ຣັດເຊຍພົບກໍລະນີເຊື້ອໄຂ້ຫວັດນົກສາຍພັນ H5N8 ເຊິ່ງເປັນຕິດເຊື້ອຈາກສັດປີກສູ່ຄົນເປັນຄັ້ງທຳອິດ ແລະ ໄດ້ແຈ້ງໃຫ້ອົງການອານາໄມໂລກຮັບຮູ້ແລ້ວ.
ສຳນັກງານຂ່າວ ອັນຈາຊີລາຍ ລາຍງານວ່າ: ເມື່ອວັນເສົາທີ 20 ກຸມພາ 2021 ທີ່ຜ່ານມາ ນາງ ແອນນາ ໂປໂປວາ ຫົວໜ້າ ສຳນັກງານບໍລິການເພື່ອການເບິ່ງແຍງສະຫວັດດີການມະນຸດ ແລະ ປ້ອງປ້ອງສິດຂອງຜູ້ບໍລິໂພກ (Rospotrebnadzor) ຂອງຣັດເຊຍ ແຈ້ງກັບສື່ມວນຊົນທ້ອງຖິ່ນວ່າ: ລັດຖະບານແຈ້ງເລື່ອງການພົບຜູ້ຕິດເຊື້ອໄຂ້ຫວັດສາຍພັນ H5N8 ເປັນຄັ້ງທຳອິດຂອງໂລກໃຫ້ອົງການອານາໄມໂລກຮັບຮູ້ແລ້ວ ຫຼັງຈາກໜັ້ນໃຈໃນຜົນການກວດສອບ.
ໃນຊ່ວງກ່ອນໜ້ານີ້ ມີລາຍງານໄຂ້ຫວັດສາຍພັນ H5N8 ລະບາດຢ່າງໜັກໜ່ວງໃນປະເທດລັດເຊຍ ເຊິ່ງຫຼາຍປະເທດໃນເອີຣົບ, ຈີນ, ຕະເວັນອອກກາງ ແລະ ອາຟິກກາເໜືອ ແຕ່ເປັນການລະບາດໃນສັດປີກເທົ່ານັ້ນ ໂດຍມີແຕ່ 3 ສາຍພັນທີ່ເຄີຍຖືກພົບວ່າຕິດຕໍ່ສູ່ຄົນ ໄດ້ແກ່ H5N1, H7N9 ແລະ H9N2.
ນາງ ແອນນາ ໂປໂປວາ ແຈ້ງວ່າ: ເຈົ້າໜ້າທີ່ພົບຄົນເຮັດວຽກໃນຟາມສັດປີກ 7 ຄົນຕິດເຊື້້ອໄຂ້ຫວັດນົກ H5N8 ຕອນທີ່ເກີດການລະບາດຢູ່ພາກໃຕ້ຂອງປະເທດໃນເດືອນທັນວາປີທີ່ຜ່ານມາ ໂດຍເຊື້ອສາຍພັນນີ້ ມີອັດຕາການແຜ່ລະບາດສູງໃນສັດປີກ ແລະອາດຕາຍໄດ້ ແຕ່ຈົນເຖິງປັດຈຸບັນຍັງບໍ່ພົບການແຜ່ເຊື້ອຈາກຄົນສູ່ຄົນ ແລະ ຄົນງານທີ່ຕິດເຊື້ອກໍ່ບໍ່ມີບັນຫາສຸຂະພາບຮ້າຍແຮງ.
ເຖິງຢ່າງໃດກໍ່ຕາມ ນາງ ແອນນາ ໂປໂປວາ ຢໍ້າວ່າ: ນີ້ແມ່ນການຄົ້ນພົບທີ່ສຳຄັນທາງວິທະຍາສາດ ແລະ ເວລາຈະເປັນສິ່ງບອກວ່າ ໄວຣັສຊະນິດນີ້ຈະກາຍພັນເພີ່ມຂື້້ນອີກຫຼືບໍ່. ເຊິ່ງໃນເວລາດຽວກັນ ສະຖາບັນ ເວັກເຕີ້ ໃນເຂດໄຊບີເຣີຍຂອງລັດເຊຍ ເຊຶ່ງເປັນໜຶ່ງໃນໜ່ວຍງານພັດທະນາວັກຊີນຕ້ານໂຄວິດ-19 ເປີດເຜີຍໃນວັນເສົາວ່າ: ພວກເຂົາຈະເລີ່ມຕົ້ນທົດສອບໃນມະນຸດ ແລະພັດທະນາວັກຊີນຕ້ານເຊື້ອ H5N8 ນຳອີກ.
ຮຽບຮຽງໂດຍ: ມົນລະດີ