ເຈົ້າໜ້າທີ່ໜ່ວຍງານຂອງກະຊວງສາທາລະນະສຸກຢືນຢັນວ່າ ລາວກຳລັງປະເຊີນກັບສາຍພັນ ເດລຕ້າບວກ (Delta plus) ເຊິ່ງເປັນສາຍພັນມີການລະບາດໄວກວ່າສາຍພັນອື່ນໆລວມທັງສາຍພັນເດລຕ້າທີ່ເຄີຍຖືກຈັດເປັນສາຍພັນອັນຕະລາຍມາກ່ອນໜ້ານີ້.

ທ່ານ ດຣ. ສີສະຫວາດ ສຸດທານີລະໄຊ, ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ກ່າວໃນງານຖະແຫຼງຂ່າວມື້ວານນີ້ວ່າ: ປັດຈຸບັນ ສປປ ລາວ ໄດ້ເກີດມີການລະບາດໃນຊຸມຊົນໃນບັນດາແຂວງ ແລະ ໂດຍສະເພາະນະຄອນຫຼວງວຽງຈັນ ທີ່ມີການລະບາດໃນຊຸມຊົນສູງທີ່ສຸດໃນສອງມື້ທີ່ຜ່ານມາ, ຂະນະທີ່ ໄດ້ມີການກວດພົບໂຄວິດສາຍພັນເດລຕ້າບວກ ໃນນະຄອນຫຼວງວຽງຈັນ ເຊິ່ງເປັນສາຍພັນມີການລະບາດທີ່ໄວກວ່າສາຍພັນອື່ນໆ.

ເນື່ອງຈາກພະຍາດໂຄວິດ-19 ໄດ້ມີການພັດທະນາ ແລະ ປັບປ່ຽນພັນທຸກຳໂຕເອງໄປເລື້ອຍໆ. ສະນັ້ນ, ເຈົ້າໜ້າທີ່ຈິ່ງໄດ້ຮຽກຮ້ອງໃຫ້ທຸກຄົນລະມັດລະວັງໃນການເດີນທາງໄປມາ ຖ້າບໍ່ຈຳເປັນກໍ່ບໍ່ຄວນໄປທີ່ແອອັດ ຫຼື ສະຖານທີ່ສ່ຽງ ແລະຄວນໃສ່ຜ້າອັດປາກ-ດັງ ເພື່ອປ້ອງກັນພະຍາດດັ່ງກ່າວ.