ໃນວັນທີ 2 ມິຖຸນາ ສານສູງສຸດຂອງກຳປູເຈຍ, ລາວ ແລະ ຫວຽດນາມ ໄດ້ດຳເນີນກອງປະຊຸມທາງອິນເຕີເນັດກ່ຽວກັບຄວາມຍຸຕິທຳສຳລັບສັດປ່າ: ກອງປະຊຸມຜູ້ພິພາກສາສູງສຸດກ່ຽວກັບ ອາຊະຍາກຳສັດປ່າໃນພາກພື້ນ.
ສານປະຊາຊົນສູງສຸດແຫ່ງ ສປປ ລາວ, ກະຊວງກະສິກຳ ແລະ ປ່າໄມ້ແຫ່ງຊາດລາວ ໄດ້ຈັດກອງປະຊຸມຂຶ້ນເພື່ອແນໃສ່ເພີ່ມທະວີການປະຕິບັດກົດໝາຍ ແລະ ອັດຕາການລົງໂທດຕໍ່ອາດຊະຍາກຳສັດປ່າ. ອາຊະຍາກຳສັດປ່າຫຼາຍແຫ່ງໃນພາກພື້ນ ແລະ ສາກົນບໍ່ເຄີຍຖືກຂຶ້ນສານ ແລ້ວຄະດີທີ່ເຄີຍຖືກລົງໂທດຜ່ານມາ ແມ່ນໄດ້ຮັບການລົງໂທດແບບຜ່ອນຜັນ ທີ່ບໍ່ກົງກັບຄວາມຮ້າຍແຮງຂອງອາຊະຍາກຳ.
ທ່ານ ຄຳພັນ ບຸນພາຄົມ ຮອງປະທານສານປະຊາຊົນສູງສຸດ ໄດ້ກ່າວວ່າ: ນີ້ເປັນຄັ້ງທຳອິດທີ່ພວກເຮົາໄດ້ຈັດຕັ້ງງານທີ່ສະໜັບສະໜູນການຮ່ວມມືດ້ານການກວດກາອາຊະຍາກຳສັດປ່າ ແລະ ຍິນດີທີ່ໄດ້ຍິນວ່າຄູ່ຮ່ວມມືຂອງກຳປູເຈຍ ແລະ ຫວຽດນາມ, ຍັງໃຫ້ຄຳໝັ້ນສັນຍາຈະເພີ່ມທະວີການຮ່ວມມືດ້ານຍຸຕິທຳຕໍ່ສັດປ່າ ຫວັງວ່າພວກເຮົາຈະສາມາດສືບຕໍ່ນຳໃຊ້ກົນໄກທີ່ມີຢູ່ແລ້ວເພື່ອແບ່ງປັນປະສົບການ ແລະ ບົດຮຽນໃນຂະແໜງຍຸດຕິທຳເພື່ອຕ້ານການຄ້າສັດປ່າ ແລະ ຖືວ່າມັນເປັນອາຊະຍາກຳທີ່ຮ້າຍແຮງ.
ທ່ານ Seng Teak, ຜູ້ອໍານວຍການອົງການ WWF-ກໍາປູເຈຍ ກ່າວວ່າ: ການຮ່ວມມືລະຫວ່າງປະເທດເພື່ອນບ້ານ ເພື່ອແກ້ໄຂບັນຫາອາດຊະຍາກໍາສັດປ່າໂດຍຜ່ານລະບົບສານຕັດສິນທີ່ມີປະສິດທິຜົນ, ສາມາດກໍາຈັດເຄືອຂ່າຍການຄ້າຂາຍສັດປ່າທີ່ຜິດກົດໝາຍ.
ທ່ານຍັງໄດ້ກ່າວຕື່ມວ່າ: ອາຊະຍາກຳສັດປ່າຂ້າມຊາດບໍ່ພຽງແຕ່ທຳລາຍດ້ານການອະນຸລັກສັດປ່າເທົ່ານັ້ນ, ແຕ່ຍັງເປັນໄພຮ້າຍແຮງຕໍ່ຄວາມໝັ້ນຄົງແຫ່ງຊາດ, ຄວາມຈະເລີນຮຸ່ງເຮືອງດ້ານເສດຖະກິດ ແລະ ສຸຂະພາບຂອງປະຊາຊົນ.
ທ່ານກ່າວຕື່ມວ່າ: “WWF ພ້ອມທີ່ຈະເສີມສ້າງເຄື່ອງມືທາງກົດໝາຍ ແລະ ເພີ່ມທະວີການດຳເນີນຄະດີທີ່ນຳໄປສູ່ການລົງໂທດທີ່ໜັກໜ່ວງ ສຳລັບຜູ້ກະທໍາຜິດໃນອາຊະຍາກຳສັດປ່ານາໆຊາດ.”