ລົດໄຟຂະບວນລ້ານຊ້າງ ມີຄວາມພ້ອມໃຫ້ບໍລິການສັງຄົມ 100% ປັດຈຸບັນໄດ້ເລີ່ມໃຫ້ພາກສ່ວນຕ່າງໆຂອງສັງຄົມສາມາດທົດລອງຂີ່ລົດໄຟຂະບວນດັ່ງກ່າວໄດ້, ເຊິ່ງຈະແລ່ນບໍລິການ 4 ຖ້ຽວຕໍ່ວັນ, ກ່ອນຈະເລີ່ມເປີດບໍລິການເປັນທາງການໃນວັນທີ 3 ທັນວາ 2021.
ທ່ານ ຈຸ້ຍໂກຈ່ຽງ, ປະທານບໍລິສັດທາງລົດໄຟລາວ-ຈີນ ກ່າວຕໍ່ສື່ມວນຊົນໃນວັນທີ 21 ພະຈິກຜ່ານມາ ໃນໂອກາດຄະນະສື່ມວນຊົນໄດ້ລອງຂີ່ລົດໄຟຂະບວນລ້ານຊ້າງ ຈາກສະຖານີນະຄອນຫຼວງວຽງຈັນ ຫາສະຖານີໂພນໂຮງແຂວງວຽງຈັນ, ໂດຍໃຊ້ຄວາມໄວແລ່ນຕາມມາດຕະຖານການອອກແບບຂອງການກໍ່ສ້າງສະເລ່ຍຢູ່ທີ່ 160 ກິໂລແມັດຕໍ່ຊົ່ວໂມງ ເຊິ່ງໃຊ້ເວລາປະມານ 25 ນາທີກໍຮອດຈຸດໝາຍປາຍທາງ.
ຜ່ານການທົດລອງແລ່ນເປັນເວລາ 17 ວັນ ໃນການກວດກາເຕັກນິກເຄື່ອນທີ່ຮອບດ້ານ ແລະໄດ້ສຳເລັດການກວດກາວຽກງານທັງໝົດ ເມື່ອວັນທີ 20 ພະຈິກນີ້, ແລະນັບຈາກນີ້ເປັນຕົ້ນໄປຈະເລີ່ມໃຫ້ພາກສ່ວນຕ່າງໆຂອງສັງຄົມມາທົດລອງຂີ່ລົດໄຟຂະບວນລ້ານຊ້າງ, ເຊິ່ງຈະແລ່ນບໍລິການມື້ລະ 4 ຖ້ຽວ,ກ່ອນຈະເລີ່ມເປີດບໍລິການເປັນທາງການໃນວັນທີ 3 ທັນວາ 2021, ທ່ານ ຈຸ້ຍໂກຈ່ຽງກ່າວ.
ມາຮອດປະຈຸບັນ ທຸກໜ້າວຽກໄດ້ສໍາເລັດໂດຍພື້ນຖານ ຍັງເຫຼືອແຕ່ວຽກປະດັບຕົກແຕ່ງ ແລະອະນາໄມອາຄານສະຖານີ ແລະສິ່ງອໍານວຍຄວາມສະດວກຂອງຜູ້ໂດຍສານ ລວມທັງວາງມາດຕະການປ້ອງກັນຄວບຄຸມ ການລະບາດຂອງພະຍາດໂຄວິດ19 ຢ່າງເຄັ່ງຄັດ.
ຂໍ້ມູນຈາກ: Lao National Radio