ລັດຖະບານຫວຽດນາມ ຂຶ້ນຄ່າແຮງຂັ້ນຕ່ຳ 6% ເລີ່ມມີຜົນບັງຄັບໃຊ້ຕົ້ນເດືອນກໍລະກົດນີ້ ຫຼັງຈາກທີ່ບໍ່ມີການປັບຂຶ້ນຄ່າແຮງຂັ້ນຕ່ຳມາ 2 ປີ.

ສຳນັກຂ່າວໃນຫວຽດນາມ ລາຍງານວ່າ ຄ່າແຮງຂັ້ນຕ່ຳ ປັບຂຶ້ນ 6% ຕຽມມີຜົນບັງຄັບຕາມລະບຽບກົດໝາຍໃນວັນທີ 1 ກໍລະກົດ ນີ້ແລ້ວ ຫຼັງຈາກທີ່ລັດຖະບານຫວຽດນາມບໍ່ໄດ້ມີການປັບຄ່າແຮງຂັ້ນຕ່ຳມາເປັນເວລາ 2 ປີ, ເຮັດໃຫ້ປະຊາຊົນໃນຫວຽດນາມ ຈະໄດ້ຮັບຄ່າແຮງຂັ້ນຕ່ຳຂຶ້ນມາເປັນ 3.25 – 4.68 ລ້ານດົງຕໍ່ເດືອນ ຫຼື ປະມານ 140 – 201 ໂດລາຕໍ່ເດືອນ ນັບຕັ້ງແຕ່ວັນທີ 1 ກໍລະກົດ 2565 ເປັນຕົ້ນໄປ.

ສຳຫຼັບການປັບຂຶ້ນຄ່າແຮງຂັ້ນຕ່ຳຂອງລັດຖະບານຫວຽດນາມນັ້ນ ເພີ່ມຂຶ້ນອີກປະມານ 180,000 – 260,000 ດົງຕໍ່ເດືອນ, ເຊິ່ງຂຶ້ນກັບເຂດເງິນເດືອນ 4 ເຂດທີ່ລັດຖະບານຫວຽດນາມກຳນົດ ແລະ ຈະມີຜົນບັງຄັບໃຊ້ກັບລູກຈ້າງທີ່ໄດ້ຮັບຄ່າຈ້າງເປັນລາຍເດືອນ ແລະ ຄ່າຈ້າງເປັນລາຍຊົ່ວໂມງ.