ເວັບໄຊ BBC ລາຍງານ: ຜູ້ນຳຫຼາຍປະເທດທີ່ເຂົ້າຮ່ວມກອງປະຊຸມຂອງອົງການສະຫະປະຊາຊາດວ່າດ້ວຍການປ່ຽນແປງສະພາບອາກາດຄັ້ງທີ 26 (COP26) ທີ່ປະເທດສະກອດແລນ ພ້ອມໃຫ້ຄຳໝັ້ນສັນຍາວ່າຈະຢຸດຕິການຕັດໄມ້ທຳລາຍປ່າ ພ້ອມຕັ້ງໜ້າຟື້ນຟູປ່າໄມ້ໃຫ້ໄດ້ຕາມເປົ້າໝາຍໃນປີ 2030.
ຄຳໝັ້ນສັນຍາດັ່ງກ່າວຍັງເຮັດໃຫ້ຫຼາຍຄົນເຊື່ອໄດ້ຍາກ ອີງຕາມການລາຍງານຂອງອົງການ ສປຊ, ນັບແຕ່ປີ 1990 ເຖິງປັດຈຸບັນ ໂລກສູນເສຍພື້ນທີ່ປ່າໄມ້ເຖິງ 2,625 ລ້ານໄລ່ ເຊິ່ງສ່ວນໃຫຍ່ຖືກທຳລາຍຍ້ອນການບຸກເບີກພື້ນທີ່ປູກຝັງ ຂະນະທີ່ ສປຊ ກໍໄດ້ປະກາດຂໍ້ຕົກລົງວ່າດ້ວຍການຫຼຸດຜ່ອນການຕັດໄມ້ທຳລາຍປ່າໃນປີ 2014 ໂດຍສູ້ຊົນຫຼຸດຜ່ອນໃຫ້ໄດ້ເຄິ່ງໜຶ່ງໃນປີ 2020 ແລະຢຸດຕິການຕັດໄມ້ທຳລາຍປ່າແບບຖາວອນໃຫ້ໄດ້ໃນປີ 2030.
ຈາກນັ້ນ, ໃນປີ 2017 ອົງການ ສປຊ ກໍໄດ້ຕັ້ງເປົ້າເພີ່ມອີກ ໂດຍວາງຄາດໝາຍສູ້ຊົນໃນການປູກໄມ້ເພີ່ມພື້ນທີ່ປ່າໃຫ້ໄດ້ 3% ໃນທົ່ວໂລກພາຍໃນປີ 2030. ຢ່າງໃດກໍຕາມ, ຍັງມີການລາຍງານກ່ຽວກັບການຕັດໄມ້ທຳລາຍປ່າເກີດຂຶ້ນເປັນປະຈຳ ໂດຍສະເພາະການລັກລອບຕັດໄມ້ໃນພື້ນທີ່ປ່າອາເມຊອນ, ປະເທດບຣາຊິນ ຂະນະທີ່ ອິນໂດເນເຊຍກໍຈັດເປັນປະເທດ 1 ໃນ 5 ທີ່ສູນເສຍພື້ນທີ່ປ່າໄມ້ຫຼາຍທີ່ສຸດໃນໂລກ.
ໃນຊ່ວງ 10 ປີຜ່ານມາ ໂລກສູນເສຍພື້ນທີ່ປ່າໄມ້ປະມານ 29.3 ລ້ານໄລ່ໃນແຕ່ລະປີ ໂດຍແມ່ນບຣາຊິນ, ຄອງໂກ ແລະ ອິນໂດເນເຊຍໄດ້ຮັບຜົນກະທົບໜັກທີ່ສຸດ.