ເວັບໄຊ BBC ລາຍງານ: ນິໂຄນ ໂອລິເວຣາ, ເດັກຍິງອັດສະລິຍະໄວ 8 ປີຈາກປະເທດບຣາຊິນ ໄດ້ນັບການຍົກຍ້ອງໃຫ້ເປັນນັກດາລາສາດອາຍຸນ້ອຍທີ່ສຸດຂອງໂລກຢ່າງເປັນທາງການ ພາຍຫຼັງຕົກລົງເຂົ້າເຮັດວຽກໃນໂຄງການ “ນັກລ່າດາວເຄາະນ້ອຍ” ຂອງອົງການນາຊາ.

ດ້ວຍໄວອາຍຸຍັງນ້ອຍ ທີ່ຄວນຈະມີຄວາມຮູ້ດ້ານວິທະຍາສາດສະເພາະຊັ້ນປະຖົມສຶກສາເທົ່ານັ້ນ ແຕ່ນິໂຄນຊໍ້າພັດມີໂອກາດໄດ້ສະແດງຄວາມສາມາດສູງ ໂດຍສະເພາະກໍແມ່ນ ຄວາມສາມາດໃນການວິເຄາະຂໍ້ມູນຈາກກ້ອງສ່ອງທາງໄກ ເພື່ອຄົ້ນຫາວັດຖຸອາວະກາດຕ່າງໆ ຂະນະທີ່ປັດຈຸບັນ ນິໂຄນໄດ້ຄົ້ນພົບດາວເຄາະນ້ອຍເຖິງ 18 ດວງ, ຖ້າຫາກມີການຢືນຢັນຮັບຮອງຄວາມຖືກຕ້ອງຂອງການຄົ້ນພົບເຫຼົ່ານີ້ໃນອີກຫຼາຍປີຂ້າງໜ້າ ແນ່ນອນວ່າ ນິໂຄນຈະກາຍເປັນບຸກຄົນທີ່ມີອາຍຸນ້ອຍທີ່ສຸດຂອງໂລກທີ່ຄົ້ນພົບດາວນ້ອຍຢ່າງເປັນທາງການ ໂດຍຈະສາມາດລົ້ມແຊັ້ມເກົ່າຢ່າງ ລຸຍຈີ ຊານນີໂນ, ໄວຮຸ່ນຊາວອີຕາລີໄວ 18 ປີໄດ້.

ພໍ່ຂອງນິໂຄນມີອາຊີບເປັນນັກວິທະຍາສາດຄອມພິວເຕີ ສ່ວນແມ່ແມ່ນເຮັດວຽກໃນສາຍອຸດສາຫະກຳຫັດຖະກຳ ເຊິ່ງທັງສອງຕ່າງກໍໃຫ້ການສະໜັບສະໜູນຜູ້ເປັນລູກຢ່າງເຕັມທີ່ໃນການເດີນທາງຕາມຄວາມຝັນນັ້ນກໍຄື ອາຊີບນັກດາລາສາດ.