ໄທກຳລັງເບິ່ງວ່າການແຕ່ງດອງຂອງຄົນອິນເດຍ ໄປແຫຼ່ງລາຍໄດ້ແຫ່ງໃໝ່ທີ່ໄດ້ຈາກການທ່ອງທ່ຽວ ຫຼັງຈາກທີ່ນັກທ່ອງທ່ຽວຊາວຈີນທີ່ສູນເສຍໄປໃນປີນີ້.
ອ້າງອີງຈາກສຳນັກຂ່າວ Nikkei ໄດ້ລາຍງານວ່າ: ທາງການຂອງປະເທດໄທເຊື່ອວ່າ ການແຕ່ງດອງຂອງຄົນອິນເດຍສາມາດເປັນແຫຼ່ງລາຍໄດ້ໃຫ້ກັບພາກທ່ອງທ່ຽວຂອງປະເທດ ໂດຍເຈົ້າໜ້າທີ່ກ່າວວ່າ ນັກທ່ອງທ່ຽວຄົນອິນເດຍເປັນເປົ້າໝາຍຫຼັກຂອງພວກເຂົາໃນປີນີ້.
ການທ່ອງທ່ຽວແຫ່ງປະເທດໄທ (ທທທ) ກ່າວວ່າ ມີນັກທ່ອງທ່ຽວອິນເດຍຈຳນວນ 337.282 ຄົນ ເດີນທາງມາປະເທດໄທໃນຊ່ວງ 7 ເດືອນທຳອິດຂອງປີ 2022 ສະເລ່ຍແລ້ວປະມານ 4.000 ຄົນຕໍ່ມື້ ນັບຕັ້ງແຕ່ວັນທີ 1 ມັງກອນ ທີ່ປະເທດໄທໄດ້ເປີດປະເທດຢ່າງເປັນທາງການ.
(ທທທ) ໄດ້ຈັດງານວາງສະແດງຢູ່ບັນດາເມືອງສຳຄັນຕ່າງໆຂອງອິນເດຍ ເພື່ອສົ່ງເສີມຄວາມສາມາດຂອງປະເທດໄທເອງ ໃນການຈັດງານຂະໜາດໃຫຍ່ໄດ້ ລວມເຖິງງານແຕ່ງດອງ.
ທ່ານ ທະເນດ ເພັດສຸວັນ ຮອງຜູ້ວ່າການຝ່າຍການຕະຫຼາດອາຊີ ແລະ ປາຊີຟິກໃຕ້ ການທ່ອງທ່ຽວແຫ່ງປະເທດໄທ (ທທທ) ໃຫ້ສຳພາດຕໍ່ Nikkei ວ່າ “ນັກທ່ອງທ່ຽວຄົນອິນເດຍເປັນເປົ້າໝາຍຫຼັກໃນປີນີ້”.
ໃນຂະນະດຽວກັນ, ສະມາຄົມການແຕ່ງດອງໃນໄທ ແລະ ອິນເດຍ (TIWA) ກ່າວວ່າ: ປະຫວັດສາດຮ່ວມລະຫວ່າງອິນເດຍ ແລະ ອາຊີຕາເວັນອອກສຽງໃຕ້, ໂດຍສະເພາະກ່ຽວກັບຮີດຄອງປະເພນີທາງສາສະໜາພຸດ ແລະ ຮິນດູ, ນັ້ນໝາຍຄວາມວ່າໄທຄວນເປັນສະຖານທີ່ ທີ່ດຶງດູດໃຈສຳລັບຄູ່ບ່າວສາວອິນເດຍ.
ໂດຍການແຕ່ງດອງຂອງຄົນອິນເດຍ ສ່ວນຫຼາຍຈະຈັດຂຶ້ນຢູ່ ພູເກັດ ຫົວຫິນ ຊະອຳ ແລະ ພັດທະຍາ ຍ້ອນມີທິວທັດທີ່ສວຍງາມ ແລະ (ທທທ) ຄາດວ່າ ຈະມີງານແຕ່ງດອງຂອງຄົນອິນເດຍຫຼາຍເຖິງ 400 ງານໃນປີ 2022 ແລະ ຄາດວ່າປະເທດໄທຈະມີນັກທ່ອງທ່ຽວອິນເດຍຫຼາຍເຖິງ 500.000 ຄົນພາຍໃນທ້າຍປີນີ້.
ຄອບຄົວເສດຖີອິນເດຍ ທີ່ຈັດງານແຕ່ງດອງໃນປະເທດໄທມັກຈະເຊົ່າເຮືອບິນເພື່ອບັນທຸກແຂກທີ່ຈະມາຮ່ວມງານຫຼາຍເຖິງ 300 ຄົນ ໂດຍຈອງໂຮງແຮມໄວ້ພັກຫຼາຍມື້.
ໃນອາທິດທີ່ຜ່ານມາ ທ່ານ ອະນຸຊາ ບູລະພະໄຊສີ ໂຄສົກສຳນັກງານນາຍົກລັດຖະມົນຕີ ໄດ້ກ່າວວ່າ ປະເທດໄທໄດ້ຮັບນັກທ່ອງທ່ຽວຫຼາຍກວ່າ 4 ລ້ານຄົນໃນປີນີ້ ໂດຍມີ 5 ປະເທດທີ່ເຂົ້າມາທ່ຽວໄທ ຫຼາຍທີ່ສຸດແມ່ນ ມາເລເຊຍ, ອິນເດຍ, ລາວ, ສິງກະໂປ ແລະ ອັງກິດ.