ສຳນັກຂ່າວ YANGON ລາຍງານໃນວັນທີ 26 ກໍລະກົດຜ່ານມາ, ລັດຖະບານຜະເດັດການທະຫານມຽນມານຳໂດຍ ພົນເອກ ມິນ ອ່ອງ ຫຼ່າຍ ປະກາດຍົກເລີກຜົນການເລືອກຕັ້ງປີ 2020 ທີ່ພັກສັນນິບາດແຫ່ງຊາດເພື່ອປະຊາທິປະໄຕ (NLD) ນຳໂດຍທ່ານ ນາງ ອອງຊານ ຊູຈີ ເປັນຝ່າຍຊະນະ ໂດຍອ້າງວ່າຜົນການເລືອກຕັ້ງທຸດຈະລິດ ແລະບໍ່ມີຄວາມເປັນທຳ ທັງທີ່ການເລືອກຕັ້ງຜ່ານໄປ ເຄິ່ງປີແລ້ວ.
ພົນຕີ ເຕັງ ໂຊ, ປະທານຄະນະກຳມະການເລືອກຕັ້ງຂອງຄະນະລັດຖະບານທະຫານມຽນມາອ້າງວ່າ ມີການເປີດເຜີຍຄະດີທຸດຈະລິດໃນການເລືອກຕັ້ງຈຳນວນ 11 ລ້ານກວ່າຄະດີ ທີ່ພັກສັນນິບາດແຫ່ງຊາດເພື່ອປະຊາທິປະໄຕ ຂອງທ່ານ ນາງ ອອງຊານ ຊູຈີ
ເອົາຊະນະຝ່າຍຄ້ານທີ່ຝັກໃຝ່ທະຫານ ເຊິ່ງພັກດັ່ງກ່າວພະຍາຍາມທີ່ຈະເຂົ້າຢຶດອຳນາດໃນມຽນມາ, ແຕ່ ພົນຕີ ເຕັງ ໂຊ ບໍ່ໄດ້ກ່າວເຖິງເລື່ອງການເລືອກຕັ້ງໃໝ່ໃນທົ່ວປະເທດທີ່ມີປະຊາກອນສູງເຖິງ 54 ລ້ານຄົນແຕ່ຢ່າງໃດ ຂະນະທີ່ກ່ອນໜ້ານີ້ ລັດຖະບານທະຫານຍັງເຄີຍບອກວ່າ ຈະດຳເນີນການເລືອກຕັ້ງໃໝ່ພາຍໃນ 2 ປີ ແລະຍັງຂູ່ວ່າຈະຍຸບພັກສັນນິບາດແຫ່ງຊາດເພື່ອປະຊາທິປະໄຕນຳອີກ.
ຄຳຊີ້ແຈງດັ່ງກ່າວຂັດກັບຄວາມຈິງ ໂດຍວັດທີ່ຈຳນວນປະຊາຊົນທີ່ໃຫ້ການສະໜັບສະໜູນການເລືອກຕັ້ງຂອງພັກສັນນິບາດແຫ່ງຊາດເພື່ອປະຊາທິປະໄຕທີ່ເພີ່ມຂຶ້ນຢ່າງເຫັນໄດ້ຊັດ ເມື່ອທຽບກັບຜົນການເລືອກຕັ້ງປີ 2015, ຂະນະທີ່ໃນລາຍງານການເລືອກຕັ້ງປະຈຳປີ 2020 ໂດຍກຸ່ມກວດສອບເຄືອຂ່າຍອາຊີ ເພື່ອການເລືອກຕັ້ງເສລີກໍໄດ້ກ່າວວ່າ: ການເລືອກຕັ້ງຄັ້ງນີ້ ຖືເປັນຕົວແທນປະຊາຊົນໂດຍແທ້ຈິງ.
ທ່ານ ນາງ ອອງຊານ ຊູຈີ ຖືກຄຸມຕົວຕັ້ງແຕ່ເກີດລັດຖະປະຫານ ແລະຍັງປະເຊີນກັບຂໍ້ກ່າວຫາຕ່າງໆ ເລີ່ມແຕ່ການໝິ່ນປະໝາດຂໍ້ຈຳກັດເລື່ອງໄວຣັສໂຄໂຣນ່າ ຈົນເຖິງການນຳເຂົ້າເຄື່ອງຮັບ-ສົ່ງວິທະຍຸທີ່ຜິດກົດໝາຍ ເຊິ່ງອາດເຮັດໃຫ້ຖືກຕັດສິນຈຳຄຸກດົນກວ່າ 10 ປີ.
ມຽນມາຕົກຢູ່ໃນຄວາມສັບສົນວຸ້ນວາຍນັບແຕ່ລັດຖະບານທະຫານເຂົາຢຶດອຳນາດ, ໂດຍມີຜູ້ເສຍຊີວິດຈາກການປາບປາມຜູ້ເຫັນຕ່າງແລ້ວ 900 ກວ່າລາຍ, ພ້ອມກັນນັ້ນ ການລະບາດຮອບໃໝ່ຂອງໂຄວິດ-19 ກໍ່ໃຫ້ເກີດຄວາມຫາຍະນະຮ້າຍແຮງທົ່ວປະເທດ ອັນໄດ້ກະທົບຕໍ່ໂຮງໝໍຫຼາຍແຫ່ງເນື່ອງຈາກກຸ່ມແພດໝໍທີ່ສະໜັບສະໜູນປະຊາທິປະໄຕພາກັນຄັດຄ້ານພ້ອມປະຕິເສດເຂົ້າປະຈຳການ.