ເວັບໄຊ 9News ລາຍງານ: ຕອນເຊົ້າມື້ນີ້ໄດ້ເກີດແຜ່ນດິນໄຫວຂະໜາດ 5.8 ຣິກເຕີໃກ້ກັບເມືອງແມນສ໌ຟິນ, ລັດວິກຕໍເຣຍ, ປະເທດອົດສະຕາລີ ຫ່າງຈາກເມລເບິນໄປທາງທິດຕາເວັນອອກສ່ຽງເໜືອ 180 ກິໂລແມັດ ໂດຍມີແຮງສັ່ນສະເທືອນ 30 ວິນາທີ ຂະນະທີ່ເຈົ້າໜ້າທີ່ໄດ້ເຕືອນປະຊາຊົນຊົນໃຫ້ກຽມພ້ອມຮັບມີກັບອາຟເຕີຊັອກທີ່ຈະເກີດຂຶ້ນ ພາຍຫຼັງມີການບັນທຶກອາຟເຕີຊັອກ 4 ຣິກເຕີພາຍຫຼັງເກີດແຜ່ນດິນໄຫວ 18 ນາທີ.

ທ່ານ ເຈມ ເມີລີໂນ, ຮອງນາຍົກລັດຖະມົນຕີກ່າວວ່າ: ລັດວິຕໍເຣຍແມ່ນຢູ່ໃນພາວະເຝົ້າລະວັງ ເນື່ອງຈາກມີຄວາມສ່ຽງທີ່ຈະເກີດແຜ່ນດິໄຫວ ແລະ ອາຟເຕີຊັອກເພີ່ມ ທັງຈະເກີດແບບຕໍ່ເນື່ອງເປັນເວລາດົນຫຼາຍອາທິດ ຂະນະທີ່ທີມງານທໍລະນີສາດກໍໄດ້ຢືນຢັນວ່າ ມີຄວາມເປັນໄປໄດ້ທີ່ຈະເກີດອາຟເຕີຊັອກອີກຫຼາຍຄັ້ງ ແລະຍັງມີຄວາມສ່ຽງທີ່ຈະເກີດແຜ່ນດິນໄຫວໃນອະນາຄົດ.

ມີອາຄານບາງແຫ່ງທີ່ຕັ້ງຢູ່ສູນກາງຂອງເມືອງແມນສ໌ຟິນ ໄດ້ຮັບຄວາມເສຍຫາຍຈາກເຫດການແຜ່ນດິນໄຫວຄັ້ງນີ້ . ຢ່າງໃດກໍຕາມ, ຍັງບໍ່ມີລາຍງານກ່ຽວກັບຜູ້ທີ່ໄດ້ຮັບບາດເຈັບ ຫຼື ເສຍຊີວິດ.