ລັດຖະບານ ສະຫະລັດອາເມລິກາ ໄດ້ໃຫ້ທຶນສະໜັບສະໜູນເພິ່ມເຕີມ ແກ່ອົງການເກັບກູ້ລະເບີດ ແມັກ ຈໍານວນທັງໝົດ 8.500.000 ໂດລາສະຫະລັດ ເພື່ອສືບຕໍ່ຈັດຕັ້ງປະຕິບັດວຽກງານການສໍາຫຼວດ, ກວດກູ້ ລະເບີດບໍ່ທັນແຕກ ແລະ ການໂຄສະນາສຶກສາຄວາມສ່ຽງ ຕໍ່ກັບ ລບຕ ຢູ່ໃນແຂວງ ຊຽງຂວາງ, ສໍາລັບໄລຍະເວລາ 12 ເດືອນ.
ລູກລະເບີດ ທີ່ບໍ່ທັນແຕກ (ລບຕ) ທີ່ຕົກຄ້າງ ຢູ່ໃນ ສປປ ລາວ ຍັງຄົງສືບຕໍ່ເປັນໄພຄຸກຄາມຫຼັກ ຕໍ່ກັບດ້ານມະນຸດສະທໍາ – ໂດຍສະເພາະກຸ່ມຄົນທີ່ມີຄວາມສ່ຽງ ທີ່ອາໄສຢູ່ບັນດາບ້ານ ແລະ ຕົວເມືອງ ໃນເຂດຊົນນະບົດ. ວຽກງານຂອງອົງການເກັບກູ້ລະເບີດ ແມັກ (MAG) ກໍ່ຄືການກວດກູ້ພື້ນທີ່ດິນ ແລະ ໃຫ້ການໂຄສະນາສຶກສາຄວາມສ່ຽງ ຕໍ່ກັບ ລບຕ ເພື່ອຫຼຸດຜ່ອນອຸປະຕິເຫດທີ່້ເກີດຈາກ ລບຕ, ສະໜອງພື້ນທີ່ດິນທີ່ມີຄວາມປອດໄພ ເຂົ້າໃນບັນດາກິດຈະກໍາ ດ້ານກະສິກໍາ, ການພັດທະນາພື້ນຖານໂຄງຮ່າງ, ແລະ ຊ່ວຍໃນການພັດທະນາ ເສດຖະກິດ-ສັງຄົມ ໂດຍລວມ ຂອງ ສປປ ລາວ.
ແຫຼ່ງຂ່າວຈາກ: ສະຖານທູດອາເມລິກາປະຈຳລາວ