມາພັດທະນາແຂວງ ຫຼວງພະບາງ. ອີງຕາມ ແຜນພັດທະນາພື້ນຖານໂຄງລ່າງ ເສດຖະກິດ-ສັງຄົມ 5 ປີ ຂອງນະຄອນ ຫຼວງພະບາງ
ເຈົ້ານະຄອນຫຼວງພະບາງ ແຈ້ງການມາຍັງພໍ່ແມ່ປະຊາຊົນ, ພະນັກງານ, ທະຫານຕໍາຫຼວດ, ຜູ້ປະກອບການ ຕະຫຼອດຮອດ ພໍ່ແມ່ປະຊາຊົນບັນດາເຜົ່າ ພ້ອມທັງແຂກພາຍໃນ ແລະ ຕ່າງປະເທດທີ່ມາທ່ຽວຊົມ ນະຄອນ ຫລວງພະ ບາງ ທີ່ສັນຈອນຜ່ານຂົວນໍ້າຄານເກົ່າ (ຂົວເບເລ) ບ້ານຫມື່ນນາ – ບ້ານເມືອງງາ ນະຄອນຫຼວງພະບາງ ຮັບຊາບວ່າ: ປະຈຸບັນ ຂົວນໍ້າຄານເກົ່າ (ຂົວເບເລ) ບ້ານຫມື່ນນາ – ບ້ານເມືອງງາ ກໍາລັງຢູ່ໃນໄລຍະການສ້ອມແປງ ແລະ ຈະໄດ້ປິດ ຊ່ອງການສັນຈອນເທິງຫນ້າຂົວຊົ່ວຄາວ ໃນລະຫວ່າງວັນທີ 22 ເມສາ 2023 – 10 ພຶດສະພາ 2023 ເພື່ອຮັບປະກັນ ການສ້ອມແປງໃຫ້ຖືກຕ້ອງຕາມມາດຖານເຕັກນິກ ແລະ ຮັບປະກັນຄວາມປອດໄພໃນໄລຍະການສ້ອມແປງ ເຊີ່ງລາຍ ລະອຽດໃນການປິດຊ່ອງຈາລະຈອນ ມີດັ່ງນີ້:
ວັນທີ 22 ເມສາ 2023 – ວັນທີ 10 ພຶດສະພາ 2023 ເວລາ 6:00 ໂມງ – 22:00 ໂມງ ປິດການ ສັນຈອນລົດເທິງຫນ້າຂົວຖາວອນ ເປັນເວລາ 20 ວັນ, ການສັນຈອນໃຫ້ເວັ້ນໄປນໍາໃຊ້ເສັ້ນທາງ 13 ເຫນືອ ຈົນກ່ວາຈະສ້ອມແປງສໍາເລັດ, ແລ້ວຈິ່ງເປີດສັນຈອນປົກກະຕິ.
ສ່ວນທາງຄົນຍ່າງ ແມ່ນເປີດນໍາໃຊ້ປົກກະຕິ ແຕ່ຕ້ອງລະວັງ ເພື່ອຄວາມປອດໄພ ໃນການຊົມໃຊ້.
ດັ່ງນັ້ນ, ຈຶ່ງຂໍຖືເປັນກຽດແຈ້ງມາຍັງທ່ານຊາບ ແລະ ພາກສ່ວນທີ່ກ່ຽວຂ້ອງປະຕິບັດດ້ວຍ. ຮຽນມາດ້ວຍຄວາມເຄົາລົບ ແລະ ນັບຖືຢ່າງສູງ.