ອີງຕາມສູນສຸຂະພາບ ແມ່ ແລະ ເດັກ ກະຊວງສາທາລະນະສຸກ ໄດ້ລາຍງານໃຫ້ຮູ້ວ່າ: ປີຜ່ານມາ ສປປ ລາວ ໄດ້ຮັບຈາກການຊ່ວຍເຫຼືອວັກຊີນຈາກຕ່າງປະເທດ ມີທັງໝົດ 13.682.490 ໂດສ. ໃນນັ້ນລວມມີ ຊີໂນຟາມ 6.902.800 ໂດສ, ເອສຕາເຊເນກາ 4.176.870 ໂດສ, ຈອນສັນແອນຈອນສັນ 1.771.200 ໂດສ, ຊີໂນແວັກ 700.000 ໂດສ, ໄຟເຊີ 100.620 ໂດສ, ສະປຸກນິກ (Gamaleya-Sputnik Light) 30.000 ໂດສ ແລະ ສະປຸກນິກ (Gamaleya-Sputnik V) 1.000 ໂດສ. ຄາດວ່າ ສປປ ລາວ ຈະໄດ້ຮັບວັກຊິນເພີ່ມອີກຈຳນວນ 3,7 ລ້ານໂດສ໌ ໃນໄຕມາດ 1 ປີ 2022.
ສຳລັບບັນດາປະເທດທີ່ໃຫ້ການຊ່ວຍເຫຼືອ ວັກຊິນ ເພື່ອປ້ອງກັນໂຄວິດ-19 ແກ່ ສປປ ລາວ ປະກອບມີ: ສປ ຈີນ, ສະຫະລັດອາເມລິກາ, ກຳປູເຈຍ, ລັດເຊຍ, ອົດສະຕາລີ, ຝຣັ່ງ, ເກຣັກ, ຍີ່ປຸ່ນ ແລະ ເນເທີແລນ, ມາເລເຊຍ, ໂປແລນ, ອັງກິດ ແລະ ປະເທດອື່ນໆ.
ເມື່ອວັນທີ 2 ມັງກອນ 2022 ຜ່ານມານີ້ ສປປ ລາວ ກໍໄດ້ຮັບວັກຊິນປ້ອງກັນໂຄວິດ-19 ໄຟເຊີ ຈາກລັດຖະບານສະຫະລັດອາເມລິກາ ຈຳນວນ 799.110 ໂດສ ໂດຍຜ່ານ COVAX Facility ແລະ ຈາກລັດຖະບານອົດສະຕາລີ ຈຳນວນ 905.580 ໂດສ ໂດຍຜ່ານອົງການຢູນິເຊັບ.
ທ່ານ Dr Tedros Adhanom Ghebreyesus, ອຳນວຍການໃຫຍ່ຂອງອົງການອະນາໄມໂລກໄດ້ອອກມາຖະແຫຼງຂ່າວໃນວັນທີ 31 ທັນວາ 2021 ຜ່ານມາວ່າ: ໂລກເຮົາສາມາດເອົາຊະນະການລະບາດ ຂອງພະຍາດໂຄວິດໃນປີ 2022 ນີ້ໄດ້ເນື່ອງຈາກພວກເຮົາມີເຄື່ອງມືຫຼາຍຢ່າງ, ເຊັ່ນຢາວັກຊີນປ້ອງກັນພະຍາດໂຄວິດ-19 ທີ່ມີຫຼາຍຊະນິດ, ຢາປິ່ນປົວພະຍາດ ລວມທັງເຄື່ອງມືທາງການແພດອື່ນໆ ແຕ່ ອົງການອະນາໄມໂລກຢ້ຳຕື່ມວ່າຜົນສຳເລັດດັ່ງກ່າວຈະບັນລຸໄດ້ກໍ່ຕໍ່ເມື່ອຄວາມແຕກຕ່າງກ່ຽວກັບການເຂົ້າເຖີງການສັກວັກຊີນປ້ອງກັນໂຄວິດ19 ໝົດໄປ ຫຼື ມີໜ້ອຍທີ່ສຸດ.
ດັ່ງນັ້ນທ່ານຮຽກຮ້ອງໃຫ້ບັນດາປະເທດຮ່ວມແຮງກັນເພື່ອພ້ອມກັນຄວບຄຸມ ແລະ ສະກັດກັ້ນການລະບາດໃຫ້ຢຸດຕິໂດຍໄວ ແລະ ໄດ້ຢ້ຳກ່ຽວກັບການແບ່ງປັນວັກຊີນລະຫວ່າງປະເທດທີ່ພັດທະນາແລ້ວ ກັບປະເທດທີ່ກຳລັງພັດທະນາທີ່ກຳລັງປະເຊີນໜ້າກັບການລະບາດໃນຂະໜາດນີ້ ລວມທັງການລະບາດຂອງສາຍພັນໂອມິກຣອນ ຊຶ່ງເມື່ອປະຊາຊົນໃນປະເທດທີ່ກຳລັງພັດທະນາບໍ່ໄດ້ຮັບຢາໃນອັດຕາສ່ວນທີ່ສູງໄດ້ຄາດໝາຍ ເຮັດໃຫ້ເຊື້ອມີໂອກາດກາຍພັນເຊີ່ງຜົນໄດ້ຮັບກໍ່ຄືມີເກີດມີຫຼາກຫຼາຍສາຍພັນທີ່ພວກເຮົາກຳລັງປະເຊີນໜ້າໃນຄະນະນີ້ ແລະ ສ້າງຄວາມ ວິຕົກກັງວົນບໍ່ໜ້ອຍໃຫ້ແກ່ເຫຼົ່າບັນດາປະເທດໃນທົ່ວໂລກ ອົງການອະນາໄມໂລກວາງຄາດໃຫ້ນານາປະເທດເລັ່ງສັກຊີນປ້ອງກັນໃຫ້ໄດ້70% ຂື້ນໄປເພື່ອຢຸດຕິການລະບາດໃນຄັ້ງນີ້ໂດຍໄວ.